ຄລິບພີທີແຕ່ງຕັ້ງຮັກສາການ ເຈົ້າແຂວງອຸດົມໄຊ ຜູ່ໃໝ່

ຄລິບພີທີແຕ່ງຕັ້ງຮັກສາການ ເຈົ້າແຂວງອຸດົມໄຊ ຜູ່ໃໝ່

ຂ່າວ ໄມພອນ

ພາຍຫຼັງທີ່ກົມການເມືອງສູນກາງພັກມີມະຕິຕົກລົງຍົກຍ້າຍທ່ານ ເພັດສາຄອນ ຫຼວງອາໄພ ກຳມະການສູນກາງພັກ ເລຂາພັກແຂວງ ເຈົ້າແຂວງອຸດົມໄຊ ໄປຮັບໜ້າທີ່ໃໝ່ຢູ່ສູນກາງ ແລະ ຍົກຍ້າຍທ່ານ ປອ ຄຳພັນ ເຜີຍຍະວົງ ກຳມະການສູນກາງພັກ ອາດີດເລຂາພັກແຂວງ ເຈົ້າແຂວງໆບໍ່ແກ້ວ ມາເປັນເລຂາພັກແຂວງ ຮັກສາການເຈົ້າແຂວງອຸດົມໄຊ ມາໃນຕອນບ່າຍຂອງວັນທີ 16 ສິງຫານີ້ ຢູ່ທີ່ຫ້ອງປະຊຸມຫ້ອງວ່າການປົກຄອງແຂວງອຸດົມໄຊ ກໍໄດ້ມີພິທີ ມອບ-ຮັບໜ້າທີ່ເລຂາພັກແຂວງ-ເຈົ້າແຂວງ ລະຫວ່າງຜູ້ເກົ່າ ແລະ ຜູ້ໃໝ່ຂຶ້ນຢ່າງເປັນທາງການ

ໂດຍການເປັນກຽດເຂົ້າຮ່ວມຂອງທ່ານ ຈັນສີ ໂພສີຄຳ ກຳມະການກົມການເມືອງສູນກາງພັກ, ເລຂາທິການສູນກາງພັກ, ຫົວໜ້າຄະນະຈັດຕັ້ງສູນກາງພັກ. ມີການນຳຈາກສູນກາງ, ຄະນະພັກ, ອົງການປົກຄອງແຂວງ, ເມືອງ, ຫົວໜ້າພະແນກການ, ສອງກອງບັນຊາການ ແລະ ອົງການຈັດຕັ້ງຕ່າງໆພາຍໃນແຂວງເຂົ້າຮ່ວມ.

ພິທີ ທ່ານ ເພັດສາຄອນ ຫຼວງອາໄພ ກຳມະການສູນກາງພັກ ເລຂາພັກແຂວງ ເຈົ້າແຂວງອຸດົມໄຊ ໄດ້ຂຶ້ນຜ່ານບົດບັນທຶກ ການມອບ-ຮັບໜ້າທີ່ເລຂາພັກແຂວງ-ເຈົ້າແຂວງ ລະຫວ່າງຜູ້ເກົ່າ ແລະ ຜູ້ໃໝ່ ຈາກນັ້ນ ກໍໄດ້ລົງນາມເຊັນບົດບັນທຶກມອບ-ຮັບໜ້າທີ່ຢ່າງເປັນທາງການ.ໂອກາດດຽວກັນ ທ່ານ ຈັນສີ ໂພສີຄຳ ກຳມະການກົມການເມືອງສູນກາງພັກ, ເລຂາທິການສູນກາງພັກ, ຫົວໜ້າຄະນະຈັດຕັ້ງສູນກາງພັກ ໄດ້ກ່າວເຖິງຈຸດປະສົງຂອງການຍົກຍ້າຍ, ຊັບຊ້ອນເລຂາພັກແຂວງ-ເຈົ້າແຂວງທັງສອງແຂວງ ພ້ອມດຽວກັນ ທ່ານ ຍັງໄດ້ສະແດງຄວາມຊົມເຊີຍຕໍ່ການຊີ້ນຳໆຂອງຄະນະບໍລິຫານງານພັກແຂວງອຸດົມໄຊຕະຫຼອດໄລຍະທີ່ຜ່ານມາ ເຊິ່ງເຫັນວ່າແຂວງອຸດົມໄຊນັບມື້ນັບໄດ້ຮັບການພັດທະນາຢ່າງຕໍ່ເນື່ອງ.

ຂະນະດຽວກັນທ່ານ ກໍຍັງໄດ້ຊີ້ນຳຫຼາຍບັນຫາຕໍ່ການນຳ ແລະ ພະນັກງານຫຼັກແຫຼ່ງຂອງແຂວງອຸດົມໄຊ ໂດຍສະເພາະແມ່ນເນັ້ນໃຫ້ສືບຕໍ່ຮັກສາຄວາມສາມັກຄີໃຫ້ມີຄວາມໜັ້ກແໜ້ນ, ມີຄວາມເປັນເອກະພາບສູງ, ພ້ອມກັນໃຫ້ການຮ່ວມໄມ້ຮ່ວມມື, ສະໜັບສະໜູນ ຊ່ວຍເຫຼືອແກ່ທ່ານເລຂາພັກແຂວງ- ຮັກສາການເຈົ້າແຂວງຄົນໃໝ່ ເພື່ອສືບຕໍ່ຊີ້ນຳນຳພາສ້າງສາພັດທະນາແຂວງໃຫ້ນັບມື້ເຕີບໃຫຍ່ຂະຫບາຍຕົວ.