ເສົາຫຼັກເມືອງມິ່ງຂັວນຊາວ ແຂວງເຊກອງ ທີ່ໜ້າຢ້ຽມຊົມ ແລະ ສັກກາລະບູຊາ

0
302

ເສົາຫຼັກເມືອງເປັນມິ່ງຂັວນຊາວ ແຂວງເຊກອງ ເປັນອີກໜຶ່ງສະຖານທີ່ທ່ອງທ່ຽວທາງວັດທະນະທໍາ ຕິດພັນກັບປະຫວັດສາດ ແລະຮີດຄອງປະເພນີອັນດີງາມທີ່ຍັງຄົງຮັກສາໄວ້ຢ່າງໜ້າປະທັບໃຈທີ່ໜ້າທ່ຽວຊົມ ແລະກາບໄຫວ້ສັກກາລະບູຊາຂໍພອນຕ່າງໆ ເນື່ອງຈາກວ່າເສົາຫຼັກເມືອງເປັນສູນລວມທາງດ້ານຈິດໃຈທີ່ປະຊາຊົນບັນດາເຜົ່າເຄົາລົບນັບຖື ນອກນີ້ຍັງເປັນຕົວແທນບົ່ງບອກເຖິງຈຸດທີ່ຕັ້ງຂອງຕົວເມືອງເປັນເອກະລັກສະເພາະທີ່ພົ້ນເດັ່ນຂອງທ້ອງຖິ່ນ ທັງເປັນຕົວແທນຂອງຄວາມເຊື່ອ ແລະໄຊຊະນະນໍາອີກດ້ວຍ.


ເສົາຫຼັກເມືອງເມືອງລະມາມ ແຂວງເຊກອງ ຕັ້ງຢູ່ບ້ານໃໝ່ຫົວເມືອງ ເມືອງລະມາມ ແຂວງເຊກອງ ຊຶ່ງເປັນຈຸດສາມແຍກທໍາອິດກ່ອນຈະເຂົ້າສູ່ເທລະບານແຂວງເຊກອງ ເປັນຈຸດທີ່ມີຄວາມສູງເດັ່ນສະຫງ່າ ແລະປິ່ນໜ້າໄປທາງທິດເໜືອ ຊຶ່ງເປັນທິດຫຼັກຂອງ 4 ທິດ ( ທິດດາວພະສຸກ ) ໃນນັ້ນເພິ່ນໄດ້ສັງລວມເອົາວັດທະນະທໍາຂອງຊາວແຂວງເຊກອງ ສະຫຼັກໄວ້ໃນຫຼັກເມືອງເພື່ອອະທິບາຍເຖິງປະຫວັດຄວາມສໍາຄັນຂອງວິຖີຊີວິດແບບດັ້ງເດີມຂອງປະຊາຊົນໃຫ້ຍັງຄົງຢູ່ຕະຫຼອດໄປຈົນຮອດຊົ່ວລູກຊົ່ວຫຼານ. ທີ່ສໍາຄັນໄປກວ່ານັ້ນເມື່ອຮອດມື້ຂຶ້ນ 13-15 ຄໍ່າເດືອນ ຍີ່ ຂອງທຸກໆປີ ປະຊາຊົນຊາວແຂວງເຊກອງຈະໄດ້ເຮັດກິດຈະກໍາຮ່ວມກັນນັ້ນກໍຄືຈັດງານບຸນປະເພນີເພື່ອສັກກາລະບູຊາຜູ້ຮັກສາບ້ານເມືອງໃຫ້ປົກປັກຮັກສາຊາວເມືອງໃຫ້ຢູ່ດີມີສຸກປັດເປົ່າສິ່ງບໍ່ດີອອກໄປ ສະນັ້ນຊາວແຂວງເຊກອງ ຈຶ່ງຖືເອົາຫຼັກເມືອງເປັນສູນລວມທາງດ້ານຈິດໃຈ ແລະເປັນສິ່ງສັກກາລະບູຊາຂອງປະຊາຊົນບັນດາເຜົ່າຈົນກາຍເປັນປະເພນີສືບທອດກັນຕະຫຼອດໄປ.


ຢ່າງໃດກໍຕາມສໍາລັບບັນດານັກທ່ອງທ່ຽວທັງພາຍໃນ ແລະຕ່າງປະເທດທ່ານໃດຫາກມີໂອກາດເດີນທາງໄປເມືອງລະມາມ ແຂວງເຊກອງ ກໍຢ່າລືມແວ່າທ່ຽວຊົມ, ຢ້ຽມຢາມ ແລະສັກກາລະບູຊາເສົາຫຼັກເມືອງທີ່ມີເອກະລັກໂດດເດັ່ນ, ຕິດພັນກັບປະຫວັດສາດ, ທໍາມະຊາດ ແລະຮີດຄອງປະເພນີລາວກໍຄືປະເພນີບັນດາເຜົ່າຂອງປະຊາຊົນຊາວເມືອງລະມາມ ແຂວງເຊກອງ ແລະຖ້າຫາກທ່ານໃດມີຄວາມສົນໃຈໃນການທ່ອງທ່ຽວທາງວັດທະນະທໍາທີ່ຕິດພັນກັບປະຫວັດສາດ ແລະຮີດຄອງປະເພນີກໍສາມາດໄປສໍາຜັດໄດ້ນະສະຖານທີ່ແຫ່ງນີ້.

ໂດຍ: ນາລີວັນ