ຫົວພັນ ພ້ອມຈັດງານສະເຫລີມສະຫລອງ 50 ປີ ວັນສ້າງຕັ້ງເມືອງ ວຽງໄຊ

ຫົວພັນ: ມາຮອດປັດຈຸບັນ ແຂວງຫົວພັນ ມີການກະກຽມຈົນພ້ອມແລ້ວໂດຍພື້ນຖານ ເພື່ອການຈັດງານສະເຫລີມສະຫລອງວັນສ້າງຕັ້ງເມືອງວຽງໄຊ ຖານທີ່ໝັ້ນຂອງການປະຕິວັດ ຄົບຮອບ 50 ປີ ( ວັນທີ 30 ພະຈິກ 1968-ວັນທີ 30 ພະຈິກ 2018 ) ຢ່າງຍິ່ງໃຫຍ່ໃນວັນທີ 30 ພະຈິກ 2018ນີ້.ທ່ານ ພູໂຊນ ທຳມະວິໄຊ, ຮອງເຈົ້າແຂວງ ຫົວພັນ, ທັງເປັນຫົວໜ້າຄະນະຮັບຜິດຊອບກະກຽມສະເຫລີມສະຫລອງວັນສ້າງຕັ້ງເມືອງ ວຽງໄຊ ຄົບຮອບ 50 ປີຂັ້ນແຂວງ ໃຫ້ສຳພາດວ່າ: ສະເພາະວຽກງານທີ່ຂັ້ນແຂວງຮັບຜິດຊອບ ເພື່ອກະກຽມໃຫ້ແກ່ການສະເຫລີມສະຫລອງວັນສ້າງຕັ້ງເມືອງວຽງໄຊ ຄັ້ງນີ້ ລວມມີ: ດ້ານເນື້ອໃນ ໄດ້ສຳເລັດການສະໜອງຂໍ້ມູນໃຫ້ສູນກາງເພື່ອຂຽນປະຫວັດຄວາມເປັນມາຂອງເມືອງວຽງໄຊ, ບົດສຳລັບການສຳມະນາວິທະຍາສາດ ແລະ ບົດປາຖະກະຖາກ່ຽວກັບເມືອງວຽງໄຊ ຮຽບຮ້ອຍແລ້ວ; ສ່ວນບົດສູນທອນພົດຂອງກົມການເມືອງສູນກາງພັກ ແລະ ບົດຄຳເຫັນຕ່າງໆ ໃກ້ຈະສຳເລັດແລ້ວ; ດ້ານການກະກຽມພື້ນຖານໂຄງລ່າງ ຈຳນວນ 9 ໂຄງການທີ່ລັດຖະບານໄດ້ອະນມັດຈັດຕັ້ງປະຕິບັດຢູ່ເມືອງວຽງໄຊ ນັ້ນ, ຍັງເຫລືອພຽງ 1 ໂຄງ ການທີ່ຍັງບໍ່ທັນສຳເລັດ ຄື: ໂຄງການສ້າງຕົວໜັງສືໃຫຍ່ໃສ່ຜາຫີນ, ຄາດວ່າຈະສຳເລັດໃນໄວໆນີ້. ສ່ວນເສັ້ນທາງເຂົ້າຫາແຂວງ ແລະ ເສັ້ນທາງແຕ່ແຂວງ ຫາເມືອງວຽງໄຊ ໄດ້ຮັບການສ້ອມແປງຢ່າງຕໍ່ເນື່ອງ, ເຮັດໃຫ້ສາມາດສັນຈອນໄປມາໄດ້ຢ່າງສະດວກສະບາຍແລ້ວ. ດ້ານຂະບວນການ, ໂດຍສະເພາະ ການກະກຽມລາຍການສະແດງສິລະປະ, ປັດຈຸບັນ ນັກຮຽນຈຳນວນ 600 ນ້ອງຈາກໂຮງຮຽນ ມ.ສ ວຽງໄຊ ກຳລັງເຝິກແອບຢ່າງຕໍ່ເນື່ອງ ໂດຍມີກົມສິລະປະການສະແດງ, ກະຊວງ ຖະແຫລງຂ່າວ, ວັດທະນະທຳ ແລະ ທ່ອງທ່ຽວມາຊ່ວຍເຝິກແອບໃຫ້.ນອກຈາກນີ້, ຍັງໄດ້ກະກຽມປະຊາຊົນ ແລະ ຕາງໜ້າຈາກຂະແໜງການຕ່າງຂອງເມືອງເພື່ອເຂົ້າຮ່ວມກ້ອນກຳລັງສວນສະໜາມຈຳນວນ 22 ກ້ອນສຳເລັດແລ້ວ ປະມານ 95 ສ່ວນຮ້ອຍ. ດ້ານການກະກຽມສະຖານທີ່ພັກເຊົາ ໄດ້ກະກຽມບັນດາໂຮງແຮມ ແລະ ເຮືອນພັກທັງຢູ່ເມືອງວຽງໄຊ ແລະ ເມືອງຊໍາເໜືອ, ລວມເຖີງ ບັນດາສຳນັກງານຕ່າງໆຂອງລັດ ໄວ້ຮອງຮັບແຂກທີ່ຈະມາຮ່ວມງານໃນຄັ້ງນີ້ໄວ້ແລ້ວ. ສ່ວນວຽກງານປ້ອງກັນຊາດ-ປ້ອງກັນຄວາມສະຫງົບ ແລະ ວຽກງານຮັກສາສຸຂະພາບ, ພາກສ່ວນກ່ຽວຂ້ອງຂອງແຂວງ ແລະ ເມືອງ ໄດ້ສົມທົບກັບພາກສ່ວນກ່ຽວຂ້ອງຈາກສູນກາງໄດ້ກະກຽມຢ່າງຕໍ່ເນື່ອງ. ນອກຈາກນີ້, ດ້ານພິທີການ ແລະ ຂະບວນການດ້ານຕ່າງໆ, ກໍ່ໄດ້ຮັບການກະກຽມສຳເລັດເກືອບໝົດແລ້ວ ເຊັ່ນດຽວກັນ.ຮອງເຈົ້າແຂວງ ຫົວພັນ ໃຫ້ຮູ້ຕື່ມວ່າ: ສຳລັບສິ່ງທີ່ໜ້າເປັນຫ່ວງໃນໂອກາດຈັດງານສະເຫລີມສະຫລອງວັນສ້າງຕັ້ງເມືອງວຽງໄຊ ຄົບຮອບ 50 ປີ ໃນຄັ້ງນີ້ ແມ່ນບັນຫາທີ່ພັກ ແລະ ອາຫານການກິນ ເພາະໃນງານຄັ້ງນີ້ຄາດຄະເນເບື້ອງຕົ້ນຈະມີແຂກຈາກສູນກາງ, ທ້ອງຖິ່ນ ແລະ ຕ່າງປະເທດ ມາຮ່ວມງານປະມານ 10.000 ຄົນ ແຕ່ອົງການປົກຄອງແຂວງມີແຜນຮອງຮັບໄວ້ແລ້ວ ເພາະນອກຈາກຈະໃຫ້ແຂກພັກຢູ່ຕາມໂຮງແຮມ, ເຮືອນພັກ ແລະ ສຳນັກງານຕ່າງໆຂອງລັດ ຍັງຈະໃຫ້ແຂກພັກເຊົາຢູ່ນຳປະຊາຊົນ ຫລື ໂຮມສະເຕ ຢູ່ພາຍໃນເມືອງ ວຽງໄຊ ເພາະໄດ້ກະກຽມໄວ້ແລ້ວ. ນອກຈາກນີ້ ຖ້າແຂກທີ່ຈະມາຮ່ວມງານຕ້ອງການກາງເຕັ້ນນອນຢູ່ເມືອງ ວຽງໄຊ ອົງການປົກຄອງແຂວງຈະຄົ້ນຄ້ວາ ແລະ ອຳນວຍຄວາມສະດວກໃຫ້, ພ້ອມກັນການຮັກສາຄວາມປອດໄພດ້ານຕ່າງໆ ໃຫ້ດີທີ່ສຸດ. ສ່ວນເລື່ອງອາຫານການກິນ ໄດ້ອະນຸຍາດໃຫ້ຜູ້ປະກອບການຢູ່ເມືອງອ້ອມຂ້າງເຂົ້າມາໃຫ້ບໍລິການດ້ານອາຫານຢູ່ເມືອງ ວຽງໄຊ ໃນໄລຍະຈັດງານ ຄາດວ່າຈະພຽງພໍກັບຄວາມຕ້ອງການຂອງແຂກທີ່ຈະເດີນທາງເຂົ້າມາຮ່ວມງານໃນຄັ້ງນີ້.ຂ່າວ;ພາບ: ບຸນຕຽງ ຈັນທະວົງ