ກອງປະຊຸມເຜີຍແຜ່ຜົນສໍາເລັດກອງປະຊູມຄັ້ງທີ 40 ຂອງສອງລັດຖະບານ ລາວ ແລະ ຫວຽດນາມ ປະຈໍາປີ 2018

0
463

 

ກອງປະຊຸມເຜີຍແຜ່ຜົນສໍາເລັດກອງປະຊູມຄັ້ງທີ 40 ຂອງສອງລັດຖະບານ ລາວ ແລະ ຫວຽດນາມ ປະຈໍາປີ 2018 ແລະ ແນະນໍາການສະຫລຸບກາງສະໄໝການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 5 ປີ ຄັ້ງທີ VIII (2016-2020) ທີ່ຫ້ອງວ່າການປົກຄອງແຂວງ ຫຼວງພະບາງ, ວັນທີ 27 ເສມາ 2018

ໃນວັນທີ 27 ເມສາ 2018 ທີ່ຫ້ອງວ່າການປົກຄອງແຂວງຫຼວງພະບາງ, ກະຊວງແຜນການ ແລະ ການລົງທຶນ, ຄະນະກໍາມະການຮ່ວມມື ລາວ-ຫວຽດນາມ ໄດ້ສົມທົບກັບແຂວງຫຼວງພະບາງ ຈັດກອງປະຊຸມເຜີຍແຜ່ຜົນສໍາເລັດກອງປະຊູມຄັ້ງທີ 40 ຂອງສອງລັດຖະບານ ລາວ ແລະ ຫວຽດນາມ ປະຈໍາປີ 2018 ແລະ ແນະນໍາການສະຫລຸບກາງສະໄໝການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 5 ປີ ຄັ້ງທີ VIII (2016-2020) ໂດຍ ທ່ານ ປອ. ສຸພັນ ແກ້ວມີໄຊ, ກໍາມະການສູນກາງພັກ, ລັດຖະມົນຕີ ກະຊວງແຜນການ ແລະ ການລົງທຶນ, ປະທານຄະນະກໍາມະການຮ່ວມມື ລາວ-ຫວຽດນາມ ແລະ ໄດ້ໃຫ້ກຽດກ່າວຕ້ອນຮັບກອງປະຊຸມ ໂດຍ ທ່ານ ປອ.ບົວຄົງ ນາມມະວົງ, ກໍາມະການສໍາຮອງສູນກາງພັກ, ຮອງເລຂາພັກແຂວງ, ຮອງເຈົ້າແຂວງໆ ຫຼວງພະບາງ. ກອງປະຊຸມດັ່ງກ່າວ ມີຄະນະຜູ້ແທນຈາກ 10 ແຂວງພາກເໜືອ ແລະ ນະຄອນຫຼວງວຽງຈັນ, ສະພາປະຊາຊົນແຂວງ, ພະແນກການຕ່າງໆອ້ອມຂ້າງແຂວງ ຫຼວງພະບາງ ພ້ອມດ້ວຍພາກສ່ວນທີ່ກ່ຽວຂ້ອງ ເຂົ້າຮ່ວມ ລວມປະມານ 80 ກວ່າທ່ານ.

ກອງປະຊຸມ ໄດ້ຮັບຟັງການເຜີຍແຜ່ເຖິງຜົນສໍາເລັດຂອງກອງປະຊຸມຄັ້ງທີ 40 ລະຫວ່າງ ສອງລັດຖະບານ ລາວ ແລະ ຫວຽດນາມ ປະຈໍາປີ 2018 ແລະ ແນະນໍາ ກ່ຽວກັບການສະຫລຸບກາງສະໄໝການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 5 ປີ ຄັ້ງທີ VIII (2016-2020). ຜູ້ເຂົ້າຮ່ວມກອງປະຊຸມ ໄດ້ຮັບຟັງການລາຍງານສະພາບການຈັດຕັ້ງປະຕິບັດວຽກງານຮ່ວມມື ລາວ-ຫວຽດນາມ ໄລຍະຜ່ານມາ ແລະ ທິດທາງແຜນການຮ່ວມມືໃນຕໍ່ໜ້າ ຂອງບັນດາແຂວງພາກ ເໜືອ ແລະ ນະຄອນຫຼວງວຽງຈັນຂອງລາວ ກັບບັນດາແຂວງ, ນະຄອນຂອງຫວຽດນາມ.

ກອງປະຊຸມ ໄດ້ປຶກສາຫາລືແລກປ່ຽນຄໍາຄິດຄໍາເຫັນ ກ່ຽວກັບ ການຈັດຕັ້ງຜັນຂະຫຍາຍເນື້ອໃນຂໍ້ຕົກລົງ ລະຫວ່າງ ສອງພັກ, ສອງລັດ ກໍ່ຄືແຜນການຮ່ວມມື ລະຫວ່າງ ສອງລັດລັດຖະບານ ລາວ ແລະ ຫວຽດນາມ ໃນແຕ່ລະໄລຍະ ໃຫ້ມີປະສິດທິຜົນຕົວຈິງ ເຊິ່ງປະຈຸບັນ ເຫັນວ່າການຮ່ວມມືກັນພັດທະນາໂຄງການເຂື່ອນໄຟຟ້ານໍ້າຂອງຈຸດຫຼວງພະບາງ, ການພັດທະນາທ່າເຮືອຫວຸງອາງ 1, 2 ແລະ 3, ສອງເສັ້ນທາງຢູ່ແຂວງໄຊສົມບູນ…ແມ່ນລ້ວນແຕ່ເປັນບັນດາໂຄງການທີ່ນໍາເອົາຜົນປະໂຫຍດຕົວຈິງມາສູ່ປະຊາຊົນສອງປະເທດ ເຊິ່ງຕ້ອງໄດ້ເອົາໃຈໃສ່ຊຸກຍູ້ໃນການຈັດຕັ້ງປະຕິບັດໂຄງການດັ່ງກ່າວ ໃຫ້ມີການພັດທະນາ ໂດຍໄວ ເພື່ອໃຫ້ເກີດຜົນປະໂຫຍດໃນການພັດທະນາຂອງທ້ອງຖິ່ນ.

ພ້ອມກັນນັ້ນ, ກອງປະຊູມ ກໍຍັງໄດ້ຮັບຟັງຄໍາເຫັນຊີ້ນໍາຈາກ ທ່ານ ລັດຖະມົນຕີ, ປະທານ ຄະນະກໍາມະການຮ່ວມມື ລາວ-ຫວຽດນາມ ໂດຍໄດ້ເນັ້ນໃຫ້ເຫັນເຖິງຄວາມໝາຍຄວາມສໍາຄັນຂອງການຮ່ວມມືທີ່ມີມາແຕ່ດຶກດໍາບັນ ລະຫວ່າງ ສອງປະເທດ ແລະໄດ້ສະເໜີໃຫ້ບັນດາແຂວງ ສືບຕໍ່ສຸມໃສ່ຈັດຕັ້ງຜັນຂະຫຍາຍແຜນການຮ່ວມມື ລະຫວ່າງ ສອງລັດຖະບານ ລາວ ແລະ ຫວຽດນາມ ປະຈໍາປີ 2018 ທີ່ສອງລັດຖະບານ ໄດ້ຕົກລົງກັນແລ້ວ ໃຫ້ເປັນຮູບປະທໍາ ບົນພື້ນຖານແຜນພັດທະນາເສດຖະກິດ-ສັງຄົມ ໃນແຕ່ລະໄລຍະ ແລະ ນໍາເອົາຜົນປະໂຫຍດຕົວຈິງມາສູ່ປະຊາຊົນ, ປະກອບສ່ວນເສີມຂະຫຍາຍສາຍພົວພັນມິດຕະພາບ ທີ່ເປັນມູນເຊື້ອ, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ໃຫ້ເປັນມໍລະດົກອັນລໍ້າຄ່າຕົກທອດຮອດເຊັ່ນລູກຫຼານຕໍ່ໄປ.

ນອກນັ້ນ, ທ່ານ ລັດຖະມົນຕີກະຊວງແຜນການ ແລະ ການລົງທຶນ ໄດ້ເນັ້ນໃຫ້ບັນດາແຂວງເອົາໃຈໃສ່ໃນການສະຫຼຸບຕີລາຄາກາງສະໄໝການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 5 ປີ ຄັ້ງທີ VIII (2016-2020) ຢ່າງພາວະວິໄສ ເພື່ອໃຫ້ເຫັນໄດ້ຄວາມຄືບໜ້າ, ຈຸດດີ, ຈຸດອ່ອນ ແລະ ຂໍ້ຄົງຄ້າງໃນການຈັດຕັ້ງປະຕິບັດແຜນໃນໄລຍະ 2 ປີເຄິ່ງຜ່ານມາ ພ້ອມທັງເຫັນໄດ້ສາຍເຫດທີ່ແທ້ຈິງ ເພື່ອຄົ້ນຄ້ວາ ແລະ ກໍານົດທິດທາງ, ວິທີການ ແລະ ມາດຕະການຈັດຕັ້ງປະຕິບັດແຜນ 5 ປີໃນໄລຍະທ້າຍສະໄໝ ໃຫ້ສໍາເລັດຕາມແຜນທີ່ໄດ້ກໍານົດໄວ້ ເພື່ອປະກອບສ່ວນພັດທະນາປະເທດ ໃຫ້ຫຼຸດພົ້ນອອກຈາກສະຖານະພາບຄວາມດ້ອຍພັດທະ ນາ ໃນປີ 2020 ແລະ ປະຕິບັດເປົ້າໝາຍການພັດທະນາແບບຍືນຍົງ (2016-2030) ໃຫ້ມີໝາກຜົນຢ່າງແທ້ຈິງ ທັງເປັນບ່ອນອີງໃຫ້ແກ່ການຄົ້ນຄວ້າ ແລະ ກະກຽມສ້າງແຜນພັດທະນາເສດຖະກິດ-ສັງຄົມ 5 ປີ ຄັ້ງທີ IX (2021-2025) ໃຫ້ສອດຄ່ອງກັບສະພາບຕົວຈິງ ແລະ ທັນກໍານົດເວລາ. ທ່ານ ຍັງໄດ້ເນັ້ນໜັກຕື່ມ ກ່ຽວກັບການສະຫຼຸບຂາດຕົວການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ປະຈໍາປີ 2017 ຢ່າງພາວະວິໄສ, ການກະກຽມສະຫຼຸບຕີລາຄາ 6 ເດືອນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ປະຈໍາປີ 2018 ແລະ ຄາດຄະເນການຈັດຕັ້ງປະຕິບັດໝົດປີ 2018. ພ້ອມນັ້ນ, ທ່ານ ກໍ່ໄດ້ເນັ້ນໜັກຄວາມສໍາຄັນຂອງການຮີບດ່ວນຄົ້ນຄວ້າກະກຽມສ້າງແຜນພັດທະນາເສດຖະກິດ-ສັງຄົມ ແລະ ແຜນການລົງທຶນຂອງລັດ ປະຈໍາປີ 2019 ໃຫ້ສອດຄ່ອງກັບສະພາບຕົວຈິງ,ທັນກໍານົດເວລາ ແລະ ສາມາດຈັດຕັ້ງປະຕິບັດຢ່າງມີປະສິດທິຜົນສູງ.

ກອງປະຊຸມຄັ້ງນີ້ ໄດ້ດໍາເນີນໄປດ້ວຍບັນຍາກາດອັນອົບອູ່ນ, ປະສົບຜົນສໍາເລັດຢ່າງຈົບງາມ ແລະ ໄດ້ປິດລົງເວລາ 16:30 ໂມງຂອງວັນດຽວກັນ.

ຂ່າວ-ພາບ: ສນຍ