ເມືອງໄຊເຊດຖາ ສຸມມ້າງເທີບ-ເງີບເສັ້ນທາງທາດຫຼວງ ໃຫ້ສຳເລັດໃນເດືອນພະຈິກ 2018 ນິ້

ປັດ­ຈຸ­ບັນ​ຫຼາຍ​ເມືອງ ໂດຍ​ສະ­ເພາະ 4 ເມືອງ​ໃນ​ຢູ່​ນະ­ຄອນ­ຫຼວງ​ວຽງ​ຈັນ ໄດ້​ສຸມ​ໃສ່​ຈັດ​ຕັ້ງ​ປະ­ຕິ­ບັດ​ວຽກ​ງານ 3 ຂະ​ບວນ​ການ​ຢ່າງ​ເຂັ້ມ​ງວດ ໃນ​ນັ້ນ ກໍ່​ມີ​ການ​ລົງ​ມ້າງ​ເທີບ​ເງີບ ປ້າຍ​ໂຄ­ສະ­ນາ ແລະ ສິ່ງ​ກີດ­ຂວາງ​ຕ່າງໆ​ຕາມ​ເສັ້ນ­ທາງ​ສາຍ​ຫຼັກ ເພື່ອ​ຄວາມ​ເປັນ​ລະ­ບຽບ​ຮຽບ​ຮ້ອຍ​ສະ­ອາດ​ງາມ​ຕາມ ແລະ ແກ້​ໄຂ​ການ​ສັນ­ຈອນ​ແອ​ອັດ ສະ­ເພາະ​ເມືອງ​ໄຊ​ເຊດ​ຖາ ສຸມ​ພວມ​ຈັດ​ຕັ້ງ​ປະ­ຕິ­ບັດ​ຢູ່​ເສັ້ນ­ທາງ​ທາດ­ຫຼວງ ແຕ່​ວົງ­ວຽນ​ທາດ­ຫຼວງ-ຫົວ​ຂົວ-ວັງ​ຊາຍ-ໜອງ​ໜ່ຽງ-4 ແຍກ​ໄຟ​ອຳ­ນາດ​ຫຼັກ 6 ຖະ­ໜົນ ໄກ­ສອນ ພົມ­ວິ­ຫານ.

ທ່ານ ທະ­ວີ​ໄຊ ໄຊ​ປະ­ເສີດ ຫົວ­ໜ້າ​ຫ້ອງ­ການ​ໂຍ­ທາ​ທິ​ການ ແລະ ຂົນ­ສົ່ງ ເມືອງ​ໄຊ​ເຊດ​ຖາ ໃຫ້​ສຳ­ພາດ​ວັນ​ທີ 1 ຕຸ­ລາ 2018 ວ່າ: ໃນ 21 ເສັ້ນ­ທາງ​ທີ່​ຈັດ​ຕັ້ງ​ປະ­ຕິ­ບັດ​ຢູ່​ນະ­ຄອນ­ຫຼວງ​ວຽງ​ຈັນ ໃນ​ນັ້ນ ເມືອງ​ໄຊ​ເຊດ​ຖາ​ມີ 5 ເສັ້ນ ແຕ່​ເມືອງ​ໄດ້​ກຳ­ນົດ​ເຮັດ​ທົດ​ລອງ​ກ່ອນ 2 ເສັ້ນ­ທາງ ຄື: ເສັ້ນ­ທາງ​ທາດ­ຫຼວງ ແຕ່​ວົງ­ວຽນ​ທາດ­ຫຼວງ-ຫົວ​ຂົວ-ວັງ​ຊາຍ-4ແຍກ​ໄຟ​ແດງ​ຫຼັກ 6 ແລະ ເສັ້ນ­ທາງ​ກຳ­ແພງ​ເມືອງ ແຕ່​ໄຟ​ແດງ​ໂພນ​ພະ​ເນົາ-ໄຟ​ແດງ​ໂພນ​ທັນ ໃນ 2 ເສັ້ນ​ນີ້​ໄດ້​ຈັດ​ຕັ້ງ​ເສັ້ນ­ທາງ​ທາດ­ຫຼວງ​ກ່ອນ ແຕ່​ກ່ອນ​ຈະ​ລົງ​ຈັດ​ຕັ້ງ​ປະ­ຕິ­ບັດ​ກໍ່​ໄດ້​ມີ​ຫຼາຍ​ຂັ້ນ​ຕອນ ເພື່ອ​ລຸ​ລ່ວງ​ໃຫ້​ປະ­ຊາ­ຊົນ​ຜູ້​ທີ່​ມີ​ເຮືອນ​ຢູ່​ແຄມ​ທາງ​ຕໍ່​ເທີບ​ເງີບ ແລະ ສິ່ງ​ກີດ­ຂວາງ​ຕ່າງໆ​ໃຫ້​ຫຍັບ​ຍ້າຍ​ຈາກ​ຂອບ​ທາງ​ເຂົ້າ​ໄປ 6,5 ແມັດ ໂດຍ​ໄດ້​ກຳ­ນົດ​ໃຫ້ 15 ວັນ​ໃຫ້​ເຮັດ​ເອງ ແຕ່​ເວ­ລາ​ຜ່ານ​ໄປ​ບາງ​ຄອບ­ຄົວ​ກໍ່​ບໍ່​ເຮັດ ດັ່ງ­ນັ້ນ ຄະ­ນະ​ກຳ­ມະ­ການ​ປະ­ກອບ​ມີ​ຫຼາຍ​ພາກ­ສ່ວນ ກໍ່​ໄດ້​ລົງ​ນຳ­ພາ​ປະ­ຊາ­ຊົນ​ຈັດ​ຕັ້ງ​ປະ­ຕິ­ບັດ​ເອງ​ຢ່າງ​ເຂັ້ມ​ງວດ ແລະ ຜ່ານ​ການ​ລົງ​ສຳ​ຫຼວດ​ເຫັນ​ວ່າ​ເກືອບ 98% ແຕ່​ລະ​ຄອບ­ຄົວ​ທີ່​ມີ​ເຮືອນ​ແຄມ​ທາງ​ໄດ້​ຕໍ່​ເທີບ​ເງີບ​ອອກ​ມາ​ໃສ່​ເຂດ​ສະ­ຫງວນ ແລະ ທາງ​ຄົນ​ຍ່າງ ໂດຍ​ປະ­ຕິ­ບັດ​ຕາມ​ກົດ­ໝາຍ​ຜັງ­ເມືອງ ແລະ ລະ­ບຽບ​ກົດ­ໝາຍ​ກ່ຽວ­ຂ້ອງ​ຈຶ່ງ​ຕ້ອງ​ໄດ້​ມ້າງ​ເທີບ​ເງີບ ແລະ ສິ່ງ​ຕໍ່​ເຕີມ​ອອກ​ໃຫ້​ໝົດ ສະ­ເພາະ​ເສັ້ນ­ທາງ​ທາດ­ຫຼວງ​ໄລ­ຍະ​ທີ 1 ແຕ່​ວົງ­ວຽນ​ທາດ­ຫຼວງ-3ແຍກ​ກົກ​ຕານ ຕະ­ຫຼາດ​ຫົວ​ຂົວ​ໄດ້​ເລີ່ມ​ຈັດ​ຕັ້ງ​ປະ­ຕິ­ບັດ​ມາ​ແຕ່​ທ້າຍ​ເດືອນ​ສິງ­ຫາ 2018 ມາ​ຮອດ​ປັດ­ຈຸ­ບັນ​ໄດ້​ມ້າງ​ສຳ­ເລັດ 95% ໃນ​ນັ້ນ ເທີບ 215 ເທີບ ມ້າງ​ສຳ­ເລັດ 180 ເທີບ ປ້າຍ 166 ປ້າຍ ມ້າງ​ສຳ­ເລັດ 157 ປ້າຍ ກຳ­ແພງ​ຮົ້ວ 5 ມ້າງ​ສຳ­ເລັດ ແລະ ວາງ​ເຄື່ອງ​ຊະ­ຊາຍ 195 ໄດ້​ຫຍັບ​ຍ້າຍ​ເຂົ້າ​ໄປ​ສຳ­ເລັດ 175.

ສ່ວນ​ໄລ­ຍະ​ທີ 2 ເລີ່ມ​ແຕ່ 3 ແຍກ​ກົກ​ຕານ-4 ແຍກ​ໄຟ​ແດງ​ຫຼັກ 6 ປັດ­ຈຸ­ບັນ​ກຳ­ລັງ​ຈັດ​ຕັ້ງ​ປະ­ຕິ­ບັດ​ຢູ່​ມີ 4 ບ້ານ​ຄື: ບ້ານ​ໂນນ​ສະ­ຫວ່າງ ວັງ​ຊາຍ ໂນນ​ສະ­ຫງ່າ ແລະ ບ້ານ​ໜອງ​ໜ່ຽງ ລວມ​ທັງ​ໝົດ​ທີ່​ລົງ​ບັນ­ທຶກ 289 ເປົ້າ​ໝາຍ ໃນ​ນັ້ນ ເທີບ​ມີ 279 ມ້າງ​ສຳ­ເລັດ 52 ເທີບ ປ້າຍ 215 ປ້າຍ ມ້າງ​ສຳ­ເລັດ 12 ປ້າຍ ກຳ­ແພງ 7 ມ້າງ​ສຳ­ເລັດ ແລະ ວາງ​ເຄື່ອງ​ຊະ­ຊາຍ 291 ຫຍັບ​ຍ້າຍ​ໄປ​ແລ້ວ 51 ລວມ​ທັງ​ໝົດ​ແຕ່​ວົງ­ວຽນ ທາດ­ຫຼວງ-4ແຍກ​ໄຟ​ແດງ​ຫຼັກ 6 ມີ 1.361 ເປົ້າ​ໝາຍ ປັດ­ຈຸ­ບັນ​ແກ້​ໄດ້​ແລ້ວ 637 ເປົ້າ​ໝາຍ ຍັງ​ຄ້າງ 724 ເປົ້າ​ໝາຍ​ທີ່​ຈະ​ໄດ້​ສືບ­ຕໍ່​ໃຫ້​ສຳ­ເລັດ​ໃນ​ທ້າຍ​ເດືອນ​ພະ­ຈິກ 2018 ແຕ່​ຖ້າ​ລວມ​ທັງ​ໝົດ 5 ເສັ້ນ​ພາຍ​ໃນ​ເມືອງ​ໄຊ​ເຊດ​ຖາ ຈະ​ຈັດ​ຕັ້ງ​ປະ­ຕິ­ບັດ​ໃຫ້​ສຳ­ເລັດ​ໃນ​ເດືອນ​ມິ­ຖຸ­ນາ 2019.

ຜ່ານ​ການ­ຈັດ­ຕັ້ງ​ປະ­ຕິ­ບັດ​ເບື້ອງ​ຕົ້ນ​ກໍ່​ມີ​ຄວາມ​ຫຍຸ້ງ­ຍາກ ຍ້ອນ​ຄວາມ​ບໍ່​ເຂົ້າ­ໃຈ​ຕໍ່​ລະ­ບຽບ​ກົດ­ໝາຍ​ຂອງ​ປະ­ຊາ­ຊົນ ແຕ່​ປັດ­ຈຸ­ບັນ​ປະ­ຊາ­ຊົນ​ໄດ້​ເລີ່ມ​ມີ​ຄວາມ​ເຂົ້າ­ໃຈ​ຫຼາຍ​ຂຶ້ນ​ຕໍ່​ການ­ຈັດ­ຕັ້ງ​ປະ­ຕິ­ບັດ ໂຄງ­ການ​ຈັດ​ສັນ​ຄວາມ​ບໍ່​ເປັນ​ລະ­ບຽບ​ຮຽບ​ຮ້ອຍ​ຕົວ​ເມືອງ​ຢູ່​ສອງ​ຟາກ​ສາຍ​ຫຼັກ ເຊິ່ງ​ມັນ​ສະ­ແດງ​ໃຫ້​ເຫັນ​ຜ່ານ​ຈັດ​ຕັ້ງ​ປະ­ຕິ­ບັດ​ຕົວ​ຈິງ​ໃນ​ຜ່ານ​ມາ ເຫັນ​ວ່າ​ປະ­ຊາ­ຊົນ​ໄດ້​ໃຫ້­ການ​ຮ່ວມ​ມື​ເປັນ​ຢ່າງ​ດີ ແລະ ມີ​ປະ­ຊາ­ຊົນ​ຫຼາຍ​ຄົນ​ໄດ້​ຍ້ອງ­ຍໍ​ຊົມ­ເຊີຍ​ຍ້ອນ​ວ່າ ພາຍ­ຫຼັງ​ຫຍັບ​ຍ້າຍ​ເຮັດ​ໃຫ້​ສະ­ຖານ­ທີ່​ແຄມ​ທາງ​ກວ້າງ­ຂວາງ​ອອກ​ຕື່ມ ມີ​ຄວາມ​ສະ­ດວກ​ໃນ​ການ​ຈອດ​ລົດ ແລະ ການ​ຊື້-ຂາຍ ພ້ອມ​ນີ້ ທ່ານ​ຍັງ​ໄດ້​ຮຽກ­ຮ້ອງ​ມາ​ຍັງ​ປະ­ຊາ­ຊົນ​ທີ່​ມີ​ເຮືອນ​ແຄມ​ທາງ ຈົ່ງ​ສືບ­ຕໍ່​ໃຫ້­ການ​ຮ່ວມ​ມື​ເພື່ອ​ເຮັດ​ໃຫ້​ການ­ຈັດ­ຕັ້ງ​ປະ­ຕິ­ບັດ ໂຄງ­ການ​ມີ​ຜົນ­ສຳ­ເລັດ​ໂດຍ​ໄວ​ຕາມ​ທິດ​ຊີ້​ນຳ​ຂອງ​ຂັ້ນ​ເທິງ

ທີ່ມາ: ນສພ ວຽງຈັນໃຫ່ມ