ອາຫານກັບຄວາມເຊື່ອຜິດໆທີ່ຄວນລົບລ້າງ…

0
179

ຄວາມເຊື່ອທີ່ເຊື່ອຕໍ່ໆກັນມາໂດຍບໍ່ໄດ້ຮັບການພິສູດຫລືຫາເຫດຜົນມາຮອງຮັບບໍ່ໄດ້ ແລະ ບາງເທື່ອກັບຢູ່ກົງກັນຂ້າມກັບຄວາມຈິງ ຄວາມເຊື່ອມີຢູ່ໃນທຸກວົງການ ແມ່ນແຕ່ແວດວົງກ່ຽວກັບອາຫານການກິນ ທີ່ຜ່ານມາມີຄວາມເຊື່ອກັນຢ່າງແພ່ຫລາຍວ່າ ອາຫານບາງຊະນິດບໍ່ດີຕໍ່ສຸຂະພາບເປັນອາຫານທີ່ບໍ່ຄວນບໍລິໂພກ ໂດຍເກັບເອົາຂໍ້ເສຍນ້ອຍໆມາອ້າງ ແລ້ວເບິ່ງຂ້າມປະໂຫຍດທີ່ມີຫລາຍກວ່າແບບໜ້າເສຍດາຍ ເຮົາຄວນມາພິຈາລະນາຄຸນຄ່າຂອງອາຫານເຫລົ່ານີ້ກັນໃໝ່ ລົບລ້າງຄວາມເຊື່ອຜິດໆເກົ່າໆອອກໄປ ເພື່ອຄວາມເຂົ້າໃຈທີ່ຖືກຕ້ອງ ແລະ ໄດ້ຮັບປະໂຫຍດຈາກການບໍລິໂພກອາຫານເຫລົ່ານັ້ນຢ່າງເຕັມທີ່.

1. ໄຂ່ໄກ່: ເຊື່ອວ່າກິນໄຂ່ທຸກມື້ບໍ່ດີເພາະມີຄໍເລດເຕີລໍ, ໄຂ່ແດງຍິ່ງເປັນສິ່ງຕ້ອງຫ້າມສຳຫລັບຜູ້ທີ່ເບິ່ງແຍງສຸຂະພາບຢ່າງເຄັ່ງຄັດ.
ຄວາມຈິງ: ໄຂມັນ ແລະ ໄຂມັນອີ່ມໂຕເປັນສາເຫດໃຫຍ່ໃນການເພີ່ມຄໍເລດເຕີລໍໃນເລືອດ ຫລາຍກວ່າຄໍເລດເຕີລໍທີ່ມີຢູ່ໃນອາຫານຕາມທຳມະຊາດ, ສ່ວນໄຂ່ແດງນັ້ນຍັງມີ “ລູຕິນ” (Lutein) ແລະ “ຊີຊານທິນ” (Zeaxanthin) ທີ່ມີການວິໄຈພົບວ່າສາມາດຫລຸດຄວາມສ່ຽງພາວະຈໍປະສາດຕາເສື່ອມ (AMD) ໃນຜູ້ສູງອາຍຸ ຊຶ່ງເປັນສາເຫດຂອງການຕາບອດໃນຜູ້ທີ່ມີອາຍຸຫລາຍກວ່າ 50 ປີ.

2. ຊີ້ນງົວ: ເຊື່ອວ່າ ອຸດົມໄປດ້ວຍໄຂມັນອີ່ມໂຕ ແລະ ຄໍເລດເຕີລໍ ເປັນອາຫານທີ່ຄວນຫລີກລ້ຽງສຳລັບຄົົນທີ່ເປັນພະຍາດຫົວໃຈ ແລະ ຄົົນທີ່ຮັກສຸຂະພາບເປັນພິເສດ.

ຄວາມຈິງ: ຊີ້ນແດງຂອງງົວນັ້ນເປັນແຫລ່ງໂປຕີນ ແລະ ທາດເຫລັກ ແຮ່ທາດທີ່ຈຳເປັນສຳຫລັບການລຳລຽງອອກຊິເຈນຈາກປອດໄປທີ່ຈຸລັງທົ່ວຮ່າງກາຍ ໂດຍສະເພາະຜູ້ຍິງທີ່ສູນເສຍທາດເຫລັກຈາກປະຈຳເດືອນ ຫລື ການເກີດລູກ ຂໍ້ແນະນຳໃນການບໍລິໂພກຄື: ຄວນເລືອກຊີ້ນທີ່ມີສີແດງເຂັ້ມ ມີລາຍຫີນອ່ອນໜ້ອຍໜຶ່ງ ເພາະເປັນຊີ້ນດີທີ່ມີໄຂມັນໜ້ອຍ.

3. ຊັອກໂກແລັດ: ເຊື່ອວ່າ ຊັອກໂກແລັດມີນ້ຳຕານສູງໄຂມັນສູງ ແລະ ລົດຫວານໆມັນໆ ບໍ່ດີຕໍ່ສຸຂະພາບ.

ຄວາມຈິງ: ຊັອກໂກແລັດມີຫລາຍແບບ, ແບບທີ່ມີປະໂຫຍດຫລາຍກວ່າໂທດຄື: ກາກຊັອກໂກແລັດເຂັ້ມຂຸ້ນ ເພາະມີສານແອນຕີອອກຊິແດນ (ສານຕ້ານອານຸມູນອິດສະຫລະ) ທີ່ຊ່ວຍປ້ອງກັນເສັ້ນເລືອດຕີບ ແລະ ວ່າງບໍ່ດົນມານີ້ ນັກວິໄຈໃນສະວິດເຊີແລນລາຍງານວ່າການກິນກາກຊັອກໂກແລັດ 40 ອອນ ທຸກມື້ ເປັນເວລາສອງອາທິດຕິດຕໍ່ກັນ ຈະຊ່ວຍເຮັດໃຫ້ຮໍໂມນຄວາມຄຽດຫລຸດລົງ ນັ້ນເປັນເລື່ອງຂອງການວິໄຈ ໃນຊີວິດຈິງກໍ່ຄວນກິນແຕ່ພໍປະມານ.

4. ມັນຝຣັ່ງ: ເຊື່ອວ່າມີຄ່ານ້ຳຕານຂ້ອນຂ້າງສູງ ຈຶ່ງເຮັດໃຫ້ລະດັບນ້ຳຕານໃນເສັ້ນເລືອດສູງຂຶ້ນຢ່າງວ່ອງໄວ ແລະ ຍັງເຂົ້າໄປຂັດຂວາງການເຮັດວຽກງານຂອງ ອິນຊູລິນ ທີ່ຊ່ວຍປິ່ນປົວລະດັບນ້ຳຕານ.

ຄວາມຈິງ: ມັນຝຣັ່ງເປັນແຫລ່ງໄຟເບີຫລືກາກໃຍໂພແທດຊຽມ ແລະ ວິຕາມິນຊີຊັ້ນດີ ຕໍ່ໃຫ້ກິນມັນຝຣັ່ງໝົດລູກກໍ່ບໍ່ມີຜົນຕໍ່ຄ່ານ້ຳຕານເທົ່າໃດ ຖ້າເພີ່ມນ້ຳມັນໝາກກອກລົງໄປໜ້ອຍໜຶ່ງເພາະໄຂມັນຈະຊ່ວຍຫລຸດຜ່ອນການດູດຊຶມຄາໂບໄຮເດດໃນມັນຝຣັ່ງໄດ້ອີກທາງໜຶ່ງ.

5. ເຂົ້າໜົມປັງຂາວ: ເຊື່ອວ່າເຂົ້າໜົມປັງຂາວເຕັມໄປດ້ວຍຄາໂບໄຮເດດ.

ຄວາມຈິງ: ຂົ້າໜົມປັງຂາວບໍ່ໄດ້ບໍ່ດີສະເໝີໄປ ແນວທາງໃໝ່ໃນການບໍລິໂພກຂອງຊາວອາເມລິກາ ມີການແນະນຳໃຫ້ກິນເຂົ້າໜົມປັງຂາວຢ່າງນ້ອຍເຄິ່ງໜຶ່ງຂອງທັນຍະພືດ ສະຫລັບກັບເຂົ້າໜົມປັງໂຮມວີດ 100 ເປີເຊັນ ຫລື ເຂົ້າໜົມປັງທັນຍະພືດບໍ່ຂັດສີອື່ນໆ ເພາະໄດ້ຮັບການພິສູດແລ້ວວ່າເປັນວິທີກິນເຂົ້າໜົມປັງທີ່ດີຕໍ່ສຸຂະພາບ ຫລາຍກວ່າການກິນເຂົ້າໜົມປັງແບບໃດແບບໜຶ່ງພຽງຢ່າງດຽວຊ້ຳໆກັນ.

ເມື່ອຮູ້ຄວາມຈິງແລ້ວ ຫລາຍຄົນອາດຈະກ້າກິນອາຫານທີ່ກ່າວມາຫລາຍຂຶ້ນ ເພາະມັນບໍ່ໄດ້ມີພິດມີໄພຕໍ່ສຸຂະພາບຫລວງຫລາຍ ແບບທີ່ເຊື່ອ (ຫລື ຖືກເຮັດໃຫ້ເຊື່ອ) ກັນມາດົນ.