ບຸນຊ່ວງເຮືອນໍ້າເຫືອງໃນບຸນຫໍ່ເຂົ້າສະຫຼາກ ໄດ້ກາຍເປັນບຸນປະເພນີ ທີ່ຊາວເມືອງແກ່ນທ້າວໄດ້ສືບທອດປະຕິບັດກັນມາທຸກໆປີ. ສະເພາະປີນີ້ ໄດ້ຈັດຂຶ້ນໃນວັນທີ 24 ຫາ 25 ກັນຍານີ້, ຢູ່ທີ່ແຄມນໍ້າເຫືອງທ່າວັດສີພູມ ເທດສະບານ ເມືອງແກ່ນທ້າວ ແຂວງໄຊຍະບູລີ. ເປັນກຽດເຂົ້າຮ່ວມຮັບຊົມໂດຍມີທ່ານ ເພັງນິລັນ ຄຳພັນເພັງ ຮອງເຈົ້າແຂວງໄຊຍະບູລີ, ທ່ານ ສຳລານ ສຸວັນນະໂຊດ ເຈົ້າເມືອງໆແກ່ນທ້າວ, ມີສະມາຊິກສະພາແຫ່ງຊາດປະຈຳເຂດເລືອກຕັ້ງທີ 7 ແຂວງໄຊຍະບູລີ, ບັນດາທ່ານເຈົ້າເມືອງ,ນາຍອຳເພີທ່າລີ່, ນາຍອຳເພີຊຽງຄານ, ມີຫົວໜ້າ, ຮອງຫົວໜ້າພະແນກການຂອງແຂວງ, ຮອງເຈົ້າເມືອງ, ສີພາຍເຮືອຊ່ວງ ຕະຫລອດຮອດມວນຊົນຊາວເມືອງແກ່ນທ້າວເຂົ້າຮ່ວມຮັບຊົມຢ່າງຫຼວງຫຼາຍ.

ທ່ານ ອຳຄາ ລັດສະໝີ ຮອງເຈົ້າເມືອງແກ່ນທ້າວ, ໃນນາມປະທານຈັດງານບຸນໄດ້ລາຍງານໃຫ້ຮູ້ວ່າ: ການຈັດງານບຸນຊ່ວງເຮືອນໍ້າເຫືອງໃນບຸນຫໍ່ເຂົ້າສະຫຼາກເມືອງແກ່ນທ້າວ ເພື່ອເປັນການອານຸລັກຮັກສາຮີດຄອງປະເພນີອັນດີງາມຂອງຊາດ ກໍ່ຄືຂອງທ້ອງຖິ່ນ ທີ່ເຄີຍປະຕິບັດກັນມາເປັນເວລາຍາວນານ ແລະ ທັງເປັນການເສີມສ້າງຄວາມສາມັກຄີຮັກແພງລະຫວ່າງປະຊາຊົນຊັ້ນຄົນຕ່າງໆໃຫ້ເປັນປຶກແຜ່ນແໜ້ນໜາ ແລະ ທັງເປັນການຊຸກຍູ້ສົ່ງເສີມການທ່ອງທ່ຽວຢູ່ພາຍໃນເມືອງ ອີກດ້ວຍ.

ເຊິ່ງປີນີ້ ມີເຮືອຊ່ວງເຂົ້າຮ່ວມແຂ່ງຂັນ ປະເພດເຮືອຊາຍ 11 ລໍາ ແລະ ເຮືອຊ່ວງເພດຍິງຈຳນວນ 9 ທີມ,ໃນນີ້ມີເຮືອຊ່ວງຊາຍຈາກອຳເພີທ່າລີ່ເຂົ້າຮ່ວມແຂ່ງຂັນ 2 ລຳ. ຜົນການແຂ່ງຂັນ ເຮືອຍິງ ຊະນະເລີດໄດ້ແກ່ທີມເຮືອຊ່ວງບ້ານເມືອງໝໍໄດ້ຮັບລາງວັນເງິນສົດ 2 ລ້ານກີບ, ພ້ອມດ້ວຍຂັນເງິນໜັກ 0,5 ກິໂລກາມ ມູນຄ່າ 4.100.000 ກີບ 1 ໜ່ວຍ, ອັນດັບ2 ໄດ້ແກ່ທີມບ້ານຈອມເພັດ ໄດ້ຮັບເງິນສົດ 1.000.000ກີບ, ອັນດັບ 3 ທີມເຮືອຊ່ວງບ້ານຈອມແກ້ວ ໄດ້ຮັບເງິນສົດ 800.000 ກີບ ແລະ ອັນດັບ 4 ທີມເຮືອຊ່ວງສະມາຄົມເຮືອຫາງຍາວ ໄດ້ຮັບເງິນສົດ 500.000 ກີບ. ນອກນັ້ນໄດ້ຮັບລາງວັນຊົມເຊີຍທີມລະ 300.000 ກີບ. ປະເພດເຮືອໄວຊາຍ ຊະນະເລີດໄດ້ແກ່ເຮືອ ບໍລິສັດຈັນທະວົງ ໄດ້ຮັບລາງວັນເງິນສົດ 5.000.000 ກີບ ພ້ອມດ້ວຍຂັນເງິນ ໜັກ 1 ກິໂລກາມ ມູນຄ່າ 8.200.000 ກີບ 1 ໜ່ວຍ, ອັນດັບ 2 ໄດ້ໄດ້ແກ່ເຮືອບ້ານເມືອງເກົ່າ ໄດ້ຮັບລາງວັນເງິນສົດ 3.000.000 ກີບ, ອັນດັບ 3 ເຮືອຊ່ວງຈາກອຳເພີທ່າລີ ໄດ້ຮັບລາງວັນເງິນສົດ 2.000.000 ກີບ, ທີ4 ເຮືອຊ່ວງບ້ານຈອມແກ້ວ ໄດ້ຮັບເງິນສົດ 1.000.000 ກີບ.

ນອກນັ້ນໄດ້ຮັບລາງວັນຊົມເຊີຍລຳລະ 800.000 ກີບ. ນອກນີ້ ຍັງມີລາງວັນເຮືອງາມຕື່ມອີກ ເຊິ່ງເຮືອງາມທີ1 ໄດ້ແກ່ເຮືອບ້ານຈອມເພັດ ໄດ້ຮັບລາງວັນເປັນເງິນ 500.000 ກີບ, ທີ2 ເຮືອບ້ານຈອມແກ້ວ ໄດ້ຮັບເງິນ 300.000 ກີບ ແລະ ທີ3 ເຮືອບ້ານເມືອງເກົ່າ ໄດ້ 200.000 ກີບ.

LEAVE A REPLY

Please enter your comment!
Please enter your name here