ກອງປະຊຸມສະຫຼຸບຖອດຖອນບົດຮຽນວຽກງານກໍ່ສ້າງຮາກຖານການເມືອງ ແຂວງໄຊສົມບູນ

ໄຊສົມບູນ: ວັນທີ 5 ຕຸລາ 2018 ທີ່ກອງພັນໃຫຍ່ 101 ໄດ້ຈັດກອງປະຊຸມສະຫຼຸບຖອດຖອນບົດຮຽນວຽກງານກໍ່ສ້າງຮາກຖານການເມືອງ ແຂວງໄຊສົມບູນ ໂດຍການເປັນປະທານຂອງ ພົນຕີ ດ໋ອກເຕີ ທອງລອຍ ສິລິວົງ ເຈົ້າແຂວງ ແຂວງໄຊສົມບູນ ມີ ຫົວໜ້າກົມໃຫຍ່, ຫົວໜ້າກົມ, ຫົວໜ້າກອງບັນຊາການ ປ້ອງກັນຊາດ-ປ້ອງກັນຄວາມສະຫງົບແຂວງ ແລະ ພະແນກການທີ່ກ່ຽວຂ້ອງເຂົ້າຮ່ວມ.

ກອງປະຊຸມ ພັນໂທ ຈັນທີ ວັນລາວົງ ຫົວໜ້າກອງບັນຊາການທະຫານແຂວງໄຊສົມບູນ ໄດ້ຂຶ້ນຜ່ານບົດສະຫຼຸບການຈັດຕັ້ງປະຕິບັດ ຫັນພະນັກງານລົງກໍ່ສ້າງຮາກຖານການເມືອງແຂວງໄຊສົມບູນ ໄລຍະ 4 ເດືອນຜ່ານມາວ່າ: ພະນັກງານ-ນັກຮົບສ່ວນຫຼາຍມີແນວຄິດອຸ່ນອ່ຽນ ທຸ່ນທ່ຽງ, ເຊື່ອໝັ້ນຕໍ່ການນຳພາຂອງພັກເຄົາລົບລະບຽບກົດໝາຍຢ່າງເຂັ້ມງວດ, ເອົາໃຈໃສ່ປະຕິບັດໜ້າທີ່ວຽກງານວິຊາສະເພາະສຳເລັດຕາມຄາດໝາຍ ແລະ ປະຊາຊົນສ່ວນຫຼາຍໄດ້ເຂົ້າຮ່ວມວຽກງານ ປ້ອງກັນຊາດ-ປ້ອງກັນຄວາມສະຫງົບນັບມື້ນັບດີຂຶ້ນ, ແຕ່ມີປະຊາຊົນຈຳນວນໜຶ່ງຍັງບໍ່ທັນຮັບຮູ້ເຂົ້າໃຈຢ່າງເລິກເຊິ່ງຕໍ່ແນວທາງນະໂຍບາຍຂອງພັກ, ລະບຽບກົດໝາຍຂອງລັດ, ຫຼົງເຊື່ອຄຳໂຄສະນາຫຼອກລວງຂອງກຸ່ມຄົນບໍ່ດີ ພ້ອມທັງເຂົ້າຮ່ວມເຄື່ອນໄຫວກໍ່ຄວາມບໍ່ສະຫງົບ


ສະແດງອອກໃນການລົງແກ້ໄຂປະກົດການຫຍໍ້ທໍ້ຕ່າງໆ ມີຄະດີເກີດຂຶ້ນທັງໝົດ 54 ເລື່ອງ, ຢາເສບຕິດ 4 ເລື່ອງ, ແກ້ໄຂໄດ້ 2 ເລື່ອງ, ກັກຕົວມາດຳເນີນຄະດີ 3 ຄົນ, ຢຶດຢາເສບຕິດໄດ້ 179 ເມັດ, ອຸບັດຕິເຫດຕາມທ້ອງຖະໜົນເກີດຂຶ້ນ 30 ຄັ້ງ, ພາຫະນະເປເພ 46 ຄັນ, ຄົນໄດ້ຮັບບາດເຈັບ 55 ຄົນ, ເສຍຊີວິດ 9 ຄົນ, ລັກຊັບພົນລະເມືອງ 1 ເລື່ອງ, ຮັບຄຳຮອງຟ້ອງ 7 ເລື່ອງ, ຮັບແຈ້ງຄວາມ 10 ເຫດການ. ທິດທາງແຜນການໃນຕໍ່ໜ້າຈະເອົາໃຈໃສ່ຊີ້ນຳກຳລັງລົງກໍ່ສ້າງຮາກຖານການເມືອງຕັ້ງໜ້າເຮັດໜ້າທີ່ວຽກງານວິຊາສະເພາະ, ສຶກສາອົບຮົມການເມືອງນຳພາແນວຄິດ, ຕິດຕາມກວດກາ, ກຳແໜ້ນ, ສຶກສາອົບຮົມເປົ້າໝາຍ, ເພີ່ມທະວີບົດບາດການນຳພາ, ຊີ້ນຳກຸ່ມວຽກຂອງຕົນເຄື່ອນໄຫວໜ້າທີ່ຕາມພາລະບົດບາດໃຫ້ມີປະສິດທິພາບສູງ ແລະ ມີຄວາມສາມັດຄີພາຍໃນກຸ່ມວຽກ, ອົງການ, ກົມກອງເຄື່ອນໄຫວເຮັດໜ້າທີ່ໃຫ້ມີຄວາມໜັກແໜ້ນ ແລະ ເຮັດສຳເລັດຕາມຄາດໝາຍ.

ຂ່າວ,ພາບ: ຮຕ ພິລະພົນ ວົງພັກດີ