ຄະນະຜູ້ແທນລາວ ເຂົ້າຮ່ວມງານວາງສະແດງການທ່ອງທ່ຽວ ຈີນ-ອາຊຽນ ທີ່ກຸຍຫຼິນ ສປ ຈີນ

ໃນລະຫວ່າງວັນທີ 25-28 ຕຸລາ 2018, ຢູ່ເມືອງກຸຍຫຼິນ, ສປ ຈີນ, ງານວາງສະແດງການທ່ອງທ່ຽວ ຈີນ-ອາຊຽນ (China-ASEAN EXPO Tourism Exhibition) ໄດ້ຖືກຈັດຂື້ນ, ໂດຍການເຂົ້າ ຮ່ວມຂອງບັນດາຫົວໜ່ວຍທຸລະກິດທ່ອງທ່ຽວຈາກ ສປ ຈີນ, ອາຊຽນ ແລະ ຜູ້ຊື້-ຜູ້ຂາຍຈາກທົ່ວໂລກ, ຊຶ່ງລວມມີ ທັງຫມົດ 800 ຮ້ານ, ໂດຍງານນີ້ຖືວ່າ ເປັນງານຕະຫຼາດທ່ອງທ່ຽວຫນຶ່ງທີ່ສຳຄັນ.

ສໍາລັບຮ້ານວາງສະແດງຂອງສປປ ລາວ, ແມ່ນກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວລາວ ເປັນຜູ້ຕາງ ຫນ້າເຂົ້າຮ່ວມ.

ຄະນະຜູ້ແທນລາວ ນຳໂດຍທ່ານ ອຸ່ນທວງ ຂາວພັນ, ຮອງລັດຖະມົນຕີ ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ແຫ່ງ ສປປ ລາວ ໄດ້ຮັບກຽດເປັນແຂກກິດຕິມະສັກ, ຂື້ນກ່າວມີຄໍາເຫັນຕໍ່ພິທີເປີດງານວາງສະແດງການທ່ອງທ່ຽວຈີນ-ອາຊຽນ ຊຶ່ງທ່ານໄດ້ຍົກໃຫ້ເຫັນນະໂຍບາຍຂອງພັກ-ລັດຖະບານ ສປປ ລາວ ໂດຍຖືເອົາວຽກງາານການທ່ອງທ່ຽວ ເປັນຂະແໜງການບູລິມະສິດໜຶ່ງທີ່ສຳຄັນ, ປະກອບສ່ວນເຂົ້າໃນການພັດທະນາເສດຖະກິດ-ສັງຄົມ ຂອງຊາດ.

ລັດຖະບານ ສປປ ລາວ ໄດ້ປະກາດໃຫ້ປີ 2018 ເປັນປີທ່ອງທ່ຽວລາວ; ຈຳນວນນັກທ່ອງທ່ຽວກໍ່ໄດ້ເພິ່ມຂື້ນ ໃນ 6 ເດືອນຕົ້ນປີນີ້; ນັກທ່ອງ ທ່ຽວສາກົນ ເຂົ້າມາທ່ຽວລາວແລ້ວ 2 ລ້ານກວ່າຄົນ ຊຶ່ງເພີ່ມຂື້ນ 6% ຖ້າທຽບໃສ່ໄລຍະດຽວກັນຂອງປີ 2017, ໃນນັ້ນ ນັກທ່ອງທ່ຽວຈາກຈີນ ມີ 4 ແສນກວ່າຄົນ, ເພີ່ມຂື້ນ 50% ຖ້າທຽບໃສ່ໄລຍະດຽວກັນຂອງປີ 2017. ສໍາລັບປີ 2019 ແມ່ນມີແຜນຮ່ວມກັນທີ່ຈະຈັດຕັ້ງສົ່ງເສີມປີທ່ອງທ່ຽວລາວ-ຈີນ, ພວກເຮົາຈຶ່ງວາງຄາດໝາຍສູ້ຊົນໄວ້ວ່າ ປີ 2019 ຈະໄດ້ຕ້ອນຮັບນັກທ່ອງທ່ຽວຈີນ ປະມານ 1 ລ້ານຄົນ. ດັ່ງນັ້ນ, ຈຶ່ງຂໍເຊີນຊວນບັນດານັກທອ່ງທ່ຽວຈີນ ກໍ່ຄື ນັກທ່ອງທ່ຽວຈາກທົ່ວໂລກ ຈົ່ງມາທ່ຽວປະເທດລາວໃຫ້ຫຼາຍໆດ້ວຍ.

ນອກຈາກນັ້ນ, ຄະນະຜູ້ແທນລາວ ຍັງໄດ້ເຂົ້າຮ່ວມກອງປະຊຸມສຳມະນາໃນຫົວຂໍ້ “ອານາຄົດຂອງການທ່ອງທ່ຽວ ໄປສູ່ປີ 2030 “The Future of Tourism Road to 2030” ຊຶ່ງຈັດຂື້ນໂດຍກະຊວງວັດທະນະທຳ ແລະ ທ່ອງທ່ຽວ ສປ ຈີນ ຮ່ວມກັບອົງການທ່ອງທ່ຽວໂລກ (UNWTO) ແລະ ສະມາຄົມການທ່ອງທ່ຽວພາກພື້ນອາຊີ-ປາຊີຟຼິກ (PATA. ກອງປະຊຸມດັ່ງກ່າວ ຍັງໄດ້ຍົກໃຫ້ເຫັນຄວາມສໍາຄັນຂອງວຽກງານພັດທະນາຜະລິດຕະພັນການທ່ອງທ່ຽວທີ່ມີຄຸນນະພາບ, ບັນຫາສິ່ງແວດລ້ອມ, ການກໍ່ສ້າງບຸກຄະລາກອນການທ່ອງທ່ຽວ ແລະ ການນຳໃຊ້ເຕັກໂນໂລຊີ ເພື່ອໂຄສະນາສົ່ງເສິມການທ່ອງທ່ຽວ.