ບ້ານຟ້າ ຄວ້າແຊ້ມ ບຸນຊ່ວງເຮືອປະຈໍາປີ 2018 ເມືອງນໍ້າບາກໝາກກ້ຽງຫວານ

ຫຼວງພະບາງ: ວັນທີ່ 26 ສິງຫາ 2018 ທີ່ນໍ້າບາກ ເຂດບ້ານບົມ ເມືອງນໍ້າບາກ ແຂວງຫຼວງພະບາງ ໄດ້ຈັດງານບຸນແຂ່ງຂັນຊ່ວງເຮືອປະຈໍາປີ 2018 ໂດຍການເປັນປະທານຂອງທ່ານ ສົມພອນ ສີອຸດົມພັນ ເຈົ້າເມືອງນໍ້າບາກ,ໃຫ້ກຽດຮັບຊົມມີທ່ານ ວົງສະຫວັນ ເທບພະຈັນ ຮອງເຈົ້າແຂວງຫຼວງພະບາງ ພ້ອມດ້ວນການນໍາຈາກແຂວງ,ບັນດາເຈົ້າເມືອງ-ຮອງເຈົ້າເມືອງ,ນັກທຸລະກິດພາຍໃນ-ຕ່າງປະເທດ,ບ້ານຕ່າງໆພາຍໃນເມືອງ ແລະ ມວນຊົນຊາວເມືອງນໍ້າບາກເຂົ້າຮ່ວມຊົມຮ່ວມເຊຍຢ່າງຄຶກຄື້ນມ່ວນຊື່ນຕາມ 2 ຝັ່ງນໍ້າບາກ.

ພິທີທ່ານ ວົງສະຫວັນ ເທບພະຈັນ ຮອງເຈົ້າແຂວງຫຼວງພະບາງ ແລະ ທ່ານ ສົມພອນ ສີອຸດົມພັນ ເຈົ້າເມືອງພ້ອມດ້ວຍການນໍາແຂວງ-ເມືອງກໍ່ໄດ້ຮ່ວມກັນຕັດແຖບຜ້າ ແລະ ປ່ອຍປ້າຍໝາກປູມເປົ້າຂື້ນສູ່ທ້ອງຟ້າ ເພື່ອເປີດງານແຂ່ງຂັນຊ່ວງເຮືອຢ່າງເປັນທາງການ.ສໍາລັບເຮືອຊ່ວງທີ່ເຂົ້າແຂ່ງຂັນໃນປີນີ້ມີທັງໝົດ 16 ລໍາ,ແບ່ງອອກເປັນ 2 ປະເພດ,ປະເພດລະ 2 ສາຍຄື: ປະເພດເຮືອເຄິ່ງປະເພນີ 9 ລໍາມີ ສາຍ A-B ແລະ ປະເພດເຮືອປະເພນີ ຫຼື ເຮືອສູດ 7 ລໍາມີສາຍ A-B ,ໂດຍຈະແຂ່ງຂັນກັນແບບເສຍ 2 ເທື່ອຄັດອອກພາຍໃນສາຍ ເພື່ອເຂົ້າຊິງໄຊ ແລະ ມີຮອບການແຂ່ງຂັນທັງໝົດ 26-30 ຮອບ.

ສໍາລັບເຮືອທີ່ເຂົ້າມາຮ່ວມແຂ່ງຂັນປະກອບມີ: ສາຍ A ເຮືອເຄິ່ງປະເພນີມີ: ບ້ານໂພນໄຊ,ບ້ານໂຄ້ງ,ນໍ້າລາ,ໂພນສະອາດ,ສາຍ B ມີ:ບ້ານຟ້າ,ບ້ານນະຄອນ,ບ້ານລີ່ ແລະ ສາຍA ເຮືອສູດມີ: ບ້ານໂພນສະອາດ,ທ່າລີ່ໃຕ້,ບ້ານລີ່,ບ້ານປາກມອງ ແລະ ສາຍ B ມີ: ບໍລິສັດສິນໄຊຫຼວງພະບາງ,ບ້ານບົມ ແລະ ບ້ານຊາງ.

ສໍາລັບການຈັດງານແຂ່ງຂັນຊ່ວງເຮືອຄັ້ງນີ້ເປັນການສືບທອດປະເພນີຂອງເມືອງ,ເພື່ອເປັນການປະລອງກໍາລັງສີພາຍຂອງແຕ່ລະບ້ານພາຍໃນເມືອງ ແລະ ພິເສດປີນີ້ມີເຮືອຊ່ວງຈາກເມືອງຊຽງເງິນ ແລະ ນະຄອນຫລວງພະບາງ ເຂົ້າຮ່ວມ.

ຜ່ານການແຂ່ງຂັນດ້ວຍຄວາມເບິກບານມ່ວນຊື່ນປະກົດວ່າເຮືອຊ່ວງທີ່ໄດ້ເປັນແຊ້ມ ປະເພດເຮືອປະເພນີ ແລະ ເຄີ່ງປະເພນີ ແມ່ນ ເຮືອຊ່ວງບ້ານຟ້າ ໄດ້ຮັບເງິນສົດ 4.000.000 ກີບ ພ້ອມຂັນແຊ້ມ 1 ໜ່ວຍ, ທີ່ 2 ບ້ານນະຄອນຮັບເງິນສົດ 3.500.000 ກີບພ້ອມຂັນ 1 ໜ່ວຍ, ທີ່ 3 ບ້ານໂຄ້ງຮັບເງິນສົດ 3.000.000 ກີບ ພ້ອມຂັນ 1 ໜ່ວຍ, ທີ່ 4 ບ້ານໂພນໄຊ ຮັບເງິນ 3.000.000 ກີບ, ທີ່ 5 ບ້ານນໍ້າລາ ຮັບເງິນ 2.600.000 ກີບ, ທີ່ 6 ບ້ານລີ່ຮັບເງິນ 2.400.000ກີບ ແລະ ທີ່ 7 ບ້ານໂພນສະອາດ ຮັບເງິນ 2.200.000ກີບ,

 

 

ປະເພດເຮືອສູດ ໄດ້ເປັນແຊ້ມແມ່ນ ບ້ານບົມ ຮັບເງິນສົດ 4.000.000 ກີບພ້ອມຂັນ 1 ໜ່ວຍ,ທີ່ 2 ເຮືອຊ່ວງຈາກນະຄອນຫຼວງພະບາງ ຮັບເງິນສົດ 3.500.000 ກີບ ພ້ອມຂັນ 1 ໜ່ວຍ, ທີ່ 3 ບ້ານລີ່ ຮັບເງິນສົດ 3.000.000 ກີບພ້ອມຂັນ 1 ໜ່ວຍ, ທີ່ 4 ບ້ານປາກມອງ ຮັບເງິນສົດ 3.000.000 ກີບ, ທີ່ 5 ເມືອງຊຽງເງິນ ຮັບເງິນສົດ 2.600.000 ກີບ, ທີ່ 6 ບ້ານໂພນສະອາດ ຮັບເງິນສົດ 2.400.000ກີບ, ທີ່ 7 ເຮືອຊ່ວງສິນໄຊຫຼວງພະບາງ 2.220.000 ກີບ, ທີ່ 8 ເຮືອຊ່ວງນັກທຸລະກິດບ້ານຊາງ (ກຸ່ມນໍ້າຖ້ວມ) ຮັບເງິນສົດ 2.100.000 ກີບ ແລະ ທີ່ 9 ບ້ານທ່າລີ່ໃຕ້ 2.000.000ກີບ.

ສ່ວນລາງວັນເຮືອງາມແມ່ນເຮືອຊ່ວງບ້ານນໍ້າລາຮັບເງິນ 1.000.000ກີບ.

ຂ່າວ: ເພັດສາຄອນ ສິມມະວົງ