ລະມາມ ແນະນຳການຂຶ້ນສຳມະໂນທີ່ດິນ ແລະການອອກໃບຕາດິນ

• ໂດຍ: ໜູໄຊ
ວັນທີ 7 ພະຈິກ 2018 ນີ້ ຢູ່ທີ່ໂຮງຮຽນປະຖົມບ້ານປາກໂທນໄດ້ຈັດກອງປະຊຸມປະຊາສຳພັນແນະນຳການຂຶ້ນສຳມະໂນທີ່ດິນ ແລະການອອກໃບຕາດິນ ໃຫ້ແກ່ປະຊາຊົນບ້ານປາກໂທນ ເມືອງລະມາມ ແຂວງເຊກອງ ໂດຍການເປັນປະທານຂອງທ່ານ ນາງ ຄຳເສັງ ທຸມມະວົງສາ ຮອງເຈົ້າເມືອງໆລະມາມ ທັງເປັນຫົວໜ້າຄະນະຮັບຜິດຊອບຊີ້ນຳລວມການສ້າງສຳມະໂນທີ່ດິນ ແລະການອອກໃບຕາດິນ, ທ່ານ ບຸນຫຼາຍ ບຸດທິ ຫົວໜ້າພະແນກ ຊັບພະຍາກອນທຳມະຊາດ ແລະສິ່ງແວດລ້ອມແຂວງເຊກອງ, ມີຫົວໜ້າ-ຮອງຫ້ອງການ, ວິຊາການຂະແໜງການທີ່ກ່ຽວຂ້ອງ ແລະປະຊາຊົນເຂົ້າຮ່ວມ.

ທ່ານ ບຸນທອນ ຊະນະນິຄົມ ຫົວໜ້າຫ້ອງການຊັບພະຍາກອນທຳມະຊາດ ແລະສິ່ງແວດລ້ອມ ເມືອງລະມາມ ໄດ້ຜ່ານຂໍ້ຕົກລົງ ຂອງທ່ານເຈົ້າເມືອງ ສະບັບເລກທີ 555/ຈມ ລົງວັນທີ 31/10/2018 ວ່າດ້ວຍການແຕ່ງຕັ້ງຄະນະຊີ້ນຳກອງເລຂາພາກສະໜາມຂອງໂຄງການສຳຫຼວດ-ວັດແທກຈັດສັນທີ່ດິນໃຫ້ປະຊາຊົນເມືອງລະມາມ. ກອງປະຊຸມຍັງໃຫ້ຮູ້ ແລະອະທິບາຍຄວາມໝາຍຄວາມສຳຄັນຂອງໃບແຈ້ງທີ່ດິນ ແລະໃບຕາດິນຖາວອນ, ຮູ້ການກຳນົດຂອບເຂດ ສິດນຳໃຊ້ທີ່ດິນກະສິກຳ ແລະດິນປຸກສ້າງ, ການເສຍສິດ ແລະສິດໃນການໃຊ້ທີ່ດິນ, ບົດບາດຍິງ-ຊາຍ ທີ່ມີຊື່ໃນໃບຕາດິນ ແລະຍັງໃຫ້ຮູ້ຕື່ມ ກ່ຽວກັບຄ່າທຳນຽມ-ຂັ້ນຕອນຕ່າງໆໃນການຂຶ້ນສຳມະໂນທີ່ດິນ ແລະການອອກໃບຕາດິນ ເຊິ່ງມີລາຍລະອຽດດັ່ງນີ້:
ຄ່າບໍລິການສຳຫຼວດ-ວັດແທກຂໍ້ມູນສຳມະໂນທີ່ດິນ(ໃບແຈ້ງທີ່ດິນ), ດິນປຸກສ້າງ ແລະດິນກະສິກຳ 70.000/ຕອນ, ຄ່າທຳນຽມຂຶ້ນທະບຽນທີ່ດິນ (ໃບຕາດິນຖາວອນ) ດິນປຸກສ້າງ ແລະດິນກະສິກຳ 15.000ກີບ/ໃບຕາດິນ, ສຳລັບຄ່າສຳຫຼວດ-ວັດແທກດິນປຸກສ້າງ 100ກີບ/ຕາແມັດ, ດິນກະສິກຳ 150.000ກີບ/ເຮັກຕາ ແລະຍັງມີຄ່າບໍລິການອື່ນໆອີກເຊັ່ນ: ຄ່າທຳນຽມຈົດທະບຽນ 0,2 ຂອງມູນຄ່າການປະເມີນລາຄາ; ຄ່າຫົວຫຼັກເຂດ 12.000ກີບ/ຫຼັກ; ຄ່າຊົບໃບຕາດິນ 10.000ກີບ/ໃບ; ຄ່າແບບຟອມ 35.000ກີບ/ຊຸດ; ຄ່າແບບພິມໃບຕາດິນ 10.000ກີບ/ຊຸດ ແລະຄ່າກ້ອງ ອາທີເຄ ( RTK ) 25.000ກີບ/ຕອນ.
ທັງນີ້ ກໍເພື່ອເຮັດໃຫ້ການຈັດສັນທີ່ດິນເປັນລະບົບ ຖືກຕ້ອງຕາມລະບຽບກົດໝາຍ ທັງເປັນການຈັດເກັບລາຍຮັບເຂົ້າງົບປະມານແຫ່ງລັດເປັນປົກກະຕິ ແລະຕໍ່ເນື່ອງ ແລະທັງເປັນການແບ່ງຄວາມຮັບຜິດຊອບພາຍໃນໃຫ້ຈະແຈ້ງ ແລະ ກຳນົດແຜນການເຄື່ອນໄຫວດ້ານຕ່າງໆ ຮ່ວມກັບຂັ້ນສູນກາງ, ຂັ້ນແຂວງ ແລະ ພາກສ່ວນທີ່ກ່ຽວຂ້ອງ ຕະຫຼອດຮອດອຳນາດການປົກຄອງຂັ້ນຕ່າງໆເຮັດໃຫ້ການຈັດຕັ້ງປະຕິບັດບັນດາວຽກງານມີຄວາມເປັນເອກະພາບກັນ ແລະມີຜົນສຳເລັດ.

ຕອນທ້າຍຂອງພິທີ ທ່ານ ນາງ ຄຳເສັງ ທຸມມະວົງສາ ໄດ້ໂອ້ລົມຕໍ່ພິທີການໃນຄັ້ງນີ້ ເຊິ່ງທ່ານ ໄດ້ປຸກລະດົມຂົນຂວາຍ ໃຫ້ບັນດາປະຊາຊົນຈົ່ງພ້ອມກັນກຳແໜ້ນແນວທາງນະໂຍບາຍຂອງພັກ ແລະ ລັດວາງຢ່າງເຂັ້ມງວດ ໂດຍສະເພາະແມ່ນການຂຶ້ນສຳມະໂນທີ່ດິນ (ໃບແຈ້ງທີ່ດິນ) ແລະ ໃບຕາດິນຖາວອນ ໃຫ້ມີຜົນສຳເລັດ-ໂປ່ງໃສຕາມລະດັບຄາດໝາຍທີ່ວາງໄວ້, ນອກນີ້ ທ່ານຍັງໄດ້ເນັ້ນໃຫ້ພະນັກງານວິຊາການທີ່ກ່ຽວຂ້ອງ ພ້ອມກັນເປັນຈິດໜຶ່ງໃຈດຽວ ແລະ ທຸ້ມເທເຫື່ອແຮງເຂົ້າໃນການຈັດຕັ້ງປະຕິບັດວຽກງານການຂຶ້ນສຳມະໂນທີ່ດິນ ແລະ ການອອກໃບຕາດິນໃນຄັ້ງນີ້ ໃຫ້ມີປະສິທິຜົນ ແລະ ປະສິດທິພາບສູງສຸດ ໂດຍແນ່ເຮັດໃຫ້ການຈັດສັນທີ່ດິນ ພູມລຳເນົາຢ່າງເປັນລະບົບຄົບຊຸດ ຖືກຕ້ອງຕາມລະບຽບກົດໝາຍ ແລະ ຄວາມສວຍສົດງົດງາມຂອງປະເທດຊາດບ້ານເມືອງ.