ທ່ານ ປະທານແນວລາວສ້າງຊາດແຂວງໄຊຍະບູລີ ລົງຊຸກຍູ້, ຕິດຕາມ, ກວດກາ ວຽກງານ ແນວລາວສ້າງຊາດຢູ່ເມືອງເງິນ

ໄຊຍະບູລີ: ວັນທີ 12 ກັນຍາ 2018 ນີ້ ຢູ່ທີສະໂມສອນເມືອງເງິນ ແຂວງ ໄຊຍະບູລີ ທ່ານ ຄຳສຸກ ທໍ ຮອງເລຂາພັກແຂວງ, ກຳມະການສູນກາງແນວລາວສ້າງຊາດ, ປະທານແນວລາວສ້າງຊາດ ແຂວງ ໄຊຍະບູລີ ພ້ອມດ້ວຍຄະນະ ໄດ້ລົງຊຸກຍູ້, ຕິດຕາມ, ກວດກາ ວຽກງານ ແນວລາວສ້າງຊາດຢູ່ເມືອງເງິນ, ໃຫ້ກຽດຕ້ອນຮັບອັນອົບອຸ່ນ ໂດຍແມ່ນ ທ່ານ ສອນສຸກ ພວງແກ້ວ ຮອງເລຂາພັກເມືອງ ຮອງເຈົ້າເມືອງ ຕະຫຼອດຮອດ ຄະນະກຳມະການແນວລາວສ້າງຊາດເມືອງ-ບ້ານ ເຂົ້າຮ່ວມ.


ທ່ານ ໜານອົ້ນ ໄຈແກ້ວ ຮອງປະທານແນວລາວສ້າງຊາດເມືອງ ໄດ້ລາຍງານສະພາບການຈັດຕັ້ງປະຕິບັດວຽກງານ ແນວລາວສ້າງຊາດ ໂດຍສະເພາະ ແມ່ນການນຳພາ ສ້າງຄອບຄົວ ແລະ ບ້ານ ສາມັກຄີປອງດອງ ໂດຍຫຍໍ້: ເມືອງເງິນ ປະກອບມີ 22 ບ້ານ, ມີ 3 477 ຄອບຄົວ, ມີພົນລະເມືອງທັງໝົດ 18.550 ຄົນ, ຍິງ 9.261 ຄົນ, ມີ 8 ເຜົ່າ, ສ່ວນຫຼາຍແມ່ນເຜົ່າລື້. ໄລຍະຜ່ານມາ ແນວລາວສ້າງຊາດໄດ້ຖືເອົາວຽກງານສຶກສາອົບຮົມການເມືອງແນວຄິດເປັນກົກ ໃຫ້ແກ່ຄະນະກຳມະການແນວລາວສ້າງຊາດ ຕະຫຼອດຮອດພໍ່ແມ່ປະຊາຊົນບັນດາເຜົ່າ ສະແດງອອກ ໄດ້ສຳເລັດການປັບປຸງກົງຈັກການຈັດຕັ້ງ ແນວລາວສ້າງຊາດຂັ້ນບ້ານ, ດຳເນີນກອງປະຊຸມໃຫຍ່ແນວລາວສ້າງຊາດບ້ານ ໄດ້ 21 ບ້ານ, ຈັດຝຶກອົບຮົມພຣະສົງ ໄດ້ 1 ຄັ້ງ, ສົມທົບກັບອົງການພຸດທະນສາສະໜາປະຈຳແຂວງ ໄຊຍະບູລີ ລົງເຜີຍແຜ່ສິລະທຳໃຫ້ນັກຮຽນ ໄດ້ 2 ຄັ້ງມີຜູ້ເຂົ້າຮ່ວມ 436 ນ້ອງ, ຍິງ 232 ນ້ອງ.

ຂະບວນການສ້າງຄອບຄົວ ແລະ ບ້ານ ສາມັກຄີປອງດອງ ແມ່ນເປັນຂະບວນຟົດຟື່ນ ມາຮອດປະຈຸບັນ ມີຄອບຄົວທີຮັບຮອງເປັນຄອບຄົວສາມັກຄີປອງດອງ 3,148 ຄອບຄົວ, ເທົ່າກັບ 90,53 %, ບ້ານທີ່ໄດ້ຮັບເປັນບ້ານສາມັກຄີປອງດອງແລ້ວ 19 ບ້ານ.
ຕອນທ້າຍ ທ່ານປະທານແນວລາວສ້າງຊາດແຂວງໄຊຍະບູລີ ໄດ້ໂອ້ລົມ ທ່ານໄດ້ເໜັ້ນໜັກໃຫ້ບັນດາຄະນະກຳມະການແນວລາວສ້າງຊາດ ເອົາໃຈໃສ່ການສຶກສາອົບຮົມການເມືອງແນວຄິດ ໃຫ້ເປັນປົກກະຕິຕໍ່ເນືອງ, ສຶບຕໍ່ ບຳລຸງສິດ ແລະ ໜ້າທີ ຂອງແນວລາວສ້າງຊາດ, ແລະ ພ້ອມກັນກະກຽມເງື່ອນໄຂຄວາມພ້ອມດ້ານຕ່າງໆ ເພື່ອກະກຽມ ຈັດພິທີ ປະກາດເມືອງເງິນ ເປັນເມືອງລິເລີ້ມ ນຳພາຈັດຕັ້ງປະຕິບັດ ຂະບວນການສ້າງຄອບຄົວ ແລະ ບ້ານ ສາມັກຄີປອງດອງ ເມືອງທຳອິດຂອງແຂວງໄຊຍະບູລີ.


ຂ່າວ+ພາບໂດຍ: ອິນແປງ ແຫວນຄໍາ(ຖວທ ເມືອງເງິນ)