ລາຍງານຄວາມຄືບໜ້າຈາກ ສະໜາມໄຊ

ຂປລ. ໜ່ວຍກອບກູ້ຜູ້ສູນຫາຍ ຂອງກອງທັບປະຊາຊົນລາວ ຍືນຍັນ ຈະສືບຕໍ່ຮີບຮ້ອນເລັ່ງຊອກຫາຜູ້ສູນຫາຍ ຈາກໄພນ້ຳຖ້ວມ ທີ່ເກີດຈາກໂຄງການກໍ່ສ້າງເຂື່ອນໄຟຟ້າເຊປຽນ-ເຊນ້ຳນ້ອຍແຕກ ຢູ່ເມືອງສະໜາມໄຊ ແຂວງອັດຕະປື ເຊິ່ງສະພາບການເຄື່ອນໄຫວຈັດຕັ້ງປະຕິບັດ ການຊ່ວຍເຫລືອ ແລະ ກອບກູ້ຜູ້ສູນຫາຍ ມາຮອດວັນທີ 31 ສິງຫາ 2018 ນີ້, ລວມມີຜູ້ເສຍຊີວິດທັງໝົດ 40 ສົບ, ຍິງ 19 ສົບ, ໃນນີ້ເກັບກູ້ຢູ່ພາກສະໜາມ ທັງໝົດ 34 ສົບ, ຍິງ 17 ສົບ, ເດັກນ້ອຍອາຍຸຕ່ຳກວ່າ 10 ປີລົງມາ ຈຳນວນ 14 ສົບ, ຍິງ 7 ສົບ, ເສຍຊີວິດຢູ່ໂຮງໝໍ (ແຂວງ, ເມືອງ) 6 ສົບ, ຍິງ 2 ສົບ. ສ່ວນຜູ້ສູນຫາຍ ຕາມການບອກເລົ່າຂອງຄອບຄົວຜູ້ປະສົບໄພນ້ຳຖ້ວມເບື້ອງຕົ້ນ ມີຈຳນວນ 131 ຄົນ ປັດຈຸບັນ ເຈົ້າໜ້າທີ່ກອບກູ້ໄດ້ແລ້ວ 34 ສົບ, ຍັງບໍ່ທັນພົບເຫັນ 97 ຄົນ.

ໃນຕອນແລງວັນທີ 31 ສິງຫາ 2018 ນີ້, ໄດ້ມີພິທີຖະແຫລງຂ່າວ ກ່ຽວກັບ ສະພາບການເຄື່ອນໄຫວຈັດຕັ້ງປະຕິບັດ ການຊ່ວຍເຫລືອ, ຄົ້ນຫາ ແລະ ບັນເທົາທຸກ ແກ່ຜູ້ປະສົບໄພນ້ຳຖ້ວມ ໂດຍທ່ານ ພົນຈັດຕະວາ ສິງສະຫວັດ ພົມມະສັກ ຮອງຫົວໜ້າກົມໃຫຍ່ການເມືອງກອງທັບ ກະຊວງປ້ອງກັນປະເທດ, ຜູ້ບັນຊາການໜ່ວຍກອບກູ້ພາກສະໜາມ ໄດ້ລາຍງານໃຫ້ຮູ້ວ່າ: ໃນວັນທີ 31 ສິງຫາ 2018 ນີ້, ໜ່ວຍກອບກູ້ຜູ້ສູນຫາຍ ຂອງກອງທັບປະຊາຊົນລາວ ໄດ້ປະຕິບັດກອບກູ້ຜູ້ສູນຫາຍ ຢູ່ພື້ນທີ່ຖືກຜົນກະທົບ ໂດຍສົມທົບກັບຄອບຄົວຜູ້ສູນຫາຍ ເພື່ອລົງຊີ້ຈຸດທີ່ຜູ້ສູນຫາຍໄຫລໄປຕາມກະແສນ້ຳ ໃນເວລາເກີດເຫດການດັ່ງກ່າວ ແຕ່ສຳລັບມື້ນີ້ ແມ່ນບໍ່ເຫັນຊາກສົບ. ພ້ອມທັງ ຍືນຍັນວ່າ ຈະສືບຕໍ່ຄົ້ນຫາຜູ້ສູນຫາຍ ຕໍ່ໄປ ຈົນກວ່າປະຊາຊົນຈະພໍໃຈ ແລະ ອື່ນໆ.

ໂອກາດດຽວກັນ ທ່ານ ບຸນໂຮມ ພົມມະສານ ເຈົ້າເມືອງໆສະໜາມໄຊ ກໍໄດ້ລາຍງານໃຫ້ຮູ້ວ່າ: ການຈັດຕັ້ງປະຕິບັດການສ້າງເຮືອນພັກຊົ່ວຄາວ ໃຫ້ປະຊາຊົນທີ່ໄດ້ຮັບຜົນກະທົບ ຢູ່ຈຸດຕ່າງໆ ເປັນຕົ້ນ ຈຸດບ້ານດົງບາກ, ບ້ານດອນບົກ, ບ້ານຕະມໍຢອດ ແລະ ຈຸດບ້ານປິນດົງ ຈະເລີ່ມລົງມືກໍ່ສ້າງໃນຕົ້ນເດືອນກັນຍາ 2018 ນີ້ ເຊິ່ງການປຸກສ້າງ ຈະໄດ້ຮັບການຊ່ວຍເຫລືອ ຈາກກຳລັງຂອງເຈົ້າໜ້າທີ່ທະຫານ ຂອງກອງທັບປະຊາຊົນລາວ ເປັນຫລັກ.

ປັດຈຸບັນ ການກໍ່ສ້າງທີ່ພັກຊົ່ວຄາວໃຫ້ຜູ້ປະສົບໄພ ຢູ່ເຂດໂຮງຮຽນປະຖົມ ບ້ານຫາດຍາວ ປະຕິບັດໄດ້ແລ້ວ 97%. ສ່ວນການບຸກເບີກພື້ນທີ່ປຸກສ້າງເຮືອນພັກຊົວຄາວ ແລະ ຖາວອນ ໃຫ້ຜູ້ປະສົບໄພ ເຂດດົງບາກ ປະຕິບັດໄດ້ 96%, ຈຸດບ້ານຕະມໍຢອດ ປະຕິບັດໄດ້ 99%, ຈຸດຄຸ້ມດອນບົກ ປະຕິບັດໄດ້ 35% ແລະ ຈຸດບ້ານປິນດົງ ແມ່ນຍັງບໍ່ທັນໄດ້ຈັດຕັ້ງປະຕິບັດ ເນື່ອງຈາກວ່າບໍ່ສາມາດເອົາກົນຈັກເຂົ້າໄປໄດ້ ສະເໜີໃຫ້ບໍລິສັດຜູ້ຮັບຜິດຊອບບຸກເບີກພື້ນທີ່ດັ່ງກ່າວ ຊອກຫາວິທີນຳກົນຈັກເຂົ້າໄປບຸກເບີກ ໃຫ້ໄວເທົ່າທີຄວນ. ພ້ອມດຽວກັນນັ້ນ, ພວມເລັ່ງຍົກຍາຍຜູ້ປະສົບໄພ ອອກຈາກໂຮງຮຽນແຫ່ງຕ່າງໆ ເພື່ອກຽມໄຂສົກຮຽນໃໝ່, ໄປຄຽງຄູ່ກັບການຄຸ້ມຄອງ, ດູແລ ສຸຂະພາບ, ສະໜອງສະບຽງອາຫານ ໃຫ້ຜູ້ປະສົບໄພ ແລະ ອື່ນໆ.