ທ່ານເຈົ້າເມືອງນ້ຳບາກ ລົງຢ້ຽມຢາມປະຊາຊົນ ກຸ່ມບ້ານນ້ຳຊັດ

ຫຼວງພະບາງ: ໃນລະຫວ່າງວັນທີ 9 ຫາ ວັນທີ 10 ຕຸລາ 2018 ນີ້ ທ່ານ ສົມພອນ ສີອຸດົມພັນ ເຈົ້າເມືອງນ້ຳບາກ ໄດ້ລົງເຄື່ອນໄຫວຢ້ຽມຢາມ ແລະ ພົບປະໂອ້ລົມອົງການປົກຄອງ ບ້ານໜອງເໜືອ, ບ້ານປ່ອງໃຕ້ ກຸ່ມບ້ານນ້ຳຊັດ, ເມືອງນ້ຳບາກ, ແຂວງຫຼວງພະບາງ ເພື່ອໄປເບີ່ງການດຳລົງຊີວິດການເປັນຢູ່ຂອງພໍ່ແມ່ປະຊາຊົນ ແລະ ນຳພາການຈັດຕັ້ງບ້ານ, ພໍ່ແມ່ປະຊາຊົນ ສ້າງຂະບວນການອອກແຮງງານລວມຢູ່ພາຍໃນບ້ານ.

ໂອກາດທີ່ທ່ານເຈົ້າເມືອງ ລົງຢ້ຽມຢາມການຈັດຕັ້ງ 2 ບ້ານໃນຄັ້ງນີ້ ທ່ານຍັງໄດ້ນຳເອົາເຄື່ອງໃຊ້ໃນຄົວເຮືອນທີ່ຈຳເປັນມອບໃຫ້ຄອບຄົວທຸກຢາກ ຢູ່ບ້ານໜອງເໜືອ ຈຳນວນ 6 ຄອບຄົວ ແລະ ມອບອຸປະກອນການສຶກສາໃຫ້ນ້ອງນັກຮຽນ ຈຳນວນໜື່ງ ລວມມູນຄ່າ 1 ລ້ານກີບ.

ຂໍ້ມູນຂ່າວ ແລະ ພາບຈາກ: ສົມເພັດ ຫ້ອງວ່າການປົກຄອງເມືອງນ້ຳບາກ