ຮອງລັດຖະມົນຕີ ຖວທ ເຂົ້າຮ່ວມກອງປະຊຸມ ວຽກງານ ວັດທະນະທຳ ແລະ ສິລະປະອາຊຽນ ທີ່ ອິນໂດເນເຊຍ

ຂປລ.ຄະນະຜູ້ແທນ ຈາກ ສປປ ລາວ ນຳໂດຍ ທ່ານ ສະຫວັນຄອນ ລາຊະມຸນຕີ, ຮອງລັດຖະ ມົນຕີກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ພ້ອມດ້ວຍ ເຈົ້າຫນ້າທີ່ອາວຸໂສ ແລະ ວິຊາການທີ່ກ່ຽວຂ້ອງ ໄດ້ເຂົ້າຮ່ວມກອງປະຊຸມລັດຖະມົນຕີ ຮັບຜິດຊອບວຽກງານວັດທະນະທຳ ແລະ ສິລະປະອາຊຽນ ຄັ້ງທີ 8 ແລະ ບັນດາກອງປະຊຸມປີ່ນອ້ອມ ເຊິ່ງຈັດຂຶ້ນໃນວັນທີ 24 ຕຸລາ 2018 ທີ່ ເມືອງຢອກຢາກາຕາ, ປະເທດອິນໂດເນເຊຍ ພາຍໃຕ້ຫົວຂໍ້: “ຢຶດຖືເອົາວັດທະນະທຳປ້ອງກັນເຫດ ເພື່ອເຮັດໃຫ້ ເອກະລັກອາຊຽນມີຄວາມອຸດົມຮັ່ງມີ” ໂດຍມີບັນດາທ່ານລັດຖະມົນຕີ, ຮອງລັດຖະມົນຕີ, ເຈົ້າຫນ້າທີ່ອາວຸໂສ ແລະ ບັນດາຜູ້ແທນຈາກພາກສ່ວນວັດທະນະທຳ ແລະ ສິລະປະຈາກບັນດາປະເທດສະມາຊິກອາຊຽນ ແລະ ທ່ານເລຂາທິການໃຫຍ່ອາຊຽນ ເຂົ້າຮ່ວມ.

ກອງປະຊຸມດັ່ງກ່າວໄດ້ດຳເນີນພາຍໃຕ້ການເປັນປະທານຂອງ ທ່ານ Muhadjir Effendy, ລັດ ຖະມົນຕີກະຊວງສຶກສາທິການ ແລະ ວັດທະນະທຳ ອິນໂດເນຍເຊຍ ເຊິ່ງກອງປະຊຸມໄດ້ປຶກສາຫາລືບັນຫາຕ່າງໆຢ່າງກວ້າງຂວາງ ແລະ ສ້າງສັນ.

ໃນນັ້ນ, ໄດ້ພິຈາລະນາຮັບຮອງເອກະສານສຳຄັນ ເຊັ່ນ: ຖະແຫລງການຢອກຢາກາຕາ ວ່າດ້ວຍການຢຶດຖືເອົາວັດທະນະທຳປ້ອງກັນເຫດ ເພື່ອເຮັດໃຫ້ເອກະລັກອາຊຽນມີຄວາມອຸດົມຮັ່ງມີ “Yogyakarta Declaration on Embracing the ASEAN Culture of Prevention to Enrich ASEAN Identity” ເຊິ່ງຖະແຫລງການນີ້ ຈະໄດ້ນໍາສະເໜີໃຫ້ຜູ້ນໍາອາ ຊຽນຮັບຊາບ ທີ່ ກອງປະຊຸມສຸດຍອດອາຊຽນ ຄັ້ງທີ 33 ທີ່ຈະຈັດຂຶ້ນໃນເດືອນ ພະຈິກ 2018 ທີ່ ປະ ເທດສິງກະໂປ.

ໂອກາດນີ້, ທ່ານ ຮອງລັດຖະມົນຕີ ສະຫວັນຄອນ ລາຊະມຸນຕີ ໄດ້ສະເໜີຕໍ່ກອງປະຊຸມ ຄັ້ງນີ້ວ່າ: ສປປ ລາວ ເຫັນໄດ້ຄວາມສຳຄັນຂອງວຽກງານວັດທະນະທຳ ແລະ ສິລະປະ ໂດຍສົ່ງເສີມໃຫ້ເຄົາ ລົບ, ຮັບຮູ້ ແລະ ເຂົ້າໃຈວັດທະນະທຳ ເຊິ່ງກັນ ແລະ ກັນ ເພື່ອມິດຕະພາບ ແລະ ການຮ່ວມມື ເຮັດໃຫ້ສັງ ຄົມມີຄວາມປອງດອງ, ມີການພັດທະນາຍືນຍົງ ແລະ ຈະເລີນຮຸ່ງເຮືອງ. ພ້ອມນັ້ນ, ທ່ານຍັງເນັ້ນຕື່ມວ່າ: ລາວເຮົາຍາມໃດກໍຊອກຫາທຸກວິທີທາງເພື່ອຮັກສາ ແລະ ພັດທະນາວັດທະນະທຳ ແລະ ຮີດຄອງປະເພນີທີ່ຫລາກຫລາຍຂອງປະຊາຊົນບັນດາເຜົ່າ ເພື່ອປະກອບສ່ວນເພີ່ມທະວີໃນການພັດທະນາວັດທະ ນະທຳ ແລະ ທ່ອງທ່ຽວ, ທັງສ້າງກາລະໂອກາດໃຫ້ປະຊາຊົນມີວຽກເຮັດງານທຳ ເພື່ອໃຫ້ບັນລຸເປົ້າຫມາຍຫລຸດພົ້ນອອກຈາກຄວາມທຸກຍາກ.

ພ້ອມດຽວກັນນັ້ນ, ທ່ານ ຍັງໄດ້ຊຸກຍູ້ໃຫ້ມີການຮ່ວມມືດ້ານການປະ ກອບ ຜະລິດຕະພັນວັດທະນະທຳ ຂະໜາດນ້ອຍ ແລະ ຂະໜາດກາງ (SMCEs).

Cr: http://kpl.gov.la/