ຕາດສະເມັກ ສະຖານທີ່ທ່ອງທ່ຽວແຫ່ງໃໝ່ ທີ່ໜ້າທ່ຽວຊົມ

0
320

ບັນຍາກາດສະຫຼອງປີໃໝ່ລາວຫາກໍ່ຜ່ານມາບໍ່ດົນ ຫຼາຍໆຄົນຄົງຍັງຄິດເຖິງບັນຍາກາດການສະຫຼອງ ປີໃໝ່ທີ່ເບີກບານມ່ວນຊື່ນ. ປີໃໝ່ຜ່ານມານີ້ ສະຖານທີ່ທ່ອງທ່ຽວແຫ່ງຕ່າງໆພາຍໃນແຂວງຈຳປາສັກ ທັງສວນ ນຳ້, ສວນດອກໄມ້, ຫາດຊາຍ ແລະ ນຳ້ຕົກ ແມ່ນມີນັກທ່ອງທ່ຽວໄປພັກຜ່ອນຄາຍຮ້ອນຢ່າງ ຫຼວງຫຼາຍ ເຮັດໃຫ້ບັນດາຜູ້ປະກອບການຕ່າງໜ້າຊື່ນຕາບານ ກັນໄປທົ່ວໜ້າ. ໃນບັນດາສະຖານທີ່ທ່ອງ ທ່ຽວຕ່າງໆນັ້ນ ນຳ້ຕົກຕາດສະເມັກ ຢູ່ເມືອງປາກຊ່ອງ ນັບວ່າເປັນອີກສະຖານທີ່ທ່ອງທ່ຽວໜຶ່ງ ທີ່ໜ້າທ່ຽວຊົມເປັນຢ່າງຍິ່ງ.

ສະຖານທີ່ທ່ອງທ່ຽວ ນຳ້ຕົກຕາດສະເມັກ ຕັ້ງຢູ່ບ້ານທົ່ງກະຕ່າຍ ຄຸ້ມຕາດສະເມັກ. ຈາກປາກຊ່ອງ ອອກໄປຕາມເສັ້ນທາງ ໄປເຊປຽນ ປະມານ 11 ກິໂລແມັດກໍ່ເຖິງ. ມື້ທີ່ຜູ້ຂຽນມີໂອກາດໄດ້ໄປແມ່ນມື້ທີ 2 ຂອງບຸນປີໃໝ່ລາວ ມື້ນັ້ນທີ່ຕາດສະເມັກອາກາດດີບໍ່ມີແດດ ຈຶ່ງເໝາະສົມເປັນຢ່າງຍິ່ງໃນການໄປທ່ຽວ. ພວກເຮົາຈ່າຍຄ່າເຂົ້າຊົມຜູ້ລະ 5 ພັນກີບ ແລ້ວກໍ່ຍ່າງໄປຕາມຂົວໄມ້ທີ່ພາດກາງໜອງ, ເບິ່ງແລ້ວທັງຂົວ ແລະ ໜອງນຳ້ຄົງສ້າງຂຶ້ນໃໝ່ທັງໝົດ ເຊິ່ງໃຫ້ບັນຍາກາດດີຫຼາຍ. ແຄມໜອງອີກຟາກໜຶ່ງ ຍັງມີຕູບຫຼາຍຫຼັງໄວ້ ຄອຍບໍລິການໃຫ້ນັກທ່ອງທ່ຽວ ຊຶ່ງມີຄ່າເຊົ່າຕິດໄວ້ຢ່າງຈະແຈ້ງ ໃນແຕ່ລະຫຼັງ. ອອກຈາກ ໜອງນຳ້ໄປ ໜ້ອຍ ໜຶ່ງ ຍັງມີສວນດອກໄມ້ເມືອງໜາວນາໆຊະນິດ ໄວ້ໃຫ້ຊົມ ຊຶ່ງອາດເວົ້າໄດ້ວ່າ ເປັນຈຸດສຳຄັນໜຶ່ງສຳລັບ ນັກ ທ່ອງທ່ຽວ ເພດຍິງທີ່ມັກຖ່າຍຮູບກັບສວນດອກໄມ້.

ອອກຈາກສວນດອກໄມ້ ພວກເຮົາພາກັນຍ່າງຂ້າມນຳ້ຫ້ວຍທີ່ໃສໄຫຼເຢັນໄປອີກຟາກໜຶ່ງ. ຢູ່ຟາກນັ້ນ ເຈົ້າຂອງສະຖານທີ່ທ່ອງທ່ຽວແຫ່ງນີ້ ເພິ່ນປູກສະຕໍເບີຣີໄວ້ໃຫ້ນັກທ່ອງທ່ຽວຊີມ-ຊື້ກິນ. ມື້ນັ້ນ ໂຊກດີ ຍັງມີໝາກ ສະຕໍເບີຣີຈຳນວນຫຼາຍໄວ້ໃຫ້ຊີມ. ຫຼັງຈາກຊີມຫຼາຍໜ່ວຍ ກໍ່ໄດ້ຊື້ຊ່ວຍເພິ່ນ 1 ກັບ ລາຄາ 50 ພັນກີບ/ກັບ ເຊິ່ງຖືວ່າກຸ້ມລາຄາ ເພາະໝາກສະຕໍເບີຣີຍັງສົດໆໃໝ່ໆ ອີກທັງລົດຊາດກໍ່ແຊບເອົາແທ້ໆ.


ໃກ້ໆກັບສວນສະຕໍເບີຣີ ຍັງມີຕູບໃຫ້ນັ່ງພັກຜ່ອນ ແລະ ມີຮ້ານອາຫານໄວ້ຄອຍບໍລິການນັກທ່ອງທ່ຽວ ອີກ. ມື້ນັ້ນ ທົດລອງສັ່ງອາຫານປະເພດປີ້ງໄກ່ ແລະ ຕຳສົ້ມໝາກຫຸ່ງ ອາຫານທັງສອງຢ່າງຂອງຮ້ານອາຫານນີ້ ບອກໄດ້ເລີຍວ່າແຊບຫຼາຍ ເວົ້າເຖິງຍັງນຳ້ລາຍໄຫຼ ຄິດຮອດຕ່ອນໄກ່ໃໝ່ໆ ແລະ ຕຳສົ້ມນົວໆ. ໃກ້ໆກັບ ຮ້ານອາຫານນີ້ ແມ່ນຈຸດລົງເບິ່ງນຳ້ຕົກຕາດສະເມັກ ແບບໃກ້ຊິດຊະນິດລົງອາບໄດ້ ໃຜກິນເຂົ້າຫຼາຍໜັກ ທ້ອງຢາກລົງແຊ່ນຳ້ກໍ່ບໍ່ວ່າກັນ. ຈາກຈຸດນຳ້ຕົກຕາດຂ້າງຮ້ານອາຫານນີ້ແລ້ວ ຍັງມີຈຸດນຳ້ຕົກຕາດທີ່ໃຫຍ່ ແລະ ສວຍງາມກວ່າແຕ່ຢູ່ຈຸດລຸ່ມລົງໄປອີກໜ້ອຍໜຶ່ງ.


ອີ່ມດີມີຜະຫຍາກັບອາຫານແຊບ ມື້ນັ້ນຍັງມີໂອກາດລົມກັບພໍ່ ຄຳຜົງ ສັງສົມສັກ ( ອ້າຍຂອງທ່ານ ບຸນເກີດ ສັງສົມສັກ ) ເຈົ້າຂອງທີ່ດິນສະຖານທີ່ທ່ອງທ່ຽວນີ້. ເພິ່ນບອກວ່າສະຖານທີ່ທ່ອງທ່ຽວນີ້ແມ່ນຄົນລາວ ຢູ່ນະຄອນຫຼວງວຽງຈັນມາລົງທຶນ, ສ່ວນເພິ່ນເປັນທີ່ດິນ ໂດຍແບ່ງປັນຜົນປະໂຫຍດຮ່ວມກັນ. ເລີ່ມລົງມື ກໍ່ສ້າງພວມໄດ້ 5 ເດືອນປາຍ ແລະ ທົດລອງເປີດໃຫ້ຄົນມາທ່ຽວໄດ້ 2 ເດືອນປາຍແລ້ວ, ຄາດວ່າອອກ ພັນສາປີນີ້ ຈຶ່ງຈະໄດ້ເປີດຢ່າງເປັນທາງການ.

ສິ່ງທີ່ຜູ້ຂຽນປະທັບໃຈຫຼາຍໃນສະຖານທີ່ທ່ອງທ່ຽວນີ້ ນອກຈາກມີບ່ອນທ່ຽວທ່ຽວທີ່ສະອາດສວຍງາມ, ແລະ ອາຫານການກິນທີ່ສະອາດ-ແຊບແລ້ວ ຍັງມີການຈັດການເລື່ອງສິ່ງແວດລ້ອມທີ່ດີ, ໂດຍມີບ່ອນຖິ້ມ ຂີ້ເຫຍື້ອ ແລະ ປ້າຍບອກ ຕາມຈຸດຕ່າງໆນຳອີກ ຊຶ່ງສິ່ງນີ້ຄວນຮັກສາໄວ້ໃຫ້ຄົງຢູ່ຕະຫຼອດໄປ.

ໂດຍ: ຫຼານພໍ່ເຖົ້າ (ຫນັງສືພິມຈໍາປາໃຫມ່)