ທ່ານ ສອນໄຊ ສີພັນດອນ, ຮອງນາຍົກລັດຖະມົນຕີ ຊີ້ນຳການແກ້ໄຂວຽກງານ ຟື້ນຟູໄພພິບັດ ເມືອງສະໜາມໄຊ

ໃນຕອນເຊົ້າ ຂອງວັນທີ 25 ກັນຍາ 2018 ທີ່ຫ້ອງວ່າການປົກຄອງແຂວງ ອັດຕະປື, ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ປະທານຄະນະກຳມະການສະເພາະກິດ ແກ້ໄຂໄພພິບັດລະດັບຊາດ ໄດ້ຊີ້ນຳວຽກງານລວມ ໃນການແກ້ໄຂໄພພິບັດນໍ້າຖ້ວມ ຢູ່ ເມືອງສະໜາມໄຊ.

ກ່ອນອື່ນ, ທ່ານຮອງນາຍົກລັດຖະມົນຕີ ໄດ້ຮັບຟັງການລາຍງານຄວາມຄືບໜ້າ ໃນການແກ້ໄຂວຽກງານ ດັັ່ງກ່າວ, ໃນໄລຍະຜ່ານມາ ຈາກ ທ່ານ ອຸ່ນຫລ້າ ໄຊຍະສິດ ຮອງເຈົ້າແຂວງ, ປະທານຄະນະກໍາມະການປ້ອງກັນ ແລະ ຄວບຄຸມໄພພິບັດ ແຂວງ ອັດຕະປື ຊຶ່ງເຫັນວ່າ: ຜ່ານການເກັບກຳຂໍ້ມູນ ແລະ ແກ້ໄຂວຽກງານດັ່ງກ່າວ, ມາຮອດປັດຈຸບັນ ສາມາດສັັງລວມຂໍ້ມູນເບື້ອງຕົ້ນໄດ້ ຄື: ຈາກເຫດການຄູກັນນໍ້າເຂື່ອນໄຟຟ້າເຊປ່ຽນ-ເຊນໍ້ານ້ອຍແຕກພັງ ໄດ້ສົ່ງຜົນກະທົບຕໍ່ປະຊາຊົນ ຈຳນວນ 19 ບ້ານ, ມີ 3.081 ຫລັງຄາເຮືອນ, 3.657 ຄອບຄົວ, ພົນລະເມືອງ 14.108 ຄົນ, ຍິງ 7.705 ຄົນ, ມູນຄ່າການເສຍຫາຍເບື້ອງຕົ້ນ 400 ກວ່າຕື້ກີບ (ໃນນັ້ນ ບໍ່ທັນໄດ້ນັບມູນຄ່າການເສຍຫາຍດ້ານພື້ນຖານໂຄງລ່າງ, ພື້ນຖານເສດຖະກິດ-ສັງຄົມ ແລະ ສິ່ງແວດລ້ອມ).

ໃນນີ້, ໄດ້ຮັບຜົນກະທົບໜັກ ຈໍານວນ 6 ບ້ານ, ມີ 1.124 ຄອບຄົວ, ພົນລະເມືອງ 4.571 ຄົນ, ຍິງ 2.224 ຄົນ. ສໍາລັບຈໍານວນທີ່ໄດ້ຮັບແຈ້ງສູນຫາຍ ໃນເບື້ອງຕົ້ນ ຈຳນວນ 131 ຄົນນັ້ນ, ແມ່ນໄດ້ກັບຄືນສູ່ຄອບຄົວແລ້ວ ຈຳນວນ 66 ຄົນ, ຊອກຄົ້ນພົບຜູ້ເສຍຊີວິດ ຈໍານວນ 34 ສົບ (ຍັງບໍ່ຮູ້ຍາດພີ່ນ້ອງ ຈໍານວນ 2 ສົບ) ແລະ ຍັງສູນຫາຍບໍ່ຮູ້ຮ່ອງຮອຍ ຈຳນວນ 31 ຄົນ, ນອກນັ້ນ ຍັງມີຜູ້ໄດ້ຮັບຜົນກະທົບ ແລ້ວໄປປິ່ນປົວຢູ່ໂຮງໝໍ ແລະ ເສຍຊີວິດໃນເວລາຕໍ່ມາ ຈຳນວນ 6 ຄົນ.

ຂ່າວສານປະເທດລາວ