ເມືອງເງິນເປີດກອງປະຊຸມ 3 ຝ່າຍ ລະຫວ່າງພາກລັດ, ນັກທຸລະກິດ ແລະ ອົງການປົກຄອງບ້ານ

0
97

ວັນທີ 9 ຕຸລາ 2018 ນີ້ ຢູ່ທີສະໂມສອນ ເມືອງເງິນ ແຂວງ ໄຊຍະບູລີ. ໄດ້ເປີດກອງປະຊຸມ 3 ຝ່າຍ ລະຫວ່າງພາກລັດ, ນັກທຸລະກິດ ແລະ ອົງການປົກຄອງບ້ານ ປະຈຳປີ 2018. ພາຍໃຕ້ການເປັນປະທານ ຂອງທ່ານ ທະວິສັກ ໄຊຍະວົງ ຄະນະປະຈຳພັກເມືອງ ຮອງເຈົ້າເມືອງ, ມີຫົວໜ້າຫ້ອງການທີກ່ຽວຂ້ອງ, ເລຂາຄະນະພັກຮາກຖານ, ອົງການປົກຄອງບ້ານ, ນັກທຸລະກິດ, ຕະຫຼອດຮອດພະນັກງານວິຊາການທີ່ກ່ຽວຂ້ອງເຂົ້າຮ່ວມທັງໝົດ 60 ທ່ານ, ຍິງ 5 ທ່ານ.

ທ່ານ ຄຳນວນ ແກ້ວວັນໄຊ ປະທານສະມາຄົມສົ່ງເສີມກະສິກຳ ເພື່ອສົ່ງອອກ ເມືອງເງິນ – ຫົງສາ ໄດ້ຜ່ານບົດສະຫຼຸບວຽກງານຂອງສະມາຄົມໃນການຈັດຕັ້ງເຄື່ອນໄຫວ. ໃນໄລຍະ ຜ່ານມາ ສະມາຄົມສົ່ງເສີມກະສິກຳ ເພື່ອສົ່ງອອກ ເມືອງເງິນ – ຫົງສາ ໄດ້ຊຸກຍູ້ສົ່ງເສີມພໍ່ແມ່ປະຊາຊົນບັນດາເຜົ່າ ປູກພືດກະສິກໍາເປັນຕົ້ນແມ່ນ ສາລີ, ໝາກເດືອຍ ແລະ ພືດອື່ນໆ. ໃນ1 ປີຜ່ານມາ ສາມາດເກັບຊື້ເຄືອງປ່າຂອງດົງ ແລະ ພືດກະສິກຳ ເພື່ອເຄື່ອນຍ້າຍ ໄດ້ທັງໝົດ 3,958 ໂຕນ ກັບນ້ຳຫົວສີໄຄເຄືອງ 650 ລິດ ລວມມູນຄ່າ 4,037,650,000 ກີບ. ທຽບໃສ່ໄລຍະດຽວກັນໃນປີຜ່ານມາ ເຫັນວ່າເພີ້ມຂື້ນ 244% ສາເຫດຍ້ອນວ່າ ໃນໄລຍະຜ່ານມາ ການເຄື່ອນຍ້າຍໝາກໂມ ແມ່ນຫຼາຍ ແລະ ເຄື່ອງປ່າຂອງດົງກະເພີ້ມຂື້ນ. ນອກນີ້ ສົ່ງອອກສິນຄ້າປະເພດຜົນຜະລິດກະສິກຳ ຈຳນວນ 1,003 ໂຕນ, ມູນຄ່າ 177,696 ໂດລາສະຫະລັດ,ເປັນຕົ້ນແມ່ນ ໝາກເດືອຍ,ຂິງດຳ, ໝາກນ້ຳມັນ, ໝາກງາ,ປໍສາ, ດອກແຂມ ແລະ ອື່ນໆ

ຈາກນັ້ນ ພາກລັດ, ນັກທຸລະກິດ ແລະ ອົງການປົກຄອງບ້ານ ກໍ່ໄດ້ປະກອບຄຳຄິດເຫັນຢ່າງກົງໄປກົງມາ ແລະ ສ້າງສັນ ເພື່ອຊອກໃຫ້ເຫັນ ຈຸດດີ, ຈຸດອອ່ນ ແລະ ຂໍຄົງຄ້າງ ເພື່ອພ້ອມກັນຈັດຕັ້ງແກ້ໄຂ, ໃນການປົກປ້ອງ ສິດ ແລະ ໜ້າທີ ຂອງຜູ້ຜະລິດ, ຜູ້ຊື້ສີ້ນຄ້າ ຢູ່ພາຍໃນເມືອງເງິນ ມີຄວາມໂປ່ງໃສ່ ຫຼີກລ້ຽງການເອົາລັດເອົາປຽບເຊີ່ງກັນ ແລະ ກັນ. ຕອນທ້າຍກໍ່ໄດ້ຜ່ານບົດບັນທຶກສັນຍາ ຄ້ຳປະກັນເລື່ອງລາຄາຂອງພືດກະສິກຳ ແລະ ເຄື່ອງປ່າຂອງດົງ ອີກດ້ວຍ.

ໂດຍ: ອິນແປງ ແຫວນຄຳ