ຂະແໜງຖະແຫລງຂ່າວ ແລະ ສື່ມວນຊົນ ຍົກສູງຄຸນນະພາບ ຂອງການພັດທະນາສື່ໃນໄລຍະໃໝ່

ຂະແໜງຖະແຫລງຂ່າວ ແລະ ສື່ມວນຊົນ ຈະສືບຕໍ່ເອົາໃຈໃສ່ ໃນການຜັນຂະຫຍາຍວິໃສທັດ 2030, ຍຸດທະສາດ 10 ປີ (2016-2025) ແລະ ແຜນການພັດທະນາວຽກງານຖະແຫລງຂ່າວ ແລະ ສື່ມວນຊົນ 5 ປີ (2016-2020) ໃຫ້ເປັນແຜນປະຕິບັດວຽກງານຕົວຈິງໃນແຕ່ລະປີ ເພື່ອ ຍົກສູງຄຸນນະພາບຂ ອງການພັດທະນາສື່ໃນໄລຍະໃໝ່.

ທ່ານ ສະຫວັນຄອນ ລາຊະມຸນຕີ ຮອງລັດຖະມົນຕີ ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ກ່າວໃນກອງປະຊຸມສຳມະນາວິທະຍາສາດ ພາຍໃຕ້ຫົວຂໍ້: ການຄຸ້ມຄອງ, ການນຳໃຊ້ ແລະ ພັດທະນາສື່ໃນໄລຍະໃໝ່ ໃນວັນທີ 24 ກັນຍາ 2018 ນີ້ວ່າ: ສຳລັບທິດທາງແຜນການພັດທະນາວຽກງານຖະແຫລງຂ່າວ ແລະ ສື່ມວນຊົນໃນຕໍ່ໜ້າ ແມ່ນຈະໄດ້ສືບຕໍ່ຄຸ້ມຄອງ ແລະ ພັດ ທະນາສື່ມວນຊົນໃຫ້ກ້າວສູ່ຄຸນນະພາບໃໝ່, ທັນສະໄໝ, ວ່ອງໄວ, ເປັນກະບອກສຽງທີ່ແຫລມຄົມຂອງພັກ, ລັດ, ເປັນເວທີສົ່ງເສີມປະຊາທິປະໄຕປະຊາຊົນ, ເປັນແຫລ່ງຂໍ້ມູນຂ່າວສານ, ສາລະຄວາມຮູ້ ແລະ ຄວາມບັນເທິງ, ຕອບຕ້ານຖ້ອຍທຳນອງຂອງຄົນບໍ່ດີ ແລະ ອິດທິກຳລັງປໍລະປັກ, ສາມາດເຂົ້າເຖິງທຸກເປົ້າໝາຍ, ທຸກພື້ນທີ່ໃນທົ່ວປະເທດ ແລະ ທົ່ວໂລກ, ລວມທັງແນະນຳ, ຊຸກຍູ້ ແລະ ຕິດຕາມການຈັດຕັ້ງປະຕິບັດ ແລະ ເຜີຍແຜ່ກົດໝາຍວ່າດ້ວຍສື່ມວນຊົນ. ສືບຕໍ່ພັດທະນາເນື້ອໃນໃຫ້ກວ້າງ, ເລິກ, ຮັບປະກັນ 4 ລັກສະນະ, ຫລາຍຮູບແບບ, ດຶງດູດຄວາມສົນໃຈຂອງຜູ້ອ່ານ, ຜູ້ຟັງ, ຜູ້ເບິ່ງ ແລະ ເປັນແຫລ່ງສະໜອງຂໍ້ມູນຂ່າວສານ, ການບັນເທິງ ແລະ ໃຫ້ສາລະຄວາມຮູ້ຢ່າງຮອບດ້ານໃຫ້ແກ່ສັງຄົມ; ສືບຕໍ່ໃຫ້ອົງການພັກ, ລັດ, ເອກະຊົນ ເອົາໃຈໃສ່ວຽກງານປະຊາສຳພັນຂອງຕົນ ດ້ວຍການໃຫ້ຂ່າວແກ່ສື່ມວນຊົນຢ່າງທັນການ ແລະ ສືບຕໍ່ລົງທຶນຫັນປ່ຽນເຕັກນິກການຖະແຫລງຂ່າວ ແລະ ສື່ມວນຊົນທັງຢູ່ສູນກາງ ແລະ ທ້ອງຖິ່ນໄປສູ່ລະບົບດີຈີຕອນ ດ້ວຍຈັງຫວະໄວຂຶ້ນ.

ພາບ ແລະ ຂ່າວ: ຂປລ