ນະມັດສະການພຣະທາດຫລວງປີນີ້ ຍົກສູງຄຸນຄ່າດ້ານວັດທະນະທໍາ ແລະ ຮີດຄອງປະເພນີ

ທ່ານ ສີຫຸນ ສິດ­ທິລືໄຊ ຮອງເຈົ້າຄອງນະ­ຄອນ­ຫຼວງວຽງຈັນ (ນວ) ພ້ອມດ້ວຍຄະ­ນະຮັບ­ຜິດ­ຊອບຈັດພິ­ທີສະ­ເຫຼີມ­ສະ­ຫຼອງ ຜົນ­ສຳ­ເລັດໂຄງ­ການປະ­ຕິ­ສັງ­ຂອນພິພິທະພັນພະທາດ­ຫຼວງ ຄັ້ງທີ IV ງານບຸນນະ­ມັດ­ສະ­ການພະທາດ­ຫຼວງ ແລະ ວາງ­ສະ­ແດງສິນ­ຄ້າປະ­ຈຳປີ 2018 ໄດ້ຖະ­ແຫຼງຂ່າວກ່ຽວກັບການຈັດງານດັ່ງ­ກ່າວ ວັນທີ 5 ພະ­ຈິກ 2018 ຢູ່ເດີ່ນພະທາດ­ຫຼວງວ່າ: ການຈັດງານດັ່ງ­ກ່າວ ມີຈຸດ­ປະ­ສົງເພື່ອສືບ­ຕໍ່ປົກປັກຮັກ­ສາ ແລະ ເສີມຂະ­ຫຍາຍວັດ­ທະ­ນະ­ທຳຮີດ­ຄອງປະ­ເພ­ນີອັນດີ­ງາມຂອງຊາດລາວເຮົາ ໃຫ້ຄົງຢູ່ຄູ່ກັບຄົນລາວ ຊາດລາວຕະ­ຫຼອດໄປ ເພື່ອຊຸກ­ຍູ້ສົ່ງ­ເສີມການຜະ­ລິດສິນ­ຄ້າຂອງປະ­ຊາ­ຊົນລາວບັນ­ດາ­ເຜົ່າ ສິນ­ຄ້າທີ່ໄດ້ຮັບກາໝາຍໜຶ່ງເມືອງໜຶ່ງຜະ­ລິດຕະພັນ ສ້າງໂອ­ກາດໃຫ້ຜູ້ປະ­ກອບການໄດ້ແລກ­ປ່ຽນຊື້-ຂາຍຮ່ວມກັນ ທັງເປັນການຊຸກ­ຍູ້-ສົ່ງ­ເສີມການ­ທ່ອງ­ທ່ຽວ ເປັນ­ຕົ້ນ ການ­ທ່ອງ­ທ່ຽວທາງດ້ານວັດ­ທະ­ນະ­ທຳ ປະ­ຫວັດ­ສາດ ທຳມະຊາດທີ່ເປັນເອ­ກະ­ລັກ ເປັນມູນ­ເຊື້ອ ແລະ ເປັນພື້ນທີ່ສວຍງາມຂອງຊາດ ຮັບ­ປະ­ກັນໃຫ້ໄດ້ຄວາມເບີກ­ບານມ່ວນ­ຊື່ນ ຄວາມສະ­ອາດຄວາມຈົບ­ງາມ ເປັນລະ­ບຽບຮຽນ­ຮ້ອຍ ປອດໄພໃນຕະ­ຫຼອດການຈັດງານ.

ການຈັດງານດັ່ງ­ກ່າວ ປະ­ກອບມີຫຼາຍກິດ­ຈະ­ກຳ ເປັນ­ຕົ້ນ ການສະ­ເຫຼີມ­ສະ­ຫຼອງບຸນນະ­ມັດ­ສະ­ການພະທາດ­ຫຼວງ ປີ 2018 ຕິດພັນກັບການປະ­ຕິ­ສັງ­ຂອນອົງພະທາດ­ຫຼວງ ຄັ້ງທີ IV ແລະ ວາງ­ສະ­ແດງສິນ­ຄ້າປີ 2018 ເຊິ່ງງານວາງ­ສະ­ແດງສິນ­ຄ້າຈະຈັດຂຶ້ນ 2 ຈຸດຄື: ບໍ­ລິ­ເວນສະ­ໜາມຫຼວງ ແລະ ສູນການຄ້າລາວ-ໄອເຕັກ ເຊິ່ງບໍ­ລິ­ເວນສະ­ໜາມຫຼວງ ອະ­ນຸ­ຍາດໃຫ້ວາງ­ສະ­ແດງ ແລະ ຈຳ­ໜ່າຍສະ­ເພາະສິນ­ຄ້າພາຍໃນ ແລະ ຜະ­ລິດຕະພັນໂອດ໋ອບ ເລີ່ມຂຶ້ນວັນທີ 16-22 ພະ­ຈິກ ສ່ວນສູນການຄ້າລາວ-ໄອເຕັກ ແມ່ນຈຳ­ໜ່າຍສິນ­ຄ້າພາຍໃນ ແລະ ຕ່າງ­ປະ­ເທດແຕ່ວັນທີ 16-25 ພະ­ຈິກ.

ການຈັດງານປີນີ້ ມີຄວາມແຕກຕ່າງກັບປີ­ຜ່ານ­ມາ ໂດຍເນັ້ນຄວາມເປັນລະ­ບຽບຮຽບຮ້ອຍຮັກ­ສາໄດ້ຮີດ­ຄອງປະ­ເພ­ນີ ແລະ ວັດ­ທະ­ນະ­ທຳ ພິ­ເສດຍັງຈະມີການ­ສະ­ແດງສິ­ລະປະ ໂດຍສະ­ເພາະບໍ­ລິ­ເວນສະ­ໜາມຫຼວງ ໄດ້ເນັ້ນການຮັກ­ສາເອ­ກະ­ລັກສິ­ລະປະວັດ­ທະ­ນະ­ທຳ ສິ­ລະປະພື້ນ­ເມືອງ ຂັບລຳ ລະ­ຄອນພື້ນ­ເມືອງ ຮ້ອງ­ເພງ ແລະ ອື່ນໆ ນອກນີ້ກົມຮູບ­ເງົາຈະນຳເອົາຮູບ­ເງົາຈີນ ແລະ ຮູບ­ເງົາລາວມາສາຍໃຫ້ປະ­ຊາ­ຊົນໄດ້ຊົມ ການ­ສະ­ແດງລຳເລື່ອງເພື່ອສ້າງບັນ­ຍາ­ກາດຟົດ­ຟື້ນມ່ວນ­ຊື່ນ ສ່ວນຢູ່ສູນການຄ້າລາວ-ໄອເຕັກຈະມີການ­ສະ­ແດງຮ້ອງ­ເພງ ການ­ສະ­ແດງຂອງສິ­ລະປິນຕ່າງ­ປະ­ເທດຈຳ­ນວນໜຶ່ງ.

ສຳ­ລັບຂໍ້ຫ້າມ ໃນງານບຸນຄັ້ງນີ້ທີ່ທຸກຄົນຄວນປະ­ຕິ­ບັດປະ­ກອບມີ: ຫ້າມຂາຍ ແລະ ນຳເອົາຢາເສບຕິດ ສິ່ງມຶນ­ເມົາ ອາ­ວຸດ ມີດ ງ້າວ ໜ້າ ສາຍ­ແອວຫົວໃຫຍ່ ສະນັບມື ອາ­ວຸດທຸກປະ­ເພດ ສິ່ງຂອງລອກຮຽນແບບ ສິນ­ຄ້າລາ­ມົກອະ­ນາ­ຈານ ແລະ ສິນ­ຄ້າຜິດກົດ­ໝາຍເຂົ້າມາພາຍໃນງານ ແລະ ວາງຂາຍຢ່າງເດັດ­ຂາດ ຫ້າມໂຄ­ສະ­ນາ ຄ້າ­ຂາຍ ນຸ່ງເຄື່ອງລາ­ມົກອະ­ນາ­ຈານເຂົ້າໃນງານ ຫ້າມດື່ມສິ່ງມຶນ­ເມົາ ຫ້າມອາລະວາດຕີກັນ ຫ້າມຂາຍ­ເຄື່ອງຊະ­ຊາຍ ວາງສິນ­ຄ້າອອກມານອກຮ້ານ ແລະ ຊື້ສິນ­ຄ້າເປັນເງິນ­ຕາຕ່າງ­ປະ­ເທດ ຫ້າມບຸກ­ຄົນ ວັດ ສຳ­ນັກ­ງານ ອົງ­ການປົກ­ຄອງບ້ານ ກີດ­ຂວາງການຈັດສັນສະ­ຖານ­ທີ່­ວາງ­ສະ­ແດງຂາຍສິນ­ຄ້າຂອງຄະ­ນະກຳ­ມະ­ການຈັດງານ ສຳ­ລັບນັກສິ­ລະປະຢູ່ໃນງານແຕ່ລະຈຸດ ຕ້ອງນຸ່ງເຄື່ອງສຸ­ພາບຮຽບຮ້ອຍ ໃຫ້ຖືກ­ຕ້ອງຕາມຮີດ­ຄອງປະ­ເພ­ນີ ຕໍ່ຜູ້ລະ­ເມີດກັບຂໍ້ຫ້າມດັ່ງ­ກ່າວ ຈະຖືກປະ­ຕິ­ບັດຕາມລະ­ບຽບກົດ­ໝາຍ.

ຂໍ້ມູນຈາກ: ນສພ ວຽງຈັນໃຫ່ມ