ໜ່ວຍພັກໄອຍະການແຂວງສາລະວັນ ຕີລາຄາວຽກງານເຄິ່ງສະໄໝທີ III

ສາລະວັນ: ວັນທີ 8 ຕຸລາ 2018 ຜ່ານມາ ອົງການໄອຍະການປະຊາຊົນແຂວງ ຕີລາຄາການນຳພາຮອບດ້ານເຄິ່ງສະໄໝທີ III ຕິດພັນກັບການດຳເນີນຊີວິດການເມືອງ ຢູ່ທີ່ຫ້ອງປະຊຸມ. ໂດຍການເປັນປະທານຂອງ ທ່ານ ຄໍາພັນ ລາຕິກຸນ ຮອງເລຂາໜ່ວຍພັກ ຮອງຫົວໜ້າອົງການໄອຍະການແຂວງ, ມີແຂກທີ່ຖືກເຊີນຈາກພະແນກການອ້ອມຂ້າງ ພ້ອມດ້ວຍສະມາຊິກພັກ, ພະນັກງານລັດຖະກອນພາຍໃນອົງການໄອຍະການເຂົ້າຮ່ວມ.

ທ່ານ ຄຳພັນ ລາຕິກຸນ ຮອງຫົວໜ້າອົງການໄອຍະການປະຊາຊົນແຂວງ ໄດ້ຜ່ານບົດຫຼຸບຕີລາຄາການເຄື່ອນໄຫວວຽກງານອົງການໄອຍະການໃນໄລຍະເຄິ່ງສະໄໝທີ III ຜ່ານມາ: ຄຽງຄູ່ກັບການສຶກສາອົບຮົມການເມືອງແນວຄິດໄດ້ເຮັດໃຫ້ວຽກງານການພັດທະນາອົງການໄອຍະການໄດ້ຮັບການປັບປຸງຍົກລະດັບໃຫ້ມີຄວາມໜັກແໜ້ນເຂັ້ມແຂງຂື້ນເລື້ອຍໆ.

ເອົາໃຈໃສ່ຄົ້ນຄວ້າວາງແຜນການຈັດຕັ້ງປະຕິບັດແຜນງານ, ໂຄງການ ແລະຄາດໝາຍສູ້ຊົນໃນການແກ້ໄຂວຽກງານດ້ານວິຊາສະເພາະໃຫ້ໄດ້ມີຜົນສຳເລັດເປັນກ້າວໆເປັນຕົ້ນ: ການຕິດຕາມກວດກາການປະຕິບັດກົດໝາຍຂອງອົງການສືບສວນ-ສອບສວນ ຂັ້ນຕ່າງໆມີທັງໝົດ 557 ເລື່ອງ, ຄະດີຄ້າງມາປີກ່ອນ 19 ເລື່ອງ, ຄະດີອາຍາຂັ້ນອຸທອນ 11 ເລື່ອງ, ໃນນັ້ນຄະດີອາຍາຂັ້ນຕົ້ນ 576 ເລື່ອງ, ຄົ້ນຄວ້າ ແລະແກ້ໄຂຕາມກໍລະນີຕ່າງໆໄດ້ທັງໝົດ 554 ເລື່ອງ ເທົ່າກັບ 94.37% ຂອງຄະດີອາຍາທັງໝົດ.

ພາບ-ຂ່າວ: ທິດລານີ ໂຄດໂຍທາ