ບໍລິເວນເດີ່ນພຣະທາດອີງຮັງ ຍັງມີການຄົ້ນພົບວັດຖຸບູຮານ ຈໍານວນຫຼາຍ

ໃນວັນທີ 11 ຕຸລາ 2018 ນີ້ ທາງຄະນະກໍາມະການແຂວງສະຫວັນນະເຂດ ຮ່ວມກັບອໍານາດການປົກຄອງບ້ານທາດອີງຮັງ ນະຄອນໄກສອນພົມວິຫານ ໄດ້ລົງຕິດຕາມເບິ່ງຈຸດທີ່ມີການຄົ້ນພົບ ວັດຖຸບູຮານ ລິເວນເດີ່ນພຣະທາດອີງຮັງ ທີ່ກຳລັງມີການບູລະນະປະຕິສັງຂອນ ເຊິ່ງຈຸດທີ່ມີການຄົ້ນພົບວັດຖຸບູຮານນັ້ນແມ່ນຢູ່ເບື້ອງໃຕ້ຂອງຂ້າງກຳແພງພະທາດ.

ສຳລັບການຄົ້ນພົບໃນຄັ້ງນີ້ ທ່ານ ຄຳສິດ ພົມມະຈັນ ຮອງຫົວໜ້າພະແນກຖະແຫຼງຂ່າວ, ວັດທະນາທຳ ແລະ ທ່ອງທ່ຽວແຂວງ ກໍ່ໄດ້ຮູ້ອີກວ່າ: ໃນການບູລະນະປະຕິສັງຂອນພະທາດອີງຮັງ ກໍ່ໄດ້ມີການຂຸດເອົາຊີມັງເກົ່າອອກແລ້ວກໍ່ໄດ້ພົບ ເຫັນວັດຖຸທີ່ລໍ້າຄ່າ ອັນເກົ່າແກ່ແຕ່ສະໄໝບູຮານຫຼາຍສິ້ນມີ: ເງິນຫຼາບ 6 ອັນ, ກະດິງ 2ອັນ, ໂຖທອງສໍາລິດ 1 ອັນ, ກະໂຖນ້ອຍທອງສໍາລິດ 2 ອັນ, ໄຫດິນເຜົາ 8 ໜ່ວຍ, ພະຄ້າຍຄືຄໍາ 5 ອົງ, ພະເຮັດດ້ວຍໄມ້ 6 ອົງ, ພະພຸດທະຮູບທີ່ເຮັດດ້ວຍທອງສໍາລິດ ແລະ ຊິ້ນສ່ວນທີ່ສົມບູນແລະ ບໍ່ສົມບູນ 28 ລາຍການ, ສົມບູນ 20 ອົງ , ພະທອງສໍາລິດ 32 ອົງ, ສົມບູນ21 ອົງ, ເສດກະສັດ 3 ຊິ້ນ, ຝັງລາດທອງສໍາລິດ 1 ໜ່ວຍ, ແຊ່ງທອງສໍາລິດ 2 ໜ່ວຍ, ຄ້ອງໜ້ອຍທອງສຳລິດ 1 ໜ່ວຍ, ແຊັງນ້ອຍເຮັດດ້ວຍທອງສໍາລິດ 4 ໜ່ວຍ, ຊິ້ນສ່ວນໄຫທີ່ແຕກ 4 ໜ່ວຍຍັງບໍ່ໄດ້ນັບຈຳນວນ, ເສດຊິ້ນສ່ວນຄ້ອງນ້ອຍ ແລະ ຝັງລາດ 4 ອັນ.

ພ້ອມນັ້ນຍັງມີໄຫອີກ 5 ໜ່ວຍທີ່ຮັດແໜ້ນດ້ວຍດິນຍັງບໍ່ທັນໄດ້ສໍາຫຼວດ ວັດຖຸດັ່ງກ່າວຄາດວ່າຖືກສ້າງຂຶ້ນແຕ່ສະໄໝອານາຈັກລາວສີໂຄດຕະບູນ ສຳລັບວັດຖຸບູນແມ່ນຈະໄດ້ຮັກສາອານາໄມ ແລະ ເກັບຮັກສາໄວ້ ແລະ ອີກສ່ວນ 1 ກໍ່ຈະໄດ້ນຳອອກມາສະແດງໃຫ້ພີ່ນ້ອງນັກທ່ອງທ່ຽວທັງພາຍໃນ ແລະ ຕ່າງປະເທດໄດ້ມາກາບໄຫວ້ກາລະບູຊາ ໃນມື້ບຸນນະມັດສະການພະທາດອີງຮັງທັງເປັນການເປີດປີທ່ອງທ່ຽວລາວ 2018 ເຊິ່ງຈະໄດ້ຈັດຂຶ້ນໃນວັນທີ 17-22 ທັນວາ 2018 ທີ່ໃກ້ຈະມາເຖິງໃນໝໍ່ນີ້ໆ