ລາວ-ອັງກິດ ຮ່ວມມືສ້າງຄວາມເຂັ້ມແຂງ ເຝົ້າລະວັງເຊື້ອຈຸລະຊີບຕ້ານຢາ ຢູ່ລາວ

ຂປລ. ໃນວັນທີ 24 ຕຸລາ 2018 ທີ່ກະຊວງສາທາລະນະສຸກ, ໄດ້ມີພິທີເຊັນບົດບັນທຶກການຮ່ວມມື ລະຫວ່າງ ທ່ານ ດຣ ບຸນກອງ ສີຫາວົງ ລັດຖະມົນຕີກະຊວງສາທາລະນະສຸກ ແລະ ທ່ານ ຣິວ ອີວານ ເອກອັກຄະຣາຊະທູດ ສະຫະຣາຊະອານາຈັກອັງກິດ ແລະ ໄອແລນເໜືອ ກ່ຽວກັບການຊ່ວຍສ້າງຄວາມເຂັ້ມແຂງ ໃນການເຝົ້າລະວັງເຊື້ອຈຸລະຊີບຕ້ານຕໍ່ຢາ ແຫ່ງຊາດ ເພື່ອປະກອບສ່ວນເຂົ້າໃນການພັດທະນາວຽກງານ ສາທາລະນະສຸກ ໃນ ສປປ ລາວ.

ໂດຍການເຂົ້າຮ່ວມເປັນສັກ ຂີພິຍານ ຂອງ ເຈົ້າຍິງ ແບທຣິສ ອີລີຊາເບດ ແມຣີ (Princess Beatrice Elizabeth Mary) ພ້ອມດ້ວຍພະນັກງານກ່ຽວຂ້ອງສອງຝ່າຍເຂົ້າຮ່ວມ.

ສຳລັບແຜນດຳເນີນການກ່ຽວກັບເຊື້ອຈຸລະຊີບຕ້ານຕໍ່ຢາ ແຫ່ງຊາດ ຂອງ ສປປ ລາວ ແມ່ນໂຄງການຮ່ວມລະຫວ່າງກະຊວງສາທາລະນະສຸກ ແລະ ກະຊວງກະສິກຳ ແລະ ປ່າໄມ້ ເຊິ່ງໄດ້ຖືກພັດທະນາຂຶ້ນໃນປີ 2016 ໂດຍກວມເອົາ 5 ຈຸດປະສົງ ເປັນຕົ້ນ: ການຍົກລະດັບຄວາມຮູ້ ແລະ ຄວາມເຂົ້າໃຈກ່ຽວກັບເຊື້ອຈຸລະຊີບຕ້ານຕໍ່ຢາ; ການສ້າງຄວາມເຂັ້ມແຂງໃຫ້ແກ່ລະບົບການເຝົ້າລະວັງກ່ຽວກັບເຊື້ອຈຸລະຊີບຕ້ານຕໍ່ຢາ; ການຫລຸດຜ່ອນອັດຕາການເກີດເປັນພະຍາດຊຶມເຊື້ອ; ການເພີ່ມປະ ສິດທິພາບ ໃນການນຳໃຊ້ຢາຕ້ານເຊື້ອໃນຂະແໜງການສຸຂະພາບຄົນ ແລະ ສັດ; ການປັບປຸງລະບົບຄຸ້ມຄອງ, ການປະສານງານ ແລະ ການສະໜອງງົບປະມານ.

ການຕົກລົງຮ່ວມມື ລະຫວ່າງ ລັດຖະບານລາວ ແລະ ລັດຖະບານແຫ່ງ ສະຫະຣາຊະອາ ນາຈັກອັງກິດ ແລະ ໄອແລນເໜືອ ໃນຄັ້ງນີ້ ໂດຍສະເພາະກະຊວງສາທາລະນະສຸກ ແລະ ສະຫວັດດີການສັງຄົມ ພາຍໃຕ້ກອງທຶນເຟຣມິງ ເຊິ່ງຈະປະກອບສ່ວນຊ່ວຍ ສປປ ລາວ ໃນການຊຸກຍູ້ແຜນດຳເນີນການກ່ຽວກັບເຊື້ອຈຸລະຊີບຕ້ານຕໍ່ຢາ ແຫ່ງຊາດ ເພື່ອບັນລຸເປົ້າໝາຍຂອງປະເທດ ກໍຄື ພາກພື້ນ ແລະ ໂລກ.

ຂໍ້ຕົກລົງການຮ່ວມມືດັ່ງກ່າວ ເປັນແຜນດຳເນີນງານກ່ຽວກັບເຊື້ອຈຸລະຊີບ ຕ້ານຕໍ່ຢາ ຂອງໂລກ ເຊິ່ງໄດ້ຖືກພັດທະນາຂຶ້ນມາ ໂດຍອົງການອາຫານ ແລະ ການກະເສດ, ອົງການເພື່ອສຸຂະພາບສັດສາກົນ ແລະ ອົງການອະນາໄມໂລກ ໂດຍໄດ້ສຸມໃສ່ລະບົບການເຝົ້າລະວັງເຊື້ອຈຸລະຊີບຕ້ານຕໍ່ຢາ ພ້ອມທັງໄດ້ແຕ່ງຄັ້ງຄະນະກຳມະການຮັບຜິດຊອບວຽກງານນີ້ຂຶ້ນມາ ເພື່ອຊຸກຍູ້ວຽກງານດັ່ງກ່າວ ໃຫ້ເປັນໄປຕາມແຜນທີ່ກຳນົດໄວ້. ເຖິງແມ່ນວ່າວຽກງານນີ້ຈະມີຄວາມຫຍຸ້ງຍາກ ແລະ ສັບ ສົນກໍຕາມ ຮຽກຮ້ອງໃຫ້ມີການຮ່ວມມືຈາກທຸກພາກສ່ວນ, ທຸກຂະແໜງການ ແລະ ຄູ່ຮ່ວມງານໃນທຸກຂັ້ນຕ້ອງໄດ້ເຮັດວຽກຮ່ວມກັນ.

ຂ່າວ: ມະນີທອນ, ພາບ: ເພັດໂພໄຊ