ນະຄອນຫຼວງພະບາງຈັດງານແຂ່ງຂັນປະກວດເຮືອໄຟງາມ ໃນບຸນໄຫຼເຮືອໄຟ ຢ່າງອາລັງການ

ວັນທີ່ 25 ຕຸລາ 2018 ເຊິ່ງກົງກັບມື້ແຮມ 1 ຄໍ່າເດືອນ 11 ພສ 2561 ອົງການປົກຄອງນະຄອນຫຼວງພະບາງ ໄດ້ຈັດງານປະກວດເຮືອໄຟ ຫຼື ບຸນໄຫຼເຮືອໄຟ ໂດຍການເປັນປະທານຂອງທ່ານ ສຸກັນ ບຸນຍົງ ເຈົ້ານະຄອນຫຼວງພະບາງ,ມີທ່ານ ສົມສະຫວາດ ເລັ່ງສະຫວັດ ອະດີດຮອງນາຍົກລັດຖະມົນຕີແຫ່ງ ສປປ ລາວ ພ້ອມດ້ວຍຄະນະປະຈໍາພັກແຂວງ,ການນໍາອ້ອມຂ້າງແຂວງ-ເມືອງ,ແຂກຖຶກເຊີນ ຕະຫຼອດຮອດມວນຊົນພາຍໃນ ແລະ ຊາວຕ່າງປະເທດເຂົ້າມາເບິ່ງມາຊົມຢ່າງຄັບຄາໜາແໜ້ນເຕັມສອງຂ້າງທາງ ແຕ່ໜ້າຫ້ອງວ່າການປົກຄອງແຂວງ ໄປຕາມເສັ້ນທາງສີສະຫວ່າງວົງ ຮອດໜ້າຫໍພິພິດທະພັນແຫ່ງຊາດຫຼວງພະບາງ ເຊິ່ງເປັນຈຸດເລີ່ມຕົ້ນຂອງຂະບວນເຮືອໄຟ.ເຊິ່ງພິທີທາງສາສະໜາແມ່ນໄດ້ຈັດຂື້ນຢູ່ວັດປ່າຮວກ ຕໍ່ໜ້າຫໍພິພິດທະພັນແຫ່ງຊາດຫຼວງພະບາງ ໂດຍມີ ສາທຸໃຫຍ່ ອ່ອນແກ້ວ ກິດຕິພັດໂທ ປະທານອົງການສາສະໜາສໍາພັນແຂວງຫຼວງພະບາງ ພ້ອມດ້ວຍຄະນະສົງສໍາມະເນນ, ພາຍຫຼັງເສັດພິທີແລ້ວ.ທ່ານ ສຸກັນ ບຸນຍົງ ເຈົ້ານະຄອນຫຼວງພະບາງ ກໍ່ໄດ້ກ່າວເປີດບຸນໄຫຼເຮືອໄຟ ຫຼື ງານປະກວດເຮືອໄຟປະຈໍາປີ 2018ໃນຄັ້ງນີວ່າ: ການໄຫຼເຮືອໄຟ ແລະ ລອຍກະທົງແມ່ນເພື່ອບູຊາຮອຍພະພຸດທະບາດ (ຮອຍຕີນພະພຸດທະເຈົ້າ) ທີ່ຢຽບໄວ້ໃຕ້ພື້ນນ້ຳ ຫຼື ເມືອງບາດານ, ບູຊາບຸນຄຸນຂອງແມ່ນ້ຳທີ່ເຮົາເຮັດສິ່ງເປິເປື້ອນ ແລະ ຖິ້ມສິ່ງເປິເປື້ອນລົງໃສ່. ຂະນະທີ່ຈູດທູບທຽນ, ບາງຄົນກໍ່ອະທິຖານຈິດວ່າ ເຄາະກຳ ຫຼື ສິ່ງຊົ່ວຮ້າຍທັງຫຼາຍທີ່ມີ ຂໍໃຫ້ ຫາຍສ້ຽງ ຫຼື ລ່ອງລອຍໄປພ້ອມກັບເຮືອໄຟທີ່ໄຫຼໄປນີ້,ບາງຄົນກໍ່ນ້ອມ ລະນຶກເຖິງບຸນຄຸນຂອງພະພຸດ, ພະທຳ ແລະ ພະສົງ ຂໍໃຫ້ມີຄວາມຈະເລີນຮຸ່ງເຮືອງເໝືອນດັ່ງແສງປະທີບທີ່ໄດ້ຕິດໄຕ້ບູຊານີ້. ເມື່ອປ່ອງເຮືອໄຟ ແລະ ກະທົງໄຫຼ່ລ່ອງລົງໄປຕາມສາຍນ້ຳ, ແສງທຽນທີ່ຖືກລົມພັດ ກໍ່ຈະຄ່ອຍໆອັບແສງລົງ ແລະ ດັບມອດ ຄືກັບວ່າການໝົດໄປແຫ່ງຄວາມທຸກ ແລະ ເຂົ້າເຖິງສຸກ ຄືພະນິບພານ.ດ້ວຍເຫດນີ້ລາວ ເຮົາຈິ່ງໄດ້ເຮັດເຮືອໄຟປະເພນີ ໃນເວລາບຸນອອກພັນສາ ປະວໍລະນາ ເພື່ອລະນຶກເຖິງຄຸນບິດາມານດາ ແລະ ບູຊາພະລັດຕະນະໄຕ ເຊິ່ງປ່ອຍໃຫ້ໄຫຼໄປຕາມລຳແມ່ນ້ຳ, ດັ່ງນັ້ນ ລາວເຮົາຈຶ່ງພາກັນໃສ່ຊື່ເອີ້ນວ່າ ເຮືອໄຟ ແລະ ຖືເອົາເປັນແບບຢ່າງອັນນັ້ນສືບມາຮອດທຸກມື້ນີ້.ສໍາລັບເຮືອໄຟທີ່ເຂົ້າຮ່ວມປະກວດໃນປີນີ້ມີ 51 ລໍາ,ເຊິ່ງມາຈາກບັນດາບ້ານ,ສໍານັກງານ ແລະ ສະຖາບັນການສຶກສາ ອ້ອມຂ້າງເທດສະບານນະຄອນ,ເຊິ່ງການແຂ່ງຂັນປະກວດເຮືອໄຟແຕ່ລະລໍານັ້ນແມ່ນມີມາດຕະຖານໃຫ້ຢ່າງຊັດເຈນ ແລະ ຖຶກຕ້ອງຕາມປະເພນີ ເປັນຕົ້ນແມ່ນຄວາມຍາວຂອງເຮືອແມ່ນບໍ່ໃຫ້ລຸດ 10 ແມັດ,ຄວາມສູງແຕ່ພື້ນຮອດຍອດແມ່ນບໍໃຫ້ເກີນ 4 ແມັດ,ພ້ອມທັງມີຄວາມສະດວກໃນການເຄື່ອນຍ້າຍ ແລະ ບັນຍາກາດຂອງຂະບວນເຮືອໄຟແຕ່ລະພາກສ່ວນເຕັມໄປດ້ວຍສຽງຮ້ອງໂຮ່ປະສານກັບສຽງຄ້ອງສຽງກອງ ບວກກັບໄຟແສງສີເຫຼືອງອ່ອນຈາກທຽນສ່ອງອອກມາໃສ່ເຈ້ຍສີບາງ ຈົນສະດຸດຕາປະທັບໃຈຈົນຮອດລໍາສຸດທ້າຍ.ໂດຍຜ່ານສາຍຕາຂອງຄະນະກໍາມະການ ປະກົດວ່າເຮືອໄຟທີ່ສວຍງາມ ແລະ ຄົງເອກະລັກຮັກສາວັດທະນະທໍາຂອງຊາວນະຄອນຫຼວງພະບາງ ນັ້ນກໍຄືເຮືອໄຟ ມສ ສັນຕິພາບ,ທີ່2 ມປ ພັນຫຼວງ,ທີ່ 3 ບ້ານນາສ້າງເຫວີຍ-ບ້ານວຽງໃໝ່,ທີ່4 ສາຍການບິນລາວເດີນອາກາດ,ທີ່ 5 ວິທະຍາໄລຄູຫຼວງພະບາງ,ທີ່ 6 ວິທະຍາໄລເຕັກນິກວິຊາຊີບຫຼວງພະບາງ,ທີ່ 7 ບ້ານວຽງໄຊ-ບ້ານມະໂນ,ທີ່8 ມສ ປະຊາທິປະໄຕ-ບ້ານທົ່ງຈະເລີນ,ທີ່9 ມສ ປ່ອງຄໍາ,ທີ່ 10 ທິດາມິນຕາ,ທີ່11 ວິທະຍາໄລວິທະຍາສາດສຸຂະພາບ,ທີ່12 ບ້ານວຽງແກ້ວ-ບ້ານນາວຽງຄໍາ,ທີ່13 ບ້ານຜານົມ,ທີ່ 14 ສະຖາບັນຍຸຕິທໍາ,ທີ່15 ຊາວໜຸ່ມຍຸກໃໝ່,ທີ່16 ວິທະຍາໄລການເງິນພາກເໜືອ,ທີ່17 ບ້ານໂພນແພງ-ບ້ານປ່ອງຄໍາ,ທີ່18 ບ້ານໝຶ່ນນາ-ບ້ານທາດໂບສົດ,ທີ່19 ບ້ານວັດແສນ-ບ້ານໂພນເຮືອງ,ທີ່20 ບ້ານນາຫຼວງ-ບ້ານນາສໍາພັນ,ທີ່21 ບ້ານຫົວຊຽງ-ບ້ານວັດທາດ,ທີ່22 ພະຍາສຸວັນນະນາຄີ,ທີ່ 23 ຂັວນໃຈຊາວໜຸ່ມຫົວຊຽງ,ທີ່24 ບ້ານຊຽງມ່ວນ-ບ້ານວັດໜອງ,ທີ່25 ແກ້ວຍອດຟ້ານາຄະຣາດບ້ານອາໄພ,ທີ່26 ຫົງແກ້ວນະຄອນຢາດຟ້າ.ຂ່າວ: ເພັດສາຄອນ ສິມມະວົງ