ກຽມຕົວ! 6 ແຂວງ ຮັບມືພາຍຸ ມັງຄຸດ 19-20/9/2018

0
479

ແຂວງຜົ້ງສາລີ, ຊຽງຂວາງ, ຫົວພັນ, ໄຊສົມບູນ, ແຂວງວຽງຈັນ ແລະບໍລິຄຳໄຊ ກຽມພ້ອມຮັບມືພະຍຸມັງຄຸດທີ່ກຳລັງເຄື່ອນຕົວ ຈາກຟີລິບປິນເຂົ້າເຂດແດນລາວປະມານວັນທີ 19 ຫາ 20 ກັນຍານີ້.

ຕາມແຈ້ງການຈາກກົມອຸຕຸນິຍົມ ແລະອຸທົກກະສາດໃນເຊົ້າມື້ນີ້(16 ກັນຍາ 2018) ໃຫ້ຮູ້ວ່າ: ຮ່ອງຄວາມກົດດັນອາກາດຕ່ຳໄດ້ພາດຜ່ານພາກກາງ ແລະພາກໃຕ້ຂອງປະເທດລາວ ສົມທົບກັບລົມມໍລະສຸມຕາເວັນຕົກສ່ຽງໃຕ້ພັດປົກຄຸມເປັນສ່ວນໃຫຍ່ , ສ່ວນລົມພາຍຸໄຕ້ຝຸ່ນມັງຄຸດຫົວທີ 22ໃນເວລາ 07:00 ໂມງຂອງວັນທີ 18 ກັນຍາ 2018 ມີຈຸດສູນກາງຕັ້ງຢູ່ບໍລິເວນທະເລຈີນໃຕ້ ຢູ່ເສັ້ນຂະໜານທີ 20,6 ອົງສາເໜືອ ແລະເສັ້ນແວງທີ 115,3 ອົງສາຕາເວັນອອກ.

ຊຶ່ງລັດສະໝີຂອງພາຍຸຫົວນີ້ຈະກວມເອົາຢູ່ບັນດາແຂວງພາກເໜືອຂອງປະເທດລາວ ສົມທົບກັບລົມມໍລະສຸມຕາເວັນຕົກສ່ຽງໃຕ້ມີກຳລັງແຮງພັດປົກຄຸມຈະເຮັດໃຫ້ມີຝົນຕົກໃນລະດັບຄ່ອຍຢູ່ເກືອບທົ່ວໄປ ແລະຕົກປານກາງຫາໜັກຢູ່ບາງທ້ອງຖິ່ນດັ່ງລຸ່ມນີ້: ແຂວງພາກເໜືອດ້ານຕາເວັນອອກ ຜົ້ງສາລີ, ຊຽງຂວາງ ແລະແຂວງຫົວພັນ, ພາກກາງມີແຂວງໄຊສົມບູນ, ແຂວງວຽງຈັນ ແລະບໍລິຄຳໄຊ.

ດັ່ງນັ້ນ, ຈິ່ງແຈ້ງເຕືອນເຖິງປະຊາຊົນບັນດາເຜົ່າ ແລະອຳນາດການປົກຄອງທຸກພາກສ່ວນທີ່ອາໄສຢູ່ພາກເໜືອ ແລະພາກກາງຈົ່ງມີສະຕິ ກຽໝພ້ອມຮັບມືກັບສະພາບລົມແຮງ. ຝົນຕົກໜັກ, ຟ້າຮ້ອງຟ້າເຫຼື້ອມ ທີ່ອາດເຮັດໃຫ້ເກີດມີດີນເຈື່ອນ ແລະນ້ຳຖ້ວມຊຸໄດ້.