ຂະບວນຄາລາວານສະຫະພັນແມ່ຍິງລາວ ຢ້ຽມຢາມກອງກຳລັງປ້ອງກັນຜາຖີ່

ຂປລ. ໃນວັນທີ 10 ຕຸລາ 2018 ນີ້, ຂະບວນຄາລາວານສະຫະພັນແມ່ຍິງລາວ ສູ່ເມືອງວຽງໄຊ ຖານທີ່ໝັ້ນຂອງການປະຕິວັດ ໄດ້ເດີນທາງໄປຢ້ຽມຢາມໃຫ້ກຳລັງໃຈກອງກຳລັງປ້ອງກັນຊາດ (ກອງຮ້ອຍ18 ສັງກັດກອງພັນໃຫຍ່163) ທີ່ປະຈຳການຢູ່ຜາຖີ່ ເຊິ່ງເປັນຈຸດຍຸດທະສາດການທະຫານ ແລະ ສະຖານທີ່ທ່ອງທ່ຽວທຳມະຊາດຕິດພັນກັບປະຫວັດສາດປົດປ່ອຍຊາດລາວ.

ການໄປຢ້ຽມຢາມຄັ້ງນີ້, ຄອບຄົວການນຳພັກ-ລັດ ພ້ອມດ້ວຍລູກຫລານ ໄດ້ນຳເອົາເຄື່ອງນຸ່ງຫົ່ມຈຳນວນໜຶ່ງມອບໃຫ້ກອງກຳລັງດັ່ງກ່າວ ແລະ ມອບໃຫ້ປະຊາຊົນບ້ານເມືອງຍືດ ຈຳນວນ 14 ຄອບຄົວ ທີ່ໄດ້ຮັບຜົນກະທົບຈາກໄພພິບັດທາງທຳມະຊາດເມື່ອທ້າຍເດືອນສິງຫາ 2018 ຜ່ານມາ.

ເປັນກຽດມອບໂດຍ ທ່ານ ນາງ ນາລີ ສີສຸລິດ ພັນລະຍາທ່ານ ທອງລຸນ ສີສຸລິດ ນາຍົກລັດຖະ ມົນຕີແຫ່ງ ສປປ ລາວ. ໃນໂອກາດດຽວກັນ, ທ່ານ ນາງ ອິນລາວັນ ແກ້ວບຸນພັນ ປະທານສູນກາງສະຫະພັນແມ່ຍິງລາວ, ປະທານຂະບວນຄາລະວານ ກໍໄດ້ມອບເຄື່ອງໃຫ້ກອງຮ້ອຍ 18 ປະຈຳຜາຖີ່ ເຊິ່ງປະກອບມີ ໝີ່ຈຳນວນໜຶ່ງ, ຕູ້ລຳໂພງ 1 ຊຸດ ແລະ ເງິນຊຸກຍູ້ຈຳນວນ 10 ລ້ານກີບ; ມອບເຄື່ອງໃຫ້ກອງພັນໃຫຍ່ 163 ປະກອບມີ ໝີ່, ຕູ້ລຳໂພງ 1 ຊຸດ ແລະ ເງິນຊຸກຍູ້ຈຳນວນ 5 ລ້ານກີບ ເພື່ອນຳໄປປັບປຸງບູລະນະຄ້າຍຄູ ແລະ ບໍລິຫານວຽກງານຂອງຕົນໃຫ້ມີຄວາມສະດວກຍິ່ງຂຶ້ນ.

ໃນການມອບເຄື່ອງຄັ້ງນີ້ໂດຍການເຂົ້າຮ່ວມຂອງທ່ານ ພູໂຊນ ທຳມະວີໄຊ ຮອງເຈົ້າແຂວງໆຫົວພັນ, ບັນດາທ່ານໃນການນຳແຂວງ, ບັນດາພະແນກການ, ກົມກອງ ຕະຫລອດຮອດນັກຄາລະວານເຂົ້າຮ່ວມນຳ.

ຂ່າວ: ໄອ່ແກ້ວ