ວິທະຍາໄລ ກະສິກຳ ແລະ ປ່າໄມ ພາກເໜືອ ສະເຫຼີມສະຫຼອງວັນຄູແຫ່ງຊາດຄົບຮອບ 24 ປີ

0
107

ໃນຕອນເຊົ້າ ວັນທີ 5 ຕຸລາ 2018 ນີ້, ທີ່ສະໂມສອນ ຂອງ ວິທະຍາໄລກະສິກຳ ແລະ ປ່າໄມ້ ພາກເໜືອ ໄດ້ຈັດພິທີສະເຫຼີມສະຫຼອງວັນຄູແຫ່ງຊາດ ຄົບຮອບ 24 ປີ ( ວັນທີ 7 ຕຸລາ 1994 – ວັນທີ 7 ຕຸລາ 2018 ) ໂດຍການເປັນກຽດເຂົ້າຮ່ວມ ຂອງທ່ານ ສົມສີ ຄໍາມະນີວົງ ຮອງອຳນວຍການວິທະຍາໄລ, ມີຫົວໜ້າ-ຮອງຫ້ອງການ, ຫົວໜ້າ-ຮອງ ຄະນະວິຊາ, ພະນັກງານ, ຄ-ອາຈານ ພ້ອມດ້ວຍນັກສຶກສາທັງໝົດ ພາຍໃນວິິທະຍາໄລເຂົ້າຮ່ວມຢ່າງພ້ອມພຽງ.

ໃນພິທີ ທ້າວ ຄໍາພູ ວົງອິນແປງ ຕາງໜ້ານັກສຶກສາ ໄດ້ຂຶ້ນອ່ານປະຫວັດຄວາມເປັນມາຂອງວັນຄູແຫ່ງຊາດ ຊຶ່ງເລີ່ມມາແຕ່ນາຍຄູຄຳເປັນຜູ້ທຳອິດຢູ່ໃນ ສາທາລະນະລັດ ປະຊາທິປະໄຕ ປະຊາຊົນລາວ, ຄູຄຳໄດ້ຜ່ານຜ່າອຸປະສັກນາໆປະການຢ່າງລະອິດລະອ້ຽວ ພາຍຫຼັງທີ່ປະຊົນລຸກຮື້ຂື້ນຍຶດອຳນາດໃນວັນທີ່ 12 ຕຸລາ 1945 ເປັນຕົ້ນມາ ການສຶກສາໄດ້ມີລັກສະນະຊາດ ຈຶ່ງຄ່ອຍປະກົດຕົວເປັນຮູບເປັນຮ່າງມາເທື່ອລະກ້າວ, ສາທາລະນະລັດ ປະຊາທິປະໄຕ ປະຊາຊົນລາວ ໄດ້ຮັບການສະຖາປານາໃນວັນທີ 2 ທັນວາ 1975 ໄດ້ເປັນເງື່ອນໄຂ ເອື້ອອຳນວຍໃຫ້ແກ່ການສຶກສາຂອງລາວໄດ້ຮັບການພັດທະນາ,

ໂຮງຮຽນໄດ້ຂະຫຍາຍຕົວໄວຈາກຕົວເມືອງໄປສູ່ຊົນນະບົດ, ລູກຫຼານຂອງປະຊາຊົນບັນດາເຜົ່າໄດ້ຮັບການສຶກສາຮ່ຳຮຽນຢ່າງເປັນລະບົບຕໍ່ເນື່ອງ ເຊິ່ງມີຄູເປັນຜູ້ສິດສອນຮ່ຳຮຽນໃຫ້ເຂົາເຈົ້າຮູ້ຈັກຮັກຫອມປະເທດຊາດ ແລະ ນຳເອົາຄວາມສົມບູນທູນສຸກມາສູ່ປະຊາຊົນບັນດາເຜົ່າ ຊື່ສຽງຂອງຄູໄດ້ຕິດພັນກັບຂະບວນການວິວັດແຫ່ງການພັດທະນາປະເທດຊາດມາແຕ່ລະສະໄໝ, ປະເທດຊາດມີຄວາມຈະເລີນກ້າວໜ້າເທົ່າໃດກໍ່ຍິງເຮັດໃຫ້ສັງຄົມມີຄວາມລະນືກເຖິງບຸນຄຸນອັນດີງາມຂອງຄູຫຼາຍຂຶ້ນ, ເມື່ອເປັນແນວນັ້ນຈຶ່ງມີຄວາມຈຳເປັນກຳນົດໃຫ້ມີວັນຄູແຫ່ງຊາດ, ໂດຍກຳນົດເອົາວັນເຂົ້າຮັບລາດສະການຂອງນາຍຄູຄຳ ເຊິ່ງເປັນຄູຜູ້ທຳອິດຂອງສັນຊາດລາວຄື ວັນທີ 7 ຕຸລາ ເປັນວັນຄູແຫ່ງຊາດ, ພ້ອມທັງຮຽກຮ້ອງໃຫ້ຄູ – ອາຈານ ຈົ່ງຮັກສາມູນເຊື້ອຮັກອາຊີບຄູ, ແພງເດັກ ແລະ ມີຄວາມອົດທົນຜ່ານຜ່າຂໍ້ຫຍຸ້ງຍາກ ເອົາໃຈໃສ່ພັດທະນາຕົນເອງໃຫ້ເປັນແບບຢ່າງນໍາໜ້າ ເປັນຄູທີ່ດີ, ເປັນແມ່ພິມຂອງຊາດ.

ຫຼັງຈາກນັ້ນ ຕາງໜ້ານັກສຶກສາແຕ່ລະຫ້ອງໄດ້ຂຶ້ນອ່ານສານອວຍພອນຄູ ພ້ອມທັງ ມອບຊໍ່ດອກໄມ້ ແລະ ຂອງຂວັນໃຫ້ແກ່ຄະນະອໍານວຍການວິທະຍາໄລ, ຫົວໜ້າຫ້ອງການ-ຄະນະວິຊາ ພ້ອມພັງພະນັກງານ, ຄູ-ອາຈານແຕ່ລະຫ້ອງການ.

ຫຼັງຈາກນັ້ນ ທ່ານ ສົມສີ ຄໍາມະນີວົງ ຮອງອຳນວນການວິທະຍາໄລ ໄດ້ມີຄຳເຫັນ ແລະ ໃຫ້ຄຳໂອວາດ ທ່ານໄດ້ຍ້ອງຍໍຊົມເຊີຍຕໍ່ຜົນງານທີ່ພະນັກງານ, ຄູ-ອາຈານ ແລະ ນັກສຶກສາທີ່ຍາດມາໄດ້ໃນໄລຍະທີ່ຜ່ານມາ. ເຊິ່ງເພິ່ນໄດ້ເນັ້ນໜັກໃຫ້ຄູ-ອາຈານຈົ່ງສືບຕໍ່ປະຕິບັດແບບແຜນການສິດສອນໃຫ້ມີປະສິດທິພາບ, ສຳລັບນັກສຶກສາແມ່ນໃຫ້ເອົາໃຈໃສ່ ຕັ້ງໜ້າໃນການຄົ້ນຄວ້າສຶກສາຮ່ຳຮຽນໃຫ້ສົມກັບເປັນຜູ້ສືບທອດທີ່ດີຂອງຊາດໃນອະນາຄົດ.

ໃນຕອນທ້າຍພິທີ ຍັງໄດ້ຊົມການສະແດງສິລະປະວັນນະຄະດີ ຂອງນັກສຶກສາທີ່ໄດ້ຊະນະເລີດໃນການແຂ່ງຂັນສິລະປະ-ວັນນະຄະດີໃນຄໍ່າຄືນທີ່ຜ່ານມາ. ນອກນັ້ນ ຍັງໄດ້ມີການແຂ່ງຂັນກິລາມວນຊົນຂອງນັກສຶກສາ ຊຶ່ງມີ: ການແຂ່ງຂັນກິນໄວ, ກິລາຕີກ໋ອບຊາວບ້ານ, ດຶງເຊືອກ ແລະ ການແຂ່ງຂັນກິລາເປຕັ່ງ ຂອງຄູ-ອາຈານ ເພື່ອຊິງຂັນຂອງອໍານວຍການວິທະຍາໄລຕື່ມອີກ.

#ຮູບພາບບັນຍາກາດເພີ່ມເຕີມ https://photos.app.goo.gl/giWT9Se2SXZ3BzQc7

—————————————-

ພາບ-ຂ່າວໂດຍ: ສີສະຫວາດ ພັນທຸວົງ,

ຫ້ອງການພົວພັນ ແລະ ການຮ່ວມມື, ວິທະຍາໄລກະສິກຳ ແລະ ປ່າໄມ້ ພາກເໜືອ