ຈັດພິທີ ປະກາດການຈັດຕັ້ງ ຫ້ອງການສຶກສາທິກາ ແລະ ກິລາ ເມືອງເງິນ

0
222

ໄຊຍະບູລີ: ວັນທີ 6 ກັນຍາ 2018 ນີ້ ຢູ່ທີ ຫ້ອງການສຶກສາທິການ ແລະ ກິລາ ເມືອງເງິນ ແຂວງ ໄຊຍະບູລີ ໄດ້ຈັດພິທີ ປະກາດການຈັດຕັ້ງ ຫ້ອງການສຶກສາທິກາ ແລະ ກິລາ ເມືອງ, ເຂົ້າຮ່ວມເປັນກຽດ ມີ ທ່ານ ສອນສຸກ ພວງແກ້ວ ຮອງເລຂາພັກເມືອງ ຮອງເຈົ້າເມືອງ, ມີຫົວໜ້າຫ້ອງການ, ຂະແໜງການຂອງເມືອງ, ມີຄະນະຫ້ອງການສຶກສາ, ອຳນວຍການໂຮງຮຽນ ມັດທະຍົມ, ປະຖົມ, ອານຸບານທາງພາກລັດ ແລະ ເອກະຊົນ ເຂົ້າຮ່ວມ.

ທ່ານ ຄຳມ່ວນ ພົມປັນຍາ ຮອງຫົວໜ້າຄະນະຈັດຕັ້ງເມືອງ ໄດ້ຂື້ນຜ່ານຂໍ້ຕົກລົງຂອງທ່ານເຈົ້າເມືອງ ວ່າດ້ວຍການແຕ່ງຕັ້ງ ຮອງຫົວໜ້າຫ້ອງການ ສຶກສາທິການ ແລະ ກິລາ. ອິງຕາມກົດໝາຍປົກຄອງທ້ອງຖີ່ນແຫ່ງ ສປປ ລາວ ພາກທີ 4 ໝວດ4, ມາດຕາ 40 ວ່າດ້ວຍສິດ ແລະ ໜ້າທີ່ ຂອງທ່ານເຈົ້າເມືອງ ແລະ ໜັງສືແຈ້ງຕອບຂອງພະແນກສຶກສາທິການ ແລະ ກິລາແຂວງໄຊຍະບູລີ. ສະບັບເລກທີ 2763/ສກຂ ຊຍ ລົງວັນທີ່ 24 ສິງຫາ 2018 ເລື່ອງການແຕ່ງຕັ້ງຮອງຫົວໜ້າສຶກສາທິການ ແລະ ກິລາເມືອງເງິນ.

ມາດຕາ 1 ແຕ່ງຕັ້ງ ທ່ານ ບຸນລົດ ສີຖາວອນ ອຳນວຍການໂຮງຮຽນ ມສ ນ້ຳເງິນ ຂື້ນມາເປັນຮອງຫົວໜ້າຫ້ອງການສຶກສາທິການ ແລະ ກິລາ, ແຕ່ງຕັ້ງ ທ່ານ ນາງ ທອງມາ ໄຊຊະນະ ຮອງອຳນວຍການໂຮງຮຽນ ມສ ນ້ຳເງິນ ຂື້ນມາເປັນ ອຳນວຍການໂຮງຮຽນ ມສ ນ້ຳເງິນ,ແຕ່ງຕັ້ງ ທ່ານ ດ້ວງ ຈັນທະລົດ ວິຊາການໂຮງຮຽນ ມສ ເມືອງ ຂື້ນມາເປັນຮອງອຳນວຍການໂຮງຮຽນ ມສ ບ້ານທອງ, ແຕ່ງຕັ້ງ ທ່ານ ນາງ ສົມຈັນ ພົມມະຈັນ ເປັນຫົວໜ້າໜ່ວຍງານ ການສຶກສາກ່ອນໄວຮຽນ.

ຕອນທ້າຍ ທ່ານ ສອນສຸກ ພວງແກ້ວ ຮອງເລຂາພັກເມືອງ ຮອງເຈົ້າເມືອງ ໄດ້ເໜັ້ນໜັກ ໃຫ້ຜູ້ທີ່ມາຮັບໜ້າທີໃໝ່ ໃຫ້ເອົາໃຈໃສ່ ຝຶກຝົນຫຼໍ່ຫຼອມຕົນເອງໃຫ້ມີຄວາມກ້າວໜ້າ, ຫ້າວຫັນຕໍ່ໜ້າທີ ວຽກງານ, ມີຄວາມຕັດສິນໃຈສູງ, ມີຄວາມອົດທົນ, ມີນ້ຳໃຈເສຍສະຫຼະ, ເປັນແບບຢ່າງທີດີ ມີທັດສະນະມະຫາຊົນກ້ວາງຂວາງ, ມີຄວາມສາມັກຄີກັນຢ່າງແໜ້ນແຟ້ນ, ມີແບບແຜນວິທີເຮັດວຽກ ແບບລວມສູນ ແບ່ງໃຫ້ບຸກຄົນຮັບຜິດຊອບ, ມີແຜນການ, ແຜນງານ, ຫັນເປັນໂຄງການລະອຽດ ເພື່ອພ້ອມກັນພັດທະນາ ການສຶກສາ ຢູ່ເມືອງເງິນໃຫ້ມີທ່ວງທ່າດີຂື້ນ ເປັນກ້າວໆ.

ໂດຍ: ສຸລິຍາ ແສງເດືອນ