ສປປ ລາວ ມີຄົນເສຍຊີວິດ 23 ຄົນ ຈາກເຊື້ອໄວຣັດວໍ້

ອີງຕາມການລາຍງານຂອງ ຂປລ ວ່າ: ໃນວັນທີ 24 ກັນຍາ 2018, ທີ່ກົມລ້ຽງສັດ ແລະ ການປະມົງ, ກະຊວງກະສິກໍາ ແລະ ປ່າ ໄມ້ ຮ່ວມກັບ ກະຊວງ ສາທາລະນະສຸກ ໄດ້ຈັດພິທີຖະແຫລງຂ່າວ ວັນວໍ້ໂລກ ປະຈໍາປີ 2018, ໂດຍການເປັນປະທານຂອງ ທ່ານ ບຸນຂວາງ ຄໍາບຸນເຮືອງ ຮອງລັດຖະມົນຕີ ກະຊວງກະສິກໍາ ແລະ ປ່າໄມ້, ທ່ານ ດຣ. ພູທອນ ເມືອງປາກ ຮອງລັດຖະມົນຕີ ກະຊວງສາທາລະນະສຸກ, ທ່ານ ນາງ ລໍແຮນ ຕາງໜ້າອົງການອະນາໄມໂລກ ປະຈໍາ ສປປ ລາວ, ພ້ອມດ້ວຍພາກສ່ວນກ່ຽວຂ້ອງ ເຂົ້າຮ່ວມ.

ຈຸດປະສົງໃນການຈັດງານໃນຄັ້ງນີ້, ແມ່ນເພື່ອເປັນການເຜີຍແຜ່ຂໍ້ມູນຂ່າວສານ ແລະ ປູກຈິດສໍານຶກ ໃຫ້ປະຊາຊົນບັນດາເຜົ່າໄດ້ຮັບຮູ້ ແລະ ເຂົ້າໃຈ ກ່ຽວກັບພະຍາດວໍ້ ໃຫ້ຫລາຍຂຶ້ນກວ່າເກົ່າ ແລະ ເພື່ອເປັນການສ້າງຂະບວນການບໍລິການ ສັກຢາກັນພະຍາດວໍ້ໃຫ້ໝາ ແລະ ແມວ, ພ້ອມສາເຫດ ທີ່ເຮັດໃຫ້ເກີດພະຍາດວໍ້ ແມ່ນມາຈາກການຕິດເຊື້ອໄວຣັດວໍ້ ທີ່ມີຢູ່ໃນນໍ້າລາຍຂອງສັດ ທີ່ເປັນພະຍາດວໍ້, ເຊິ່ງສາມາດຕິດຕໍ່ທາງກົງໂດຍການຖືກໝາ, ແມວ ຫລື ສັດປະເທດອື່ນໆ ທີ່ມີເຊື້ອວໍ້ກັດ, ເຮັດໃຫ້ເຊື້ອພະຍາດເຂົ້າສູ່ຮ່າງກາຍ ໂດຍຜ່ານທາງບາດແຜ ແລະ ເສັ້ນປະສາດເຂົ້າສູ່ສະໝອງ, ເຊິ່ງພາໃຫ້ເປັນພະຍາດສະໝອງອັກເສບເຖິງ 99% ຂອງຜູ້ທີ່ຕິດເຊື້ອ ແມ່ນມີສາເຫດມາຈາກໝາກັດ.