ຂ່າວລັດຖະບານ: ຮອງນາຍົກລັດຖະມົນຕີ ພົບປະໂອ້ລົມ ຕໍ່ການນຳຫລັກແຫລ່ງ ແຂວງ ຜົ້ງສາລີ

ຂປລ.ໃນວັນທີ 8 ພະຈິກ 2018 ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ໄດ້ເຄື່ອນໄຫວຢ້ຽມ ຢາມ ແລະ ໃຫ້ກຽດພົບປະໂອ້ລົມ ຕໍ່ພະນັກງານການນຳຫລັກແຫລ່ງ ຂອງແຂວງຜົ້ງສາລີ ຢູ່ທີ່ຫ້ອງວ່າການປົກ ຄອງແຂວງດັ່ງກ່າວ.

ໃນໂອກາດດຽວກັນ, ທ່ານ ສອນໄຊ ສີພັນດອນ ໄດ້ໃຫ້ກຽດພົບປະໂອ້ລົມ ຕໍ່ການນຳຫລັກແຫລ່ງຂອງແຂວງ, ໂດຍໄດ້ກ່າວຍ້ອງຍໍຊົມເຊີຍ ຕໍ່ຜົນສໍາເລັດ ທີ່ຄະນະພັກ-ຄະນະນຳແຕ່ລະຂັ້ນ ແລະ ປະຊາຊົນຊາວແຂວງຜົ້ງສາລີ ສາມາດປະຕິບັດໄດ້ ໃນໄລຍະຜ່ານມາ. ພ້ອມທັງ, ຍົກໃຫ້ເຫັນຜົນສໍາເລັດອັນພົ້ນເດັ່ນໃນການພັດທະນາເສດຖະກິດ-ສັງຄົມແຫ່ງຊາດ, ສະພາບການຂອງພາກພື້ນ ແລະ ສາກົນ, ຄວາມຫຍຸ້ງຍາກ ແລະ ສິ່ງທ້າທາຍ ຕໍ່ການພັດທະນາວຽກງານດ້ານຕ່າງໆ. ອັນສຳຄັນ ແມ່ນໄດ້ເນັ້ນໜັກໃຫ້ການນຳຫລັກແຫລ່ງຂອງແຂວງ ເອົາໃຈໃສ່ຕື່ມບາງດ້ານ ເປັນຕົ້ນ ການຊ່ວຍເຫລືອປະຊາຊົນ ທີ່ໄດ້ຮັບຜົນກະທົບຈາກໄພພິບັດທຳມະຊາດ ໃນໄລຍະຜ່ານມາ ໂດຍສະເພາະ ການປະຕິບັດນະໂຍບາຍທີ່ເໝາະສົມ, ການສະໜອງແນວພັນໃຫ້ພຽງພໍ, ສືບຕໍ່ເອົາໃຈໃສ່ການເກັບລາຍຮັບເຂົ້າງົບປະມານ ໃຫ້ບັນລຸຕາມຄາດໝາຍທີ່ວາງໄວ້, ສືບຕໍ່ຕ້ານ ແລະ ສະກັດກັ້ນ ປະກົດການຫຍໍ້ທໍ້ຕ່າງໆ ໂດຍສະເພາະ ບັນຫາຢາເສບຕິດ, ຫາງສຽງບໍ່ດີ ຜ່ານສື່ສັງຄົມອອນລາຍ, ຂີ້ລັກງັດແງະ, ການລັກລອບຄ້າຂາຍເຖື່ອນ ແລະ ອື່ນໆ.