ມອບອຸປະກອນການສຶກສາ-ກີລາໃຫ້ໂຮງຮຽນປະຖົມບ້ານໜອງບົວໄສ

ຕອນເຊົ້າວັນທີ 22 ຕຸລາ 2018 ພຣະອາຈານ ກໍລະກັນ ເຊື້ອໂຊດ ຮອງເຈົ້າອະທິການວັດໂພນດູ່ທະນາຣາມບ້ານດ່ານເມືອງລະມາມແຂວງເຊກອງ, ພ້ອມອອກຕົນຍາດໂຍມຜູ້ມີຈິດໃຈໃສສັດທາໄດ້ນຳເອົາປຶ້ມຂຽນຈຳນວນ 430 ຫົວ, ບິກຂຽນ 300 ກ້ານ, ບານເຕະ, ຕໍ້ຫວາຍລວມມູນຄ່າ 1,51 ລ້ານກີບ ແລະເງິນສົດ 400.000 ກີບໄປມອບໃຫ້ນັກຮຽນ 79 ຄົນ ຢູ່ໂຮງຮຽນປະຖົມສົມບູນບ້ານໜອງບົວໄສເມືອງທ່າແຕງ.

ໃຫ້ກຽດກ່າວມອບເຄື່ອງດັ່ງກ່າວ ແມ່ນພຣະອາຈານ ກໍລະກັນ ເຊື້ອໂຊດ ແລະຕາງໜ້າກ່າວຮັບ ແມ່ນທ່ານ ນາງ ຫຼ່ຽມ ຈຳປາ ຮອງຫົວໜ້າຫ້ອງການສຶກສາທິການ ແລະກິລາເມືອງທ່າແຕງ ໂດຍມີຂະແໜງການກ່ຽວຂ້ອງຂັ້ນແຂວງ, ຂັ້ນເມືອງ, ບັນດາຄູ-ອາຈານ, ອຳນາດການປົກຄອງບ້ານ ແລະນັກຮຽນເຂົ້າຮ່ວມນຳ.

ໂອກາດດຽວກັນ, ກໍໄດ້ມີການມອບໃບຍ້ອງຍໍໃຫ້ພຣະອາຈານ ກໍລະກັນ ເຊື້ອໂຊດ ທີ່ເຫັນເຖິງຄວາມສຳຄັນ ຂອງການສຶກສາ ແລະໄດ້ມີການປຸກລະດົມຂົນຂວາຍອຸປະຖຳອຸປະກອບການສຶກສາ, ອຸປະກອນກີລາ ແລະເງິນສົດຈຳນວນໜຶ່ງຈາກອອກຕົນຍາດໂຍມ, ບັນດາບໍລິສັດຫ້າງຮ້ານ ແລະນັກທຸລະກິດທີ່ມີໃຈໃສສັດທາ ເພື່ອນຳມາຊ່ວຍເຫຼືອໂຮງຮຽນບ້ານໜອງບົວໄສໃນຄັ້ງນີ້.

• ຂ່າວ : ສັນຍາ
• ພາບ : ແວວຕາ