ລາວ ກຽມນຳໃຊ້ລະບົບເອເລັກໂຕຣນິກເກັບຄ່າ ບໍລິການປະຈຳດ່ານທົ່ວປະເທດ

ສປປ ລາວ ຈະນໍາໃຊ້ເຕັກໂນໂລຊີລະບົບເອເລັກໂຕຣນິກເຂົ້າໃນການເກັບຄ່າທໍານຽມ ແລະ ຄ່າບໍລິການ ກວດກາຄຸນນະພາບສິນຄ້າປະຈໍາດ່ານຊາຍແດນທົ່ວປະເທດ ເພື່ອຄວາມສະດວກໃນການຄຸ້ມຄອງການເກັບລາຍຮັບເຂົ້າງົບປະມານຂອງລັດໃຫ້ຖືກຕ້ອງຕາມລະບຽບຫຼັກການ ແລະ ຫັນເປັນລະບົບທັນສະໄໝ ແນໃສ່ຮັບປະກັນຄວາມໂປ່ງໃສ, ຍຸຕິທໍາ.

ທ່ານ ວົງພູທອນ ສີຈັນທະລາດ ປະທານບໍລິສັດ ເຈແອວເອັສ ໄອທີ ໂຊລູຊັນ ຈໍາກັດ ກ່າວວ່າ: ບໍລິສັດຂອງພວກເຮົາ ເປັນບໍລິສັດທີ່ປຶກສາທາງດ້ານລະບົບໄອທີ, ໄດ້ດໍາເນີນທຸລະກິດມາເປັນເວລາຫຼາຍກວ່າ 10 ປີແລ້ວ, ມື້ນີ້ ຮູ້ສຶກພາກພູມໃຈ ແລະ ເປັນກຽດຢ່າງຍິ່ງ ທີ່ໄດ້ຮ່ວມມືກັບກົມມາດຕະຖານ ແລະ ວັດແທກ ກະຊວງວິທະຍາສາດ ແລະ ເຕັກໂນໂລຊີ ເພື່ອຈະສຶກສານໍາໃຊ້ວິທະຍາສາດ ລະບົບເອເລັກໂຕຣນິກເຂົ້າໃນການເກັບຄ່າທຳນຽມ ແລະ ຄ່າບໍລິການກວດກາຄຸນນະພາບສິນຄ້າ ປະຈໍາດ່ານຊາຍແດນທົ່ວປະ ເທດ, ຂ້າພະເຈົ້າເຊື່ອໝັ້ນວ່າ ໂຄງການດັ່ງກ່າວ ຈະນໍາມາສູ່ຄວາມສະດວກໃນການຄຸ້ມຄອງການເກັບລາຍຮັບໃຫ້ຖືກຕ້ອງຕາມລະບຽບຫຼັກການ ແລະ ຫັນໃຫ້ເປັນລະບົບທີ່ທັນສະໄໝ. ພິທີເຊັນບົດບັນທຶກຄວາມເຂົ້າໃຈດັ່ງກ່າວ, ຈັດຂຶ້ນໃນວັນທີ 1 ຕຸລານີ້ ທີ່ໂຮງແຮມດອນຈັນພລາເລດ,ນະຄອນຫຼວງວຽງຈັນ ລະຫວ່າງ ທ່ານ ວຽງທອງ ວົງທະວິໄລ ຫົວໜ້າກົມມາດຕະຖານ ແລະ ວັດແທກ, ກະຊວງວິທະຍາສາດ ແລະ ເຕັກໂນໂລຊີ ແລະ ທ່ານ ວົງພູທອນ ສີຈັນທະລາດ ປະທານບໍລິສັດ ເຈແອວເອັສ ໄອທີ ໂຊລູຊັນ ຈໍາກັດ, ໂດຍມີທ່ານ ບໍ່ວຽງຄໍາ ວົງດາລາ ລັດຖະມົນຕີກະຊວງວິທະຍາສາດແລະເຕັກໂນໂລຊີ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມເປັນສັກຂີພິຍານນຳ.

ຂໍ້ມູນ: ນສພ ປະຊາຊົນ