ນາຍົກລັດຖະມົນຕີລົງຕິດຕາມສະພາບນໍ້າຖ້ວມຢູ່ເມືອງທຸລະຄົມ ແຂວງວຽງຈັນ

0
282

ວິທະຍຸແຫ່ງຊາດ ລາຍງານວ່າ: ໃນວັນທີ 6 ກັນຍາ 2018 ນີ້, ທ່ານ ທອງລຸນ ສີສຸລິດ, ນາຍົກລັດຖະມົນຕີ ແລະ ຄະນະ ໄດ້ລົງເຄື່ອນໄຫວຕິດຕາມສະພາບນໍ້າຖ້ວມຢູ່ເມືອງທຸລະຄົມ, ແຂວງວຽງຈັນ. ໃນໂອກາດນີ້, ທ່ານນາຍົກລັດຖະມົນຕີ ໄດ້ຮັບຟັງການລາຍງານຫຍໍ້ກ່ຽວກັບສະພາບນໍ້າຖ້ວມທີ່ເກີດຂຶ້ນຈາກທ່ານ ວິດົງ ໄຊຍະສອນ, ເຈົ້າແຂວງ ແຂວງວຽງຈັນ ໂດຍທ່ານໄດ້ໃຫ້ຮູ້ວ່າ: ຍ້ອນສະພາບຝົນຕົກຫນັກ, ບວກກັບການລະບາຍນໍ້າອອກຈາກເຂື່ອນນໍ້າງື່ມ 1 ຈຶ່ງເຮັດໃຫ້ລະດັບນໍ້າງື່ມທີ່ຢູ່ກ້ອງເຂື່ອນຍຶ່ງຂຶ້ນສູງແລ້ວໄຫລຖ້ວມເຮືອນຊານຂອງປະຊາຊົນທີ່ອາໃສຢູ່ເຂດລຽບຕາມນໍ້າງື່ມຂອງເມືອງ ທຸລະຄົມ ຈຳນວນ 16 ບ້ານ, ໃນນີ້ມີ 11 ບ້ານທີ່ຍັງມີນໍ່າຖ້ວມຂັງ, ກວມເອົາ 2.927 ຄອບຄົວ, ຫຼື ຈຳນວນພົນລະເມືອງທັງຫມົດ 13.758 ຄົນ. ປະຊາຊົນທີ່ໄດ້ຮັບຜົນກະທົບຈຳນວນຫນຶ່ງໄດ້ໄປອາໃສຢູ່ນຳຍາດພີ່ນ້ອງ ແລະ ຢູ່ບ່ອນພັກຊົ່ວຄາວທີ່ຈັດສັນໃຫ້, ເນື້ອທີ່ນາປີ 1.750 ເຮັກຕາ ແລະ ໂຮງຮຽນ 12 ແຫ່ງ ຖືກນໍ້າຖ້ວມ.

ນອກຈາກນີ້, ຍັງມີເນື້ອທີ່ສວນ, ສັດລ້ຽງ, ແລະ ຊັບສິນອື່ນໆ ຖືກນໍ້າຖ້ວມເສຍຫາຍຫລາຍສົມຄວນ. ທ່ານ ທອງລຸນ ສີສຸລິດ ໄດ້ຊີ້ນຳໃຫ້ອົງການປົກຄອງແຂວງ ວຽງຈັນຫລາຍຢ່າງເພື່ອຊ່ວຍເຫລືອປະຊາຊົນທີ່ປະສົບໄພໃນຄັ້ງນີ້ ເປັນຢ່າງດີ, ເປັນຕົ້ນ: ການຍົກຍ້າຍຜູ້ປະສົບໄພໄປໃຫ້ໄປຢູ່ບ່ອນພັກຊົ່ວຄາວທີ່ປອດໄພ, ການຈັດສັນກຳລັງຈາກພາກສ່ວນຕ່າງໆ ພາຍໃນແຂວງ ແລະ ເມືອງ ເພື່ອຊ່ວຍເຫລືອປະຊາຊົນຢ່າງລະອຽດ, ການຊ່ວຍເຫລືອເຄື່ອງອຸປະໂພກ-ບໍລິໂພກ, ການຮັກສາສຸຂະພາບ ແລະ ການປ້ອງກັນການລະບາດຂອງພະຍາດທີ່ອາດຈະເກີດຂຶ້ນຫລັງນໍ້າຖ້ວມຢ່າງຕໍ່ເນື່ອງ.

ທ່ານນາຍົກລັດຖະມົນຕີແລະ ຄະນະ ຍັງໄດ້ໄປພົບປະ ແລະ ໃຫ້ກຳລັງໃຈກັບປະຊາຊົນຜູ້ປະສົບໄພທີ່ບ້ານ ບຸ່ງພ້າວ ຂອງເມືອງທຸລະຄົມ. ນອກຈາກນີ້, ທ່ານຍັງໄດ້ໄປຕິດຕາມເບິ່ງສະພາບການປ່ອຍນໍ້າອອກຈາກເຂື່ອນໄຟຟ້ານໍ່າງື່ມ 1, ໂດຍໄດ້ຮັບຟັງການລາຍງານກ່ຽວກັບສະພາບການຄຸ້ມຄອງບໍລິຫານນໍ້າຢູ່ອ່າງນໍ້າງື່ມ 1 ທີ່ມີນໍ້າຈາກຫລາຍແຫລ່ງໄຫລລົງມາຫາ ເປັນຕົ້ນ: ນໍ້າຈາກເຂື່ອນໄຟຟ້ານໍ້າງື່ມ 2, ນໍ້າງື່ມ 5, ນໍ້າໄຜ່, ນໍ້າຊອງ, ນໍ້າລີກ ແລະ ອື່ນໆ. ເນື່ອງຈາກໃນໄລນະທ້າຍເດືອນກໍລະກົດຜ່ານມານີ້ ມີຝົນຕົກຫນັກ ຈຶ່ງເຮັດໃຫ້ລະດັບນໍ້າໃນອ່າງນໍ້າງື່ມ 1 ເພີ່ມຂຶ້ນຈຳນວນຫລາຍ ເຮັດໃຫ້ທາງເຂື່ອນມີຄວາມຈຳເປັນຕ້ອງໄດ້ປ່ອຍນໍ້າອອກຈາກເຂື່ອນ ແຕ່ວັນທີ 12 ສິງຫາ 2018 ເປັນຕົ້ນມາ, ຈົນມາຮອດຕອນເຊົ້າວັນທີ 6 ກັນຍາ 2018 ນີ້ ປະລິມານນໍ້າທີ່ປ່ອຍຜ່ານປະຕູນໍ້າລົ້ນຂອງເຂື່ອນ ແມ່ນໄດ້ຫລຸດລົງຈາກລະດັບ 4,5 ແມັດໃນວັນທີ 5 ກັນຍາ ຍັງເຫລືອ 3,5 ແມັດ ເຮັດໃຫ້ປະລິມານນໍ້າທີ່ໄຫລອອກຜ່ານປະຕູນໍ້າລົ້ນ ແລະ ກົງຫັນປົກກະຕິຂອງເຂື່ອນແມ່ນ 1.900 ແມັດກ້ອນຕໍ່ ວິນາທີ.

ທ່ານ ທອງລຸນ ສີສຸລິດ ນາຍົກລັດຖະມົນຕີ ຍັງໄດ້ຊີ້ນຳໃຫ້ຄະນະບໍລິຫານເຂື່ອນໄຟຟ້ານໍ້າງື່ມ 1 ຕ້ອງມີການບໍລິຫານຈັດການນໍ້າໃນຫນ້າເຂື່ອນ ທີ່ດີ ແລະ ມີການປະສານກັນລະອຽດກັບການປ່ອຍນໍ້າຂອງເຂື່ອນນໍ້າງື່ມ 2 ທີ່ຢູ່ຕອນເທິງ. ນອກຈາກນີ້, ກໍ່ຕ້ອງມີຄວາມຮັບຜິດຊອບໃນການຕິດຕາມຊ່ວຍເຫລືອ ແລະ ເບິ່ງແຍງປະຊາຊົນທີ່ອາໃສຢູ່ເຂດລຸ່ມເຂື່ອນທີ່ປະສົບໄພນໍ້າຖ້ວມຍ້ອນການປ່ອຍນໍ້າອອກຈາກເຂື່ອນໄຟຟ້ານໍ້າງື່ມ 1 ແລະ ໃນແຕ່ລະປີ ກໍ່ຄວນຈັດສັນງົບປະມານຈຳນວນຫນຶ່ງເພື່ອໃຊ້ຈ່າຍໃນດ້ານນີ້ສະເພາະ ເນື່ອງຈາກການປ່ອຍນໍ້າຈາກເຂຶ່ອນໄຟຟ້ານໍ້າງື່ມ 1 ນອກຈາກຈະສົ່ງຜົນກະທົບຕໍ່ປະຊາຊົນທີ່ອາໃສຢູ່ເຂດລຸ່ມເຂື່ອນລຽບຕາມແຄມນໍ້າງຶ່ມແລ້ວ ຍັງສົ່ງຜົນຕໍ່ລະດັບນໍ້າໃນແມ່ນໍ້າຂອງເຂດພາກກາງຫາພາກໃຕ້ຕື່ມອີກ.

ຂ່າວ;ພາບ: ບຸນຕຽງຈັນທະວົງ