ທ່ານ ເພັດ ພົມພິພັກ ຕ້ອນຮັບທ່ານເອກອັກຄະລັດຖະທູດອົດສະຕຣາລີ

ລັດຖະບານ: ໃນຕອນເຊົ້່າຂອງວັນທີ 31 ສິງຫາ 2018 ທີ່ຫ້ອງວ່າການສໍານັກງານນາຍົກລັດຖະມົນຕີ ທ່ານ ເພັດ ພົມພິພັກ ລັດຖະມົນຕີ, ຫົວໜ້າຫ້ອງວ່າການສໍານັກງານນາຍົກລັດຖະມົນຕີ ໄດ້ໃຫ້ກຽດຕ້ອນຮັບການເຂົ້າຢ້ຽມຂໍ່ານັບຂອງ ທ່ານ ຊອງ ເບີນາດ ຄາຣາສໂກ ເອກອັກຄະລັດຖະທູດອົດສະຕຣາລີ ປະຈຳລາວ ພ້ອມດ້ວຍຄະນະ.


ກ່ອນອື່ນ, ທ່ານ ເພັດ ພົມພິພັກ ໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງຕໍ່ການເຂົ້າຢ້ຽມຂໍ່ານັບຂອງ ທ່ານ ຊອງ ເບີນາດ ຄາຣາສໂກ ພ້ອມດ້ວຍຄະນະ ໃນຄັ້ງນີ້ ອັນເປັນການປະກອບສ່ວນສໍາຄັນເຂົ້າໃນການເສີມຂະຫຍາຍສາຍພົວພັນຮ່ວມມື ລະຫວ່າງ ສອງປະເທດໃຫ້ແໜ້ນແຟ້ນຍິ່ງໆຂຶ້ນ. ພ້ອມດຽວກັນນີ້, ທ່ານ ເພັດ ພົມພິພັກ ໄດ້ສະແດງຄວາມຂອບໃຈເປັນຢ່າງສູງ ຕໍ່ລັດຖະບານອົດສະຕຣາລີ ທີ່ໄດ້ໃຫ້ການສະໜັບສະໜູນ ແລະ ຊ່ວຍເຫຼືອ ສປປ ລາວ ໃນດ້ານຕ່າງໆຕະຫຼອດມາ ເຊິ່ງເຮັດໃຫ້ເສດຖະກິດ-ສັງຄົມ ໄດ້ຮັບການພັດທະນາຢ່າງຕໍ່ເນື່ອງ ໂດຍສະເພາະແມ່ນການໃຫ້ຄວາມຊ່ວຍເຫຼືອຕໍ່ຜູ້ປະສົບໄພພິບັດ ຢູ່ທີ່ເມືອງສະໜາມໄຊ, ແຂວງອັດຕະປື ເພື່ອເຮັດໃຫ້ຊີວິດການເປັນຢູ່ຂອງຜູ້ທີ່ໄດ້ຮັບຜົນກະທົບ ກັບຄືນສູ່ສະພາບປົກກະຕິໂດຍໄວ.


ໂອກາດດັ່ງກ່າວ, ທ່ານ ຊອງ ເບີນາດ ຄາຣາສໂກ ໄດ້ສະແດງຄວາມຂອບໃຈຕໍ່ ທ່ານ ເພັດ ພົມພິພັກ ທີ່ໄດ້ເສຍສະຫຼະເວລາອັນມີຄ່າໃຫ້ການຕ້ອນຮັບໃນຄັ້ງນີ້ ແລະ ຢັ້ງຢືນຕື່ມວ່າ ລັດຖະບານອົດຕຣາລີ ຈະສືບຕໍ່ໃຫ້ການພົວພັນຮ່ວມມື, ຊຸກຍູ້ຊ່ວຍເຫຼືອ ສປປ ລາວ ຕໍ່ໄປ. ທ່ານຍັງໄດ້ກ່າວຕື່ມວ່າ: ປະຈຸບັນ ລັດຖະບານ ອົດສະຕຣາລີ ໄດ້ເພີ່ມງົບປະ ມານເປັນຈໍານວນ 03 ລ້ານໂດລາສະຫະລັດ ເພື່ອຊ່ວຍເຫຼືອຜູ້ປະສົບໄພ ຢູ່ທີ່ເມືອງສະໜາມໄຊ, ແຂວງອັດຕະປື ໃນນີ້ ຈະນໍາໃຊ້ເຂົ້າໃນວຽກງານປັບປຸງ ແລະ ຟື້ນຟູວຽກງານການສຶກສາ, ສາທາລະນາສຸກ ແລະ ວຽກງານເກັບກູ້ລະເບີດບໍ່ທັນແຕກ ແລະ ວຽກງານອື່ນໆ.

ພ້ອມດຽວກັນນີ້, ທັງສອງຝ່າຍຍັງໄດ້ມີການສົນທະນາ ແລະ ແລກປ່ຽນຄໍາຄິດຄໍາເຫັນເຊິ່ງກັນ ແລະ ກັນ ກ່ຽວກັບວຽກງານທາງດ້ານການເມືອງ, ການພັດທະນາເສດຖະກິດ-ສັງຄົມ ແລະ ການລົງທຶນຂອງສອງປະເທດ ຕື່ມອີກ.