ຟຟລ ແລະ ຜ-ຟຟລ ຮ່ວມສົມທົບທຶນເພື່ອຊ່ວຍເຫຼືອ ຜູ້ທີ່ໄດ້ຮັບຜົນກະທົບ ຈາກໄພນ້ຳຖ້ວມ ຈໍານວນ 3 ຕື້ກີບ

ລັດວິສາຫະກິດໄຟຟ້າລາວ (ຟຟລ) ແລະ ບໍລິສັດ ຜະລິດ-ໄຟຟ້າ ລາວ ມະຫາຊົນ (ຜ-ຟຟລ) ຮ່ວມສົມທົບທຶນເພື່ອຊ່ວຍເຫຼືອ ຜູ້ທີ່ໄດ້ຮັບຜົນກະທົບ ຈາກໄພນ້ຳຖ້ວມ

ເພື່ອເປັນການປະກອບ ສ່ວນບັນເທົາທຸກຜູ້ທີ່ໄດ້ຮັບຜົນກະທົບຈາກໄພນໍ້າຖ້ວມໃນທົ່ວປະເທດ, ໃນວັນທີ 4 ຕຸລາ 2018, ທີ່ສໍານັກງານນາຍົກ ລັດຖະມົນຕີແຫ່ງ ສປປ ລາວ ຄະນະການນໍາກະຊວງພະລັງ ງານ ແລະ ບໍ່ແຮ່, ລັດວິສາຫະກິດໄຟຟ້າລາວ (ຟຟລ) ແລະ ບໍລິສັດ ຜະລິດ-ໄຟຟ້າ ລາວ ມະຫາຊົນ (ຜ-ຟຟລ) ໄດ້ມອບເງິນຈຳນວນ 3 ຕື້ກີບ ໃຫ້ກັບລັດຖະບານ ເພື່ອນໍາໄປຊື້ແນວພັນພືດ ມອບໃຫ້ກັບຄອບຄົວທີ່ໄດ້ຮັບຜົນກະທົບຈາກ ໄພນໍ້າຖ້ວມໃນທົ່ວປະເທດ. ພິທີມອບ-ຮັບເງິນດັ່ງ ກ່າວ ໄດ້ຈັດຂຶ້ນໃນວັນທີ 4 ຕຸລານີ້ ທີ່ຫ້ອງວ່າການ ສຳນັກງານນາຍົກລັດຖະມົນຕີ ຕາງໜ້າໃຫ້ 2 ບໍລິສັດດັ່ງກ່າວ ກ່າວມອບໂດຍ ທ່ານ ຄຳມະນີ ອິນທິລາດ ລັດຖະມົນຕີກະຊວງພະລັງງານ ແລະ ບໍ່ແຮ່ ແລະ ກ່າວຮັບໂດຍ ທ່ານ ເພັດ ພົມພິພັກ ລັດຖະມົນຕີ, ຫົວໜ້າຫ້ອງວ່າການສຳນັກງານນາຍົກລັດຖະມົນຕີ.

ທ່ານ ເພັດ ພົມພິພັກ ໄດ້ກ່າວສະແດງຄວາມຂອບໃຈຕໍ່ ຟຟລ ແລະ ຜ-ຟຟລ ທີ່ໄດ້ປະກອບສ່ວນເງິນຊ່ວຍເຫຼືອຄັ້ງນີ້ ເພື່ອຊ່ວຍລັດຖະບານໃນການບັນເທົາຄວາມເດືອດຮ້ອນຂອງຊາວກະສິກອນທີ່ໄດ້ຮັບຜົນກະທົບຈາກໄພນຳ້ຖ້ວມໃນຂອບເຂດທົ່ວປະເທດ, ເງິນຈຳນວນດັ່ງກ່າວ ຈະໄດ້ມອບໃຫ້ກະຊວງກະສິກຳ ແລະ ປ່າ ໄມ້ ເພື່ອນຳໄປຊ່ວຍເຫຼືອຊາວກະສິກອນບັນດາແຂວງ ແຕ່ຕ້ອງໄດ້ເບິ່ງຄວາມຕ້ອງການອັນຮີບດ່ວນຂອງແຕ່ລະທ້ອງ ຖິ່ນ ເປັນຕົ້ນແມ່ນ ແນວພັນພືດ ແລະ ເຂົ້າ ເພື່ອສະໜອງແນວພັນໃຫ້ເຂົາເຈົ້າທັນກັບການຜະລິດລະດູແລ້ງທີ່ຈະມາເຖິງນີ້.

(ຂ່າວ: ຄຳເຮືອງ)

ຂໍ້ມູນ: ນສພ ປະຊາຊົນ