ສຄຂ-ສູນພັດທະນາຫຼັກສູດ ຄອງແຊ໋ມເປຕັງ-ປິ່ງປ່ອງ ທົ່ວ ສວສ ຕ້ອນຮັບວັນຄູແຫ່ງຊາດ

ສູນໂຄສະນາຂ່າວສານ ການສຶກສາ ແລະ ກິລາ ຫຼື ສຄຂ ແລະ ສູນພັດທະນາຫຼັກສູດ ຄອງແຊ໋ມການແຂ່ງຂັນກິລາເປຕັງ ແລະ ກິລາປິ່ງປ່ອງ ປະຈຳປີ 2018 ທົ່ວສະຖາບັນຄົ້ນຄວ້າວິທະຍາສາດການສຶກສາ (ສວສ) ກະຊວງສຶກສາທິການ ແລະ ກິລາ ເພື່ອສ້າງຂະບວນການຄຳນັບຮັບຕ້ອນວັນຄູແຫ່ງຊາດ ຄົບຮອບ 24 ປີ (7 ຕຸລາ 1994-7 ຕຸລາ 2018) ທີ່ກຳລັງຈະໝູນວຽນມາບັນຈົບຄົບຮອບອີກວາລະໜຶ່ງ ໃຫ້ມີບັນຍາກາດຟົດຟື້ນ, ເບີກບານມ່ວນຊື່ນ ແລະ ມີຄວາມໝາຍສຳຄັນເລິກເຊິ່ງ.

ພິທີມອບ-ຮັບລາງວັນໃນຄັ້ງນີ້ ໄດ້ຈັດຂຶ້ນເມື່ອວັນທີ 4 ຕຸລາ ຜ່ານມາ ທີ່ຫ້ອງປະຊຸມ ສວສ, ໂດຍໃຫ້ກຽດເຂົ້າຮ່ວມ ແລະ ມອບຂອງ ທ່ານ ຮສ.ປອ ຄຳຜາຍ ສີສະຫວັນ ຮອງລັດຖະມົນຕີ ກະຊວງສຶກສາທິການ ແລະ ກິລາ, ຜູ້ຊີ້ນຳ ສວສ ແລະ ທ່ານ ປອ. ອ່ອນແກ້ວ ນວນນະວົງ ຜູ້ອຳນວຍການສະຖາບັນຄົ້ນຄວ້າວິທະຍາສາດການສຶກສາ, ມີຄະນະສະຖາບັນ, ບັນດາຜູ້ອຳນວຍການສູນ ພ້ອມດ້ວຍຄະນະ, ພະນັກງານ, ລັດຖະກອນ ແລະ ນັກກິລາແຕ່ລະພາກສ່ວນ.

ການແຂ່ງຂັນກິລາທັງ 2 ປະເພດດັ່ງກ່າວ ແມ່ນໄດ້ຈັດຂຶ້ນຕັ້ງແຕ່ວັນທີ 21 ກັນຍາ ຫາວັນທີ 3 ຕຸລາ 2018 ກໍ່ສຳເລັດລົງຕາມລະດັບຄາດໝາຍ. ໃນນີ້, ສະເພາະກິລາເປຕັງແມ່ນແຂ່ງຂັນແບບປະເພດທີມປະສົມຊາຍ 2, ຍິງ 1 ມີທັງໝົດ 12 ທີມເຂົ້າຮ່ວມ ທີ່ມາຈາກ 5 ສູນ ແລະ 1 ພະແນກບໍລິຫານ ປະກອບມີ: ທີມສູນໂຄສະນາຂ່າວສານການສຶກສາ ແລະ ກິລາ 2 ທີມ (A-B), ທີມພະແນກບໍລິຫານ+ຫ້ອງສະໝຸດ 2 ທີມ, ທີມສູນພາສາຕ່າງປະເທດ 2 ທີມ, ທີມສູນພັດທະນາຫຼັກສູດ 2 ທີມ, ທີມສູນຄົ້ນຄວ້າ-ປະເມີນຜົນ 2 ທີມ ແລະ ທີມສູນພັດທະນາສື່ການຮຽນການສອນ 2 ທີມ. ເຊິ່ງ ແຂ່ງວັນຈັນ-ວັນສຸກ ເລີ່ມແຕ່ເວລາ 16:00 ໂມງ ເປັນຕົ້ນໄປ (ແຂ່ງຂັນມື້ລະຄູ່), ການແຂ່ງຂັນແບ່ງອອກເປັນ 2 ສາຍ, ແຂ່ງແບບເສຍຕົກຮອບເລີຍ ແລະ ທີມຊະນະແມ່ນຜ່ານເຂົ້າສູ່ຮອບຕໍ່ໄປ. ຜ່ານການແຂ່ງຂັນຜົນປາກົດວ່າ ອັນດັບທີ 1 ໄດ້ແກ່ ທີມສູນໂຄສະນາຂ່າວສານການສຶກສາ ແລະ ກິລາ, ອັນດັບທີ 2 ທີມພະແນກບໍລິຫານ+ຫ້ອງສະໝຸດ ແລະ ອັນດັບທີ 3 ທີມສູນພັດທະນາສື່ການຮຽນການສອນ.

ສ່ວນການແຂ່ງຂັນກິລາປິ່ງປ່ອງ ມີທັງໝົດ 6 ທີມເຂົ້າຮ່ວມຄື: ທີມພະແນກບໍລິຫານ+ຫ້ອງສະໝຸດ, ທີມສູນພາສາຕ່າງປະເທດ, ທີມສູນພັດທະນາຫຼັກສູດ, ທີມສູນຄົ້ນຄວ້າ-ປະເມີນຜົນ, ທີມສູນໂຄສະນາຂ່າວສານ ການສຶກສາ ແລະ ກິລາ ແລະ ທີມສູນພັດທະນາສື່ການຮຽນການສອນ. ເຊິ່ງແຂ່ງຂັນໃນວັນທີ 3 ຕຸລານີ້ (ແຂ່ງຂັນມື້ດຽວຈົບເລີຍ). ຜ່ານການແຂ່ງຂັນຜົນປາກົດວ່າ ອັນດັບທີ 1 ໄດ້ແກ່ ທີມສູນພັດທະນາຫຼັກສູດ, ອັນດັບທີ 2 ທີມສູນໂຄສະນາຂ່າວສານ ການສຶກສາ ແລະ ກິລາ ແລະ ອັນດັບທີ 3 ທີມສູນພາສາຕ່າງປະເທດ.

ການແຂ່ງຂັນກິລາຄັ້ງນີ້ ນອກຈາກເປັນການສ້າງຂະບວນການຄຳນັບຮັບຕ້ອນວັນຄູແຫ່ງຊາດ ຄົບຮອບ 24 ປີແລ້ວ ຍັງເປັນການສ້າງຄວາມສາມັກຄີຮັກແພງ, ແລກປ່ຽນບົດຮຽນເຊິ່ງກັນແລະກັນ ລະຫວ່າງພະນັກງານ, ລັດຖະກອນພາຍໃນ ສວສ ດ້ວຍກັນໃຫ້ມີຄວາມແໜ້ນແຟ້ນຍິ່ງໆຂຶ້ນ ແນໃສ່ເຮັດໃຫ້ການປະຕິບັດໜ້າທີີ່ວຽກງານ ແລະ ຂອດປະສານງານ ໃຫ້ມີຄວາມສະດວກສະບາຍຂຶ້ນກວ່າເກົ່າ.

ຂ່າວໂດຍ: ລູກນ້ຳເຊ