ຍອດລວມການຮັບບໍລິຈາກຊ່ວຍ ສະໜາມໄຊ ໄດ້ 109 ຕື້ກີບ (ວັດຖຸ+ເງິນ)

0
332

ທ່ານ ບຸນທະມາລີ ໝັ້ນອານົງ ຫົວໜ້າພະນແນກເງິນແຂວງ ຮັບຜິດຊອບອະນຸກຳມະການເສດຖະກິດ ຜູ້ປະສົບໄພພິບັດ ນ້ຳຖ້ວມ ຢູ່ແຂວງອັດຕະປື ໄດ້ໃຫ້ສຳພາດຕໍ່ສື່ມວນຊົນເມື່ອວັນທີ 24 ສິງຫານີ້ ກ່ຽວກັບສະພາບລາຍຮັບ-ລາຍຈ່າຍທີ່ໄດ້ຮັບຈາກການປະກອບສ່ວນຂອງທົ່ວສັງຄົມ ເລີ່ມແຕ່ວັນທີ 24 ກໍລະກົດ ເປັນຕົ້ນມາເຊັ່ນ: ສະພາບລາຍຮັບມາຮອດປັດຈຸບັນ ສາມາດສະຫຼຸບໄດ້ 109 ຕື້ກີບ ໃນນັ້ນມີເງິນສົດປະມານ 40 ກວ່າຕື້ກີບ ເປັນວັດຖຸປະມານ 68,8 ຕື້ກີບ ດ້ານລາຍຈ່າຍ ມາຮອດປັດຈຸບັນໄດ້ຈ່າຍໄປແລ້ວ 15 ຕື້ກວ່າກີບ.

ທ່ານຍັງໃຫ້ຮູ້ຕື່ມອີກວ່າ: ກ່ຽວກັບບັນຫາສະພາບດ້ານລາຍຮັບຂອງຄະນະຂອງພວກເຮົາກໍ່ໄດ້ມີກົນໄກຈັດຕັ້ງປະຕິບັດລາຍຮັບທີ່ມີຄວາມຮັບຜິດຊອບສູງ ໂດຍສະເພາະແມ່ນໄດ້ເອົາທະນາຄານການຄ້າຕ່າງປະເທດລາວ ມະຫາຊົນ ສາຂາອັດຕະປືເຂົ້າມາຕິດຕາມ ແລະ ຮັບເງິນໂດຍກົງ ໂດຍມອບເຂົ້າບັນຊີຄັງຂອງແຂວງ ຖືວ່າອະນຸກຳມະການຂອງພວກເຮົາບໍ່ໄດ້ຮັບເງິນສົດ, ໃນແຕ່ລະມື້ ຮອດເວລາ 15 ໂມງ ໄດ້ມີການສະຫຼຸບລາຍງານການນຳແຂວງ ແລະ ສູນກາງໂດຍສະເພາະແມ່ນກະຊວງການເງິນ.

ດ້ານລາຍຈ່າຍກໍ່ໄດ້ມີການຄຸ້ມຄອງເປັນລະບົບ ໂດຍສະເພາະໜ່ວຍງານທີ່ກ່ຽວຂ້ອງເຊັ່ນ: ພະນັກງານການເງິນ ແລະ ພະນັກງານຫ້ອງວ່າການປົກຄອງແຂວງ ໄດ້ມີການປະສານສົມທົບກັນ, ແຕ່ເຖິງແນວໃດກໍ່ດີດ້ານລາຍຈ່າຍແມ່ນໄດ້ເນັ້ນໃສ່ການປະຢັດມັດທະຍັດ ເພື່ອຮັບປະກັນໃຫ້ວຽກງານໄດ້ຮັບຜົນສຳເລັດຕາມຄາດໝາຍ ໂດຍສະເພາະອັດຕາກິນຂອງພະນັກງານລົງເຮັດວຽກປະຈຳຢູ່ເມືອງສະໜາມໄຊແມ່ນບໍ່ມີເງິນອັດຕາກິນໃຫ້ກິນລວມນອນລວມ. ມີແຕ່ອະນຸຍາດຈັດຊື້ປະເພດອາຫານສະໜອງໃຫ້ຂັ້ນເມືອງ ແລະ ແຂວງຈັດຊື້ຕິດພັນກັບອຸປະກອນທີ່ຈຳເປັນຂອງໜ່ວຍງານອະນຸກຳມະການຕ່າງໆເພື່ອຄວາມສະດວກ ແລະ ຮັບປະກັນບໍ່ໃຫ້ວຽກຕົກຄ້າງ.

ທ່ານຍັງໃຫ້ຮູ້ຕື່ມອີກວ່າ: ວຽກງານສະຫຼຸບສຳລັບຂັ້ນເມືອງແມ່ນແຂວງໄດ້ຈັດສົ່ງພະນັກງານຂະແໜງການລົງມາຊ່ວຍອະນຸກຳມະການເສດຖະກິດຂັ້ນເມືອງເພື່ອຄຸ້ມຄອງຕິດຕາມລາຍຮັບລາຍຈ່າຍຄືກັບແຂວງທີ່ກຳລັງປະຕິບັດຢູ່ນີ້ ມາຮອດປັດຈຸບັນນີ້ສາມາດສະຫຼຸບໄດ້ວ່າ: ອະນຸກຳມະການເສດຖະກິດຂັ້ນເມືອງ ແລະ ແຂວງ ແມ່ນເຂົ້າສູ່ລະບົບແລ້ວມີການລາຍງານ ແລະ ສະຫຼຸບປະຈຳວັນສຳລັບງົບປະມານຕາມແຜນທີ່ທາງເມືອງສະເໜີ ໂດຍສ່ວນໃຫຍ່ແມ່ນຕິດພັນກັບອາຫານການກິນ, ອຸປະກອນກໍ່ສ້າງຈຳນວນໜື່ງ.

ທ່ານຍັງຮຽກຮ້ອງເຖິງພາກສ່ວນຕ່າງໆ ທັງພາຍໃນ ແລະ ຕ່າງປະເທດຈົ່ງປະກອບສ່ວນຊ່ວຍເຫຼືອເທົ່າທີ່ຈະຊ່ວຍໄດ້ ເນື່ອງຈາກວ່າການຟື້ນຟູຊີວິດການເປັນຢູ່ຂອງປະຊາຊົນຜູ້ປະສົບໄພໃຫ້ກັບຄືນສູ່ສະພາບປົກກະຕິ ຕ້ອງໃຊ້ເວລາຍາວນານ ແລະ ຕ້ອງໃຊ້ງົບປະມານເປັນຈຳນວນຫຼວງຫຼາຍ, ພ້ອມທັງສະແດງຄວາມຂອບໃຈມາຍັງທຸກໆທ່ານ ແລະ ບັນດາອົງການຈັດຕ່າງໆທັງພາຍໃນ ແລະ ຕ່າງປະເທດທີ່ໃຫ້ຄວາມຊ່ວຍເຫຼືອຜ່ານມາ.