ເຮືອແກ້ວຊູຊັບ ຄອງຂັນຊະນະເລີດ ປະເພດ 22 ສີພາຍ ງານບຸນຊ່ວງເຮືອ ປະຈຳປີ 2018 ທີ່ເມືອງໄຊເສດຖາ ແຂວງອັດຕະປື

0
157

ອັດຕະປື: ເຮືອແກ້ວຊູຊັບ ປະເພດ 22 ສີພາຍ ຊາວໜຸ່ມຊາຍ ບ້ານໄຊສີ ເມືອງໄຊເສດຖາ ແຂວງອັດຕະປື ຄວ້າລາງວັນຊະນະເລີດ ແລະ ເງິນສົດ 2,5 ລ້ານກີບ ມາຄອງໄດ້ສຳເລັດ ຫຼັງໃນຮອບຊີງຊະນະ ເລີດ ໄລ່ບຽດແຊງ ເຮືອເມືອງຊານໄຊ ເຂົ້າເສັ້ນໄຊໄປໄດ້ຢ່າງ ຫວຸດຫວິດ ໃນຮອບຊີງຊະນະເລີດ ໃນງານບຸນຊ່ວງເຮືອປະເພນີ ບຸນຫໍ່ເຂົ້າສະຫຼາກເດືອນ 10 ເພັງ ພສ 2561 ທີ່ສອງຝັ່ງນ້ຳ ບ້ານພະເມືອງ ແລະ ບ້ານໂພໄຊ ເມືອງໄຊເສດຖາ.

ການແຂ່ງຂັນຊ່ວງເຮືອໃນຄັ້ງນີ້ ໄດ້ຈັດຂຶ້ນໃນວັນທີ 24 ກັນຍາ ຜ່ານມາ ທີ່ບ້ານຝັ່ງແດງ ເມືອງໄຊເສດຖາ, ໂດຍພາຍໃຕ້ການ ເປັນ ປະທານຂອງ ທ່ານ ບຸນເສີດ ເສດທິລາດ ເຈົ້າເມືອງໄຊເສດຖາ, ມີຄະນະຮັບຜິດຊອບຈັດການແຂ່ງຂັນ, ຄະນະນຳເຮືອແຕ່ລະພາກສ່ວນ ແລະ ມວນຊົນ ເຂົ້າຮ່ວມຊົມຮ່ວມເຊຍ ເປັນຈຳນວນຫຼວງຫຼາຍ.

ການແຂ່ງຂັນຊ່ວງເຮືອໃນຄັ້ງນີ້ ມີເຮືອເຂົ້າຮ່ວມທັງໝົດມີ 24 ລຳ, ມີ 3 ປະເພດສີພາຍ, 4 ລາຍການຄື: ປະເພດ 22 ສີພາຍຊາຍ 3 ລຳ; ປະເພດ 12 ສີພາຍຍິງ-ຊາຍ ມີ 15 ລຳ, ຍິງ 6 ລຳ; ປະເພດ 8 ສີພາຍຊາຍ ມີ 6 ລຳ ເຊິ່ງໄດ້ແບ່ງການແຂ່ງຂັນອອກເປັນ 2 ສາຍການແຂ່ງຂັນຄື: ສາຍ ກ ແລະ ສາຍ ຂ. ສຳລັບເຮືອທີ່ເຂົ້າຮ່ວມແຂ່ງຂັນໃນປີນີ້ ແມ່ນມີແຕ່ພາຍໃນແຂວງອັດຕະປືເທົ່ານັ້ນ ແລະ ການແຂ່ງຂັນດັ່ງກ່າວ ແມ່ນຈັດຂື້ນທີ່ສອງຝາກຝັ່ງ ສາຍນ້ຳເຊກະໝານ ບ້ານພະເມືອງ ແລະ ບ້ານ ໂພໄຊ ເມືອງໄຊເສດຖາ ແຂວງອັດຕະປື.

ຜ່ານການແຂ່ງຂັນເຮືອປະເພດ 22 ສີພາຍຊາຍ ຜົນປາກົດວ່າ: ອັນດັບ 1 ເຮືອແກ້ວຊູຊັບ ຊາວໜຸ່ມບ້ານໄຊສີ ເມືອງໄຊເສດຖາ ໄດ້ຮັບຂັນ 1 ໜ່ວຍ ພ້ອມເງິນສົດ 2,5 ລ້ານກີບ, ອັນດັບ 2 ເຮືອຊາວໜຸ່ມເມືອງຊານໄຊ ໄດ້ຮັບເງິນສົດ 2 ລ້ານກີບ ແລະ ອັນດັບ 3 ເຮືອຊາວໜຸ່ມບ້ານໂພໄຊ ໄດ້ຮັບເງິນສົດ 1,5 ລ້ານກີບ; ເຮືອປະເພດ 12 ເພດຊາຍ ອັນດັບ 1 ເຮືອເມືອງສາມັກຄີໄຊ ໄດ້ຮັບຂັນ 1 ໜ່ວຍ ພ້ອມເງິນສົດ 2 ລ້ານກີບ, ອັນດັບ 2 ເຮືອຫວຍໂຊກໄຊ ສາຂາແຂວງອັດຕະປື ໄດ້ຮັບເງິນສົດ 1,5 ລ້ານກີບ ແລະ ອັນດັບ 3 ເຮືອຫ້ອງການ ການຄ້າເມືອງໄຊເສດຖາ ໄດ້ຮັບເງິນສົດ 1 ລ້ານກີບ; ເຮືອປະເພດ 12 ສີພາຍຍິງ ອັນດັບ 1 ເຮືອນາວາອານິນ ໄດ້ຮັບຂັນ 1 ໜ່ວຍ ພ້ອມເງິນສົດ 2 ລ້ານກີບ, ອັນດັບ 2 ເຮືອບ້ານໄຊສີ ໄດ້ຮັບເງິນສົດ 1,5 ລ້ານກີບ ແລະ ອັນດັບ 3 ເຮືອ ບ້ານຫາດຊາຍຂາວ ໄດ້ຮັບເງິນສົດ 1 ລ້ານກີບ; ເຮືອປະເພດ 8 ສີພາຍຊາຍ ອັນດັບ 1 ເຮືອ ຄອບຄົວ ພົມມະວົງ ໄດ້ຮັບຂັນ 1 ໜ່ວຍ ພ້ອມເງິນສົດ 1 ລ້ານກີບ, ອັນດັບ 2 ເຮືອໄຊຊະນະ ໄດ້ຮັບເງິນສົດ 8 ແສນກີບ ແລະ ອັນດັບ 3 ເຮືອເຈົ້າແມ່ສາຍເຊກອງ ໄດ້ຮັບເງິນສົດ 6 ແສນກີບ.

ການແຂ່ງຂັນຊ່ວງເຮືອປະເພນີປະຈຳປີ ພສ 2561 ຊີງຂັນ ແລະ ເງິນລາງວັນຂອງທ່ານເຈົ້າເມືອງໄຊເສດຖາ ໃນຄັ້ງນີ້ ຈັດຂຶ້ນຢ່າງຄຶກຄື້ນ ແລະ ເຕັ້ມໄປດ້ວຍບັນຍາກາດອັນເບີກບານມ່ວນຊື່ນ, ເພື່ອເປັນການສືບສານປະເພີນີ ແລະ ວັດທະນະທຳ ອັນດີງາມ ແລະ ລ້ຳຄ່າ ຂອງຊາວເມືອງໄຊເສດຖາ ກໍ່ຄືຂອງຊາດໃຫ້ຄົງຢູ່ກັບຄົນລາວ ແລະ ຊາດລາວ

ຕະຫຼອດໄປ ແລະ ອີກດ້ານໜຶ່ງກໍ່ເປັນການສ້າງຂະບວນການຮັບຕ້ອນການເປີດປີທ່ອງທ່ຽວລາວ 2018 ໃຫ້ເປັນຂະບວນການຟົດຟື້ນ.

ຂ່າວໂດຍ: ພົມວິຫານ ໄຊຊະນະ ຂ.ອັດຕະປື