ສຳມະນາວິທະຍາສາດລະດັບຊາດວ່າດ້ວຍການຄຸ້ມຄອງ, ການນໍາໃຊ້ ແລະ ການພັດທະນາສື່ໃນໄລຍະໃໝ່

0
151

ນະຄອນຫຼວງວຽງຈັນ: ໃນລະຫວ່າງວັນທີ 24-25 ກັນຍາ 2018, ທີ່ຄະນະໂຄສະນາອົບຮົມສູນກາງພັກ, ນະຄອນຫຼວງວຽງຈັນ, ຄະນະໂຄສະນາອົບຮົມສູນກາງພັກ ຮ່ວມກັບ ກະຊວງ ຖະແຫລງຂ່າວ, ວັດທະນະທຳ ແລະ ທ່ອງທ່ຽວ ແລະ ກະຊວງ ໄປສະນີ, ໂທລະຄົມມະນາຄົມ ແລະ ການສື່ສານ ຈັດກອງປະຊຸມສຳມະນາວິທະຍາສາດ ພາຍໃຕ້ຫົວຂໍ້ “ການ ຄຸ້ມຄອງ, ການນຳໃຊ້ ແລະ ການພັດທະນາສື່ໃນໄລຍະໃໝ່” ຂຶ້ນ ເພື່ອແນໃສ່ປັບປຸງສື່ມວນຊົນລາວໃຫ້ມີການຫັນປ່ຽນທີ່ດີຂຶ້ນ ນັບທັງທາງດ້ານການຈັດຕັ້ງ, ການແບ່ງໜ້າທີ່ຄວາມຮັບຜິດຊອບຊີ້ນຳນຳພາ, ການຄຸ້ມຄອງ ແລະ ການພັດທະນາສື ເວົ້າລວມ, ເວົ້າສະເພາະ ກໍ່ຄື ສື່ມວນຊົນຂອງພັກ-ລັດ ແລະ ສື່ສັງຄົມທົ່ວໄປໃຫ້ເຄື່ອນໄຫວຖືກຕ້ອງຕາມແນວທາງນະໂຍບາຍຂອງພັກ ແລະ ລະບຽບກົດໝາຍຂອງລັດ, ປະກອບສ່ວນຢ່າງຕັ້ງໜ້າເຂົ້າໃນການສຶກສາອົບຮົມທົ່ວປວງຊົນ, ທັງເປັນເວທີແຫ່ງການແລກປ່ຽນຄຳຄິດຄຳເຫັນຂອງມະຫາຊົນຢ່າງກ້ວາງຂວາງ, ພັດທະນາເທື່ອລະກ້າວ ແລະ ທັນກັບຄວາມກ້າວໜ້າຂອງຍຸກສະໄໝ.

ໃນກອງປະຊຸມຄັ້ງນີ້, ບັນດາຜູ້ເຂົ້າຮ່ວມຈະໄດ້ຮັບຟັງການສະເໜີຫລາຍຫົວຂໍ້ສຳຄັນ ເປັນຕົ້ນ: ການສັງເກດ, ແລະການຕີລາຄາການເຄື່ອນໄຫວຜ່ານມາ ແລະ ທິດທາງໜ້າທີ່ການເຄື່ອນໄຫວຂອງສື່ມວນຊົນໃນສະເພາະໜ້າ ແລະ ຍາວນານ, ທັດສະນະຂອງພັກຕໍ່ກັບສື່ມວນຊົນໃນໄລຍະໃໝ່, ການມີສ່ວນຮ່ວມຂອງສູນອິນເຕີເນັດຕໍ່ການຄຸ້ມຄອງ, ການນຳໃຊ້ ແລະ ການພັດທະນາ ສື່ໃນໄລຍະໃໝ່, ການຄຸ້ມຄງສື່ໃນໄລຍະໃໝ່, ຄວາມຈົງໃຈ ຫລື ຍຸດທະສາດຂອງສື່ຕາເວັນຕົກໃນການມ້າງເພທຳລາຍລະບອບສັງຄົມ ແລະ ປະເທດລາວ, ການຄຸ້ມຄອງ, ການຕອບຕ້ານ ແລະ ການແກ້ໄຂປະກົດການຫຍໍ້ທໍ້ໃນສື່ສັງຄົມໃນ ໄລຍະໃໝ່ ແລະ ຫົວຂໍ້ສຳຄັນອື່ນໆອີກ.

ນອກຈາກນີ້ ບັນດາຜູ້ເຂົ້າຮ່ວມຍັງຈະໄດ້ປຶກສາຫາລື ແລະ ແລກປ່ຽນຄວາມຄິດຄວາມເຫັນລະຫວ່າງກັນໃນຫລາຍບັນຫາ ເພື່ອແນໃສ່ຄຸ້ມຄອງ, ນຳໃຊ້ ແລະ ພັດທະນາສື່ໃນໄລຍະໃໝ່ໃຫ້ນັບມື້ດີຂຶ້ນກ່ວາເກົ່າ. ທ່ານ ກິແກ້ວ ໄຂຄຳພິທູນ, ຫົວໜ້າຄະນະໂຄສະນາອົບຮົມສູນກາງພັກ ກ່າວໄຂກອງປະຊຸມຄັ້ງນີ້ ວ່າ: ປັດຈຸບັນ ເຖີງວ່າສື່ມວນຊົນລາວຈະມີການພັດທະນາປ່ຽນແປງຢ່າງໃຫຍ່ຫລວງ ແລະ ກ້າວກະໂດດຂັ້ນ ຊຶ່ງປະກອບສ່ວນຢ່າງສຳຄັນ ເຂົ້າໃນພາລະກິດສ້າງສາ ແລະ ພັດທະນາປະເທດຊາດ, ແຕ່ສື່ມວນຊົນລາວຍັງມີອີກຫລາຍດ້ານທີ່ເປັນຂໍ້ຈຳກັດ ແລະ ບໍ່ທັນ ກັບສະພາບຄວາມຮຽກ ຮ້ອງຕ້ອງການຕົວຈິງໃນພາລະກິດຂອງພັກເຮົາ. ສື່ອອນລາຍທີ່ສັງຄົມໃຫ້ຄວາມນິຍົມຫລາຍ ມີທັງທາງບວກ ແລະ ທາງລົບນັ້ນ, ໄດ້ກະທົບຢ່າງແຂງແຮງໃສ່ກະແສແນວຄິດ ກໍ່ຄື ການເຄື່ອນໄຫວປະຕິບັດໜ້າທີ່ການເມືອງຂອງທົ່ວປວງຊົນ;

ດັ່ງນັ້ນ, ກົມການເມືອງສູນກາງພັກຈິ່ງໄດ້ມອບໃຫ້ຄະນະໂຄສະນາອົບຮົມສູນກາງພັກເປັນໃຈກາງຄົ້ນຄ້ວາຊອກຫາວິທີການປັບປຸງວຽກງານສື່ມວນຊົນລາວໃຫ້ມີຄຸນນະພາບໃໝ່ ແລະ ທັນກັບຄວາມ ຮຽກຮ້ອງຕ້ອງການ ຂອງໜ້າທີ່ການເມືອງໃນໄລຍະໃໝ່. ທຸກບັນຫາທີ່ກອງປະຊຸມນຳມາຄົ້ນຄ້ວາໃນຄັ້ງນີ້ຈະຖືກນຳໄປສະເໜີຕໍ່ກົມການ ເມືອງສູນກາງພັກເພື່ອໃຫ້ທິດຊີ້ນຳຢ່າງທັນການ ແລະ ຖືກຕ້ອງຕໍ່ວຽກງານສື່ມວນຊົນໃນຕໍ່ໜ້າ.

ມາຮອດປັດຈຸບັນ, ສື່ມວນຊົນລາວມີຄົບທຸກປະເພດ ມີທັງສື່ແບບດັ້ງເດີມ ແລະ ສື່ແບບໃໝ່. ດ້ານສື່ສິ່ງພິມ: ມີໜັງສືພິມ 13 ສະບັບ, ໃນນັ້ນລາຍວັນມີ 11 ສະບັບ, ວາລະສານ 113 ສະບັບ, ໃນນີ້ເປັນຂອງເອກະຊົນມີ 49 ສະບັບ, ສື່ອີເລັກໂຕຼນິກ: ວິທະຍຸກະຈາຍສຽງຂັ້ນສູນກາງມີ 3 ແຫ່ງ, ຂັ້ນເມືອງ 18 ແຫ່ງ (ຢຸດອອກອາກາດ 1 ແຫ່ງຢູ່ແຂວງ ໄຊສົມບູນ) ແລະ ນະຄອນຫລວງ ມີ 8 ແຫ່ງ, ຂັ້ນເມືອງ 42 ແຫ່ງ, ໂທລະພາບຂັ້ນສູນກາງມີ 6 ແຫ່ງ, ຂັ້ນແຂວງ 15 ແຫ່ງ (ຢຸດອອກອາກາດ 7 ແຫ່ງ), ຂັ້ນເມືອງ 11 ແຫ່ງ (ຢຸດອອກອາກາດ 5 ແຫ່ງ). ນອກຈາກນີ້, ໄດ້ຕິດຕັ້ງໂທລະໂຄ່ງຢູ່ 5.365 ບ້ານຂອງຈຳນວນ 8.442 ບ້ານໃນທົ່ວປະເທດ. ແຕ່ລະອົງກອນສື່ມວນຊົນລ້ວນແຕ່ມີສື່ແບບໃໝ່ ເປັນຕົ້ນ: ເວັບໄຊ, ເຟດບຸກ, ໜ້າເວບເພຈປະເພດຕ່າງໆຢ່າງຫລວງຫລາຍ.

ໂດຍ: ບຸນຕຽງ ຈັນທະວົງ,

Lao National Radio