1 ອາທິດ ອຸບັດຕິເຫດທີ່ ນະຄອນຫຼວງວຽງຈັນ ເສຍຫາຍ 300 ກວ່າລ້ານກີບ

0
143

ອາທິດຜ່ານມາ ທົ່ວນະຄອນຫຼວງວຽງຈັນ ( ນວ ) ມີອຸບັດຕິເຫດເກີດຂຶ້ນທັງໝົດ 18 ຄັ້ງ, ພາຫະນະເປເພ 35 ຄັນ, ຄົນໄດ້ຮັບບາດເຈັບ 22 ຄົນ ແລະ ເສຍຊີວິດທັງໝົດ 3 ຄົນ; ຈາກອຸບັດຕິເຫດທີ່ເກີດຂຶ້ນຕາມທ້ອງຖະໜົນ ສ້າງຜົນເສຍຫາຍເປັນເງິນ 300.000.000 ກວ່າກີບ.

ອິງຕາມການສະຫຼຸບສະຖິຕິອຸບັດຕິເຫດປະຈໍາອາທິດ ແຕ່ວັນທີ 17-23 ກັນຍາ 2018 ຂອງພະແນກຕໍາຫຼວດຈະລາຈອນ ນວ ມີອຸບັດຕິເຫດເກີດຂຶ້ນທັງໝົດ 18 ຄັ້ງ, ພາຫະນະເປເພທັງໝົດ 35 ຄັນ, ເປເພເລັກໜ້ອຍ 14 ຄັນ, ສົມຄວນ 21 ຄັນ, ຄົນໄດ້ຮັບບາດເຈັບທັງໝົດ 22 ຄົນ, ບາດເຈັບເລັກໜ້ອຍ 6 ຄົນ, ສົມຄວນ 11 ຄົນ, ສາຫັດ 5 ຄົນ ແລະ ເສຍຊີວິດ 3 ຄົນ; ຈາກອຸບັດຕິເຫດດັ່ງກ່າວທີ່ເກີດຂຶ້ນເປັນພະນັກງານ 7 ຄົນ, ກໍາມະກອນ 16 ຄົນ, ຄ້າຂາຍ 8, ນັກຮຽນ 1 ຄົນ; ໃນນັ້ນ, ລະເມີດກົດລະບຽບຈະລາຈອນໂດຍການດື່ມສິ່ງມືນເມົາທັງໝົດ 15 ຄົນ, ບໍ່ມີໃບຂັບຂີ່ 16 ຄົນ, ສະເພາະເມື່ອງທີ່ເກີດອຸບັດຕິເຫດມີ: ເມືອງໄຊເສດຖາ 5 ຄັ້ງ, ເມືອງສີໂຄດຕະບອງ ແລະ ເມືອງໄຊທານີ ເມືອງລະ 4 ຄັ້ງ, ເມືອງຫາດຊາຍຟອງ ແລະ ເມືອງນາຊາຍທອງ ເມືອງລະ 2 ຄັ້ງ, ເມືອງຈັນທະບູລີ ເກີດຂຶ້ນ 1 ຄັ້ງ; ສ່ວນເສັ້ນທາງທີ່ເກີດອຸບັດຕິເຫດໃນອາທິດຜ່ານມາປະກອບມີ: ເສັ້ນທາງເລກທີ 13 ເໜືອເກີດຂຶ້ນ 4 ຄັ້ງ, ເສັ້ນທາງເລກ 10 ແລະ ເສັ້ນທາງໄກສອນ ເກີດຂຶ້ນເສັ້ນລະ 2 ຄັ້ງ, ເສັ້ນທາງອາຊຽນ, ເສັ້ນທາງສຸພານຸວົງ ແລະ ເສັ້ນທາງທ່າເດື່ອເກີດຂຶ້ນ ເສັ້ນລະ 1 ຄັ້ງ ແລະ ເສັ້ນທາງອື່ນໆ ເກີດຂຶ້ນ 7 ຄັ້ງ; ຈາກອຸບັດຕິເຫດດັ່ງກ່າວທີ່ເກີດຂຶ້ນ ສ້າງຜົນເສຍຫາຍເປັນເງິນທັງໝົດ 309.000.000 ກີບ.

ໄລຍະທີ່ມັກເກີດອຸບັດຕິເຫດສ່ວນຫຼາຍແມ່ນກາງຄືນ ສະແດງອອກຄື: ໃນຊ່ວງເວລາ 2:00 ໂມງເຊົ້າຂອງວັນທີ 22 ກັນຍາ ເກີດເຫດລົດຈັກຕໍາກັບລົດຍົນ ຢູ່ເຂດບ້ານໜອງແຕ່ງ ເມືອງສີໂຄດຕະບອງ ເຮັດໃຫ້ຜູ້ຂັບຂີ່ຊື່ ທ້າວ ພອນປະເສີດ ອາຍຸ 31 ປີກໍາມະກອນຢູ່ບ້ານໜອງແຕ່ງເໜືອ ເສຍຊີວິດຄາທີ່; ວັນດຽວກັນ ເວລາ 23:00 ໂມງ ເກີດເຫດລົດຈັກລົ້ມເອງ ຢູ່ເຂດບ້ານສົມສະຫງ່າ ເມືອງໄຊເສດຖາ ເຮັດໃຫ້ທ້າວ ວິໄຊ ອາຍຸ 52 ປີ ກໍາມະກອນ ບ້ານບຶງຂະຫຍອງ ເມືອງສີສັດຕະນາກ ເສຍຊີວິດ ແລະ ໃນວັນທີ 23 ກັນຍາ ເວລາ 20:30 ໂມງເກີດເຫດລົດຈັກຕໍາກັບລົດຍົນ ຢູ່ເຂດບ້ານຊໍາເຄ້ ເມືອງໄຊເສດຖາ ສົ່ງຜົນເຮັດໃຫ້ ທ້າວ ຈ່ອຍ ອາຍຸ 38 ປີ ກໍາມະກອນ ບ້ານໂຊກນ້ອຍ ເມືອງໄຊເສດຖາ ເສຍຊີວິດ.

ພາບ ແລະ ຂ່າວ: ຂ່າວນະຄອນຫຼວງວຽງຈັນ  (Via Medai Laos)