ສກຂ ອັດຕະປື ມອບເງິນຊ່ວຍເຫລືອ ໃຫ້ຄູ ຜູ້ປະສົບເຄາະຮ້າຍ ຢູ່ເມືອງສະໜາມໄຊ 186 ລ້ານກີບ

ພະແນກສຶກສາທິການ ແລະ ກິລາ ແຂວງອັດຕະປື ( ສກຂ ອັດຕະປື) ມອບເງິນຊ່ວຍເຫລືອ ຈຳນວນ 186 ລ້ານກີບ ໃຫ້ພະນັກງານຄູ-ອາຈານ ຜູ້ທີ່ປະສົບເຄາະຮ້າຍ ຈາກໄພພິບັດນ້ຳຖ້ວມ ຢູ່ເມືອງສະໜາມໄຂ ແຂວງ ອັດຕະປື ໃນຄືນວັນທີ 23 ກໍລະກົດ 2018 ຜ່ານມານີ້, ຈຳນວນເງິນດັ່ງກ່າວ ແມ່ນ ໄດ້ຈາກການລະດົມ ປະກອບສ່ວນນ້ຳໃຈຊ່ວຍເຫລືອ ຈາກພະນັກງານຂະແໜງການສຶກສາ ແລະ ກິລາ ທຸກຄົນໃນທົ່ວແຂວງ ຜູ້ລະ 100.000 ກີບ, (ຍົກເວັ້ນຜູ້ທີ່ຖືກຜົນກະທົບ).

ພະນັກງານຄູ-ອາຈານທີ່ໄດ້ຮັບເຄາະຮ້າຍ ດັ່ງກ່າວ ມີ ຈຳນວນທັງໝົດ 85 ຄົນ, ຍິງ 33 ຄົນ, ໃນນັ້ນ ມີພະນັກງານຄູສອນ 70 ຄົນ, ຍິງ 30 ຄົນ, ພະນັກງານ ບໍລິຫານ 15 ຄົນ, ຍິງ3 ຄົນ, ໂດຍ ໄດ້ຈັດເປັນ 3 ປະເພດ ຄື: ປະເພດ ຜູ້ທີ່ຖືກຜົນກະທົບໜັກມີ 27 ຄົນ ໄດ້ຮັບເງິນຊ່ວຍເຫລືອ ຜູ້ລະ 4.000.000 ກີບ, ປະເພດຜູ້ທີ່ຖືກຜົນກະທົບປານກາງ ມີ 20 ຄົນ ໄດ້ຮັບເງິນຊ່ວຍເຫລືອ ຜູ້ລະ 2.000.000 ກີບ ແລະ ປະເພດຜູ້ທີ່ຖືກຜົນກະທົບເບົາ 38 ຄົນ ໄດ້ຮັບເງິນຊ່ວຍເຫລືອ ຜູ້ລະ 1.000.000 ກີບ,

ການມອບ-ຮັບ ເງິນຊ່ວຍເຫລືອຄັ້ງນີ້ ໄດ້ຈັດພິທີມອບ-ຮັບຂື້ນຢ່າງເປັນທາງການ ໃນຕອນເຊົ້າທີ 9 ພະຈິກ 2018 ນີ້ ທີ່ເດີ່ນກິລາ ເປຕັງ ຂອງຫ້ອງການສຶກສາທິການ ແລະ ກິລາ ເມືອງສະໜາມໄຊ ໂດຍ ແມ່ນ ທ່ານ ເວຫາ ກົມມະເມືອງ ຄະນະພະແນກສຶກສາທິການ ແລະ ກິລາ ແຂວງ ເປັນກຽດຕາງໜ້າໃຫ້ຄະນະການນຳ ສຶກສາ-ກິລາຂັ້ນ ແລະ ວິຊາການໃນທົ່ງແຂວງ ກ່າວມອບ ແລະ ກ່າວຮັບໂດຍ ຜູ້ຕາງໜ້າ ຂອງພະນັກງານ ຄູ-ອາຈານ ທີ່ຖືກປະສົບເຄາະຮ້າຍ, ໃນພິທີດັ່ງກ່າວ ໂດຍມີ ທ່ານ ນາງ ມະນີລາ ໄຊສົມບູນ ຮອງເຈົ້າເມືອງສະໜາມໄຊ, ທ່ານ ທຸງໄຊ ບຸດທອງດີ ຫົວໜ້າຫ້ອງການສຶກສາທິການ ແລະ ກິລາ ເມືອງສະໜາມໄຊ, ມີ ຄະນະຜູ້ບໍລິການສຶກສາຂັ້ນເມືອງ 5 ເມືອງ ພ້ອມດ້ຍວິຊາການ ແລະ ພະນັກງານຄ-ອາຈານ ຜູ້ປະສົບເຄາະຮ້າຍເຂົ້າຮ່ວມ ຢ່າງພ້ອມພຽງ.