ໂຮງຮຽນມັດທະຍົມສົມບູນນ້ຳບາກ ສະເຫຼີມ-ສະຫຼອງວັນຄູແຫ່ງຊາດ 7 ຕຸລາ ຄົບຮອບ 24 ປີ

ວັນທີ 5 ຕຸລາ 2018 ຜ່ານມານີ້ ຢູ່ໂຮງຮຽນມັດທະຍົມສົມບູນນ້ຳບາກ, ເມືອງນ້ຳບາກ, ແຂວງຫຼວງພະບາງ ໄດ້ຈັດພິທີສະເຫຼີມ-ສະຫຼອງວັນຄູແຫ່ງຊາດ ຄົບຮອບ 24 ປີຂື້ນ. ເປັນກຽດເຂົ້າຮວ່ມຂອງທ່ານ ຄຳວອນແກ້ວ ລຸນໜູນ ຮອງເຈົ້າເມືອງນ້ຳບາກ, ທ່ານ ບຸນທັນ ຈັນທະສີດາ ຮອງຫົວໜ້າຫ້ອງການສຶກສາທິການ ແລະ ກິລາເມືອງ, ທ່ານ ຈັນທີ ແພງບົວມົນ ອຳນວຍການໂຮງຮຽນ, ມີແຂກຖືກເຊີນ, ສະມາຄົມພໍ່ແມ່ນັກຮຽນ ພ້ອມດວ້ຍຄູອາຈານ ແລະ ນ້ອງນັກຮຽນເຂົ້າຮວ່ມຢ່າງຫຼວງຫຼາຍ.

ພິທີທ່ານ ຈັນທີ ແພງບົວມົນ ອຳນວຍການໂຮງຮຽນ ມັດທະຍົມສົບບູນນ້ຳບາກ ໄດ້ໃຫ້ກຽດເລົ່າປະຫວັດວັນຄູແຫ່ງຊາດ 7 ຕຸລາ ເຊີ່ງມວນມະນຸດ ໄດ້ດຳເນີນການພັດທະນາຕົນເອງ ໃຫ້ມີຄວາມກ້າວໜ້າໄປຢ່າງບໍ່ຢຸດຢັ້ງ ອັນໄດ້ເຮັດໃຫ້ສັງຄົມມະນຸດ ໄດ້ມີການປຽ່ນແປງຈາກລະບອບນີ້ ໄປສູ່ລະບອບອື່ນ ໃນຂະບວນວິວັດພັດທະນາດັ່ງກ່າວ ຄູໄດ້ມີບົດບາດປະກອບສວ່ນອັນສຳຄັນ ທີ່ບໍ່ມີໃຜ ແລະ ຊັ້ນຄົນໃດຈະປະຕິເສດໄດ້ ຄຳວ່າຄູແມ່ນຄຳເວົາທີ່ໄດ້ສືບທອດກັນມາຫຼາຍເຊັ່ນຄົນມາແລ້ວ ຄູ ໝາຍເຖີງຄົນທີ່ມີຄວາມຮູ້ ແລະ ປະສົບການນັ້ນໄປສູ່ຜູ້ອື່ນຯ, ຮູບການຖ່າຍທອດຄວາມຮູ້ຈາກຜູ້ຮູ້ໄປສູ່ຜູ້ບໍ່ຮູ້ ເອີ້ນວ່າການສອນ ແລະ ການຮຽນ.

ພວກເຮົາມີຖັນແຖວຄູ ທີ່ມີນ້ຳໃຈຮັກຫອມປະເທດຊາດ, ມີຄວາມຮູ້, ຄວາມສາມາດ ປະກອບສວ່ນເຂົ້າໃນການພັດທະນາຊັບພະຍາກອນມະນຸດອອກຮັບໃຊ້ວຽກງານຂອງປະເທດຊາດ ເພື່ອນຳເອົນຄວາມສົມບູນພຸນສຸກມາສູ່ປະຊາຊົນ; ຊື່ສຽງຂອງຄູ ໄດ້ຕິດພັນກັບຂະບວນວິວັດ ແຫ່ງການພັດທະນາປະເທດຊາດມາແຕ່ລະສະໄໝ, ດັ່ງນັ້ນເພື່ອໃຫ້ລະນຶກເຖີງຄຸນງາມຄວາມດີຂອງຄູໃນສັງຄົມ ໄດ້ກາຍເປັນພຶດຕິກຳຕົວຈິງຈີ່ງຕ້ອງໄດ້ມີຄວາມຈຳເປັນໃຫ້ມີວັນຄູແຫ່ງຊາດລາວ. ໂດຍໄດ້ກຳນົດເອົາວັນເຂົ້າຮັບລາດຊະການຂອງນາຍຄູຄຳ ເຊີ່ງເປັນຄູຜູ້ທຳອິດ ແລະ ກຳເນີດວັນທີ 7 ຕຸລາ ເພື່ອເປັນວັນຄູແຫ່ງຊາດລາວ ຕັ້ງແຕ່ປີ 1994 ຈົນມາຮອດປັດຈຸບັນນີ້.

ໃນພິທີຍັງໄດ້ມອບໃບຍ້ອງຍໍຄູຜູ້ທີ່ມີຜົນງານດີເດັ່ນໃນການປະຕິບັດໜ້າທີ່ວຽກງານໃນສົກຮຽນຜ່ານມາ ຈາກພະແນກສຶກສາທິການ ແລະ ກິລາແຂວງ ຈຳນວນ 11 ທ່ານ, ຈາກທ່ານເຈົ້າເມືອງນ້ຳບາກ 18 ທ່ານ, ລາງວັນຄູປະເພດດີ 19 ທ່ານ, ປະເພດກາງ 16 ທ່ານ, ຄູສອນດີ-ສອນເກັ່ງ 11 ທ່ານ, ຄູສອນດີ 45 ທ່ານ ແລະ ນັກຮຽນດີເດັ່ນຕື່ມອີກ ໃຫ້ກຽດມອບໃບຍ້ອງຍໍໂດຍແມ່ນທ່ານ ຄຳວອນ ແກ້ວລຸນໜູນ ຮອງເຈົ້າເມືອງນ້ຳບາກ, ທ່ານ ບຸນທັນ ຈັນທະສີດາ ຮອງຫົວໜ້າຫ້ອງການສຶກສາທິການແລະ ກິລາເມືອງ ຕາມລຳດັບ. ຈາກນັ້ນກໍ່ໄດ້ຮັບຊົມການສະແດງສີລະປະວັນນະຄະດີ, ການແຂ່ງຂັນກິລາ ດວ້ຍຄວາມເບີກບານມວ່ນຊື່ນ.

ພອນສັກ ສິງດາລັກ ( ນັກຂ່າວເມືອງນ້ຳບາກ )