ຂ່າວລັດຖະບານ: ຄະນະຜູ້ແທນຂັ້ນສູງຂອງ ສ.ກູບາ ຢ້ຽມຢາມ ສປປ.ລາວ

ຂປລ: ສະຫາຍ ມີເກັນ ດີເອັດສ-ກາແນນ ແບຣມູເດັດສ, ປະທານສະພາແຫ່ງລັດ ແລະ ປະທານສະພາລັດຖະມົນຕີ ແຫ່ງ ສາທາລະນະລັດ ກູບາ ໄດ້ເດີນທາງມາຢ້ຽມຢາມລັດຖະກິດ ສປປ.ລາວ ຢ່າງເປັນທາງການ ແຕ່ວັນທີ 10-11 ພະຈິກ2018 ນີ້ ຕາມຄໍາເຊີນຂອງ ສະຫາຍ ບຸນຍັງ ວໍລະຈິດ, ປະທານປະເທດ ແຫ່ງ ສປປ ລາວ

ໃນໄລຍະຢ້ຽມຢາມລາວ, ສະຫາຍ ມີເກັນ ດີເອັດສ-ກາແນນ ແບຣມູເດັດສ ໄດ້ພົບປະຢ່າງເປັນທາງການກັບ ສະຫາຍ ບຸນຍັງ ວໍລະຈິດ, ປະທານປະເທດ ແຫ່ງ ສປປ ລາວ, ສະຫາຍ ທອງລຸນ ສີສຸລິດ, ນາຍົກລັດຖະມົນຕີ ແຫ່ງ ສປປ ລາວ ແລະ ສະຫາຍ ນາງ ປານີ ຢາທໍ່ຕູ່, ປະທານສະພາແຫ່ງຊາດ.

ໃນການພົບປະປຶກສາຫາລືຢ່າງເປັນທາງການກັບການນໍາຂອງລາວ, ສອງຝ່າຍໄດ້ແຈ້ງໃຫ້ກັນຊາບສະພາບການທີ່ພົ້ນເດັ່ນຂອງສອງປະເທດ, ຕີລາຄາກ່ຽວກັບການຮ່ວມມືສອງຝ່າຍໃນໄລຍະຜ່ານມາ ແລະ ປຶກສາຫາລືທິດທາງການຮ່ວມມືໃນຕໍ່ໜ້າ ລະຫວ່າງ ສອງປະເທດ, ແລກປ່ຽນທັດສະນະຕ່າງໆກ່ຽວກັບບັນຫາພາກພື້ນ ແລະ ສາກົນ ທີ່ຕ່າງຝ່າຍຕ່າງມີຄວາມສົນໃຈນໍາກັນ.

ໃນໂອກາດພົບປະຄັ້ງນີ້, ບັນດາສະຫາຍການນໍາຂອງລາວ ໄດ້ຢັ້ງຢືນຄືນເຖິງແນວທາງສະເໝີຕົ້ນສະເໝີປາຍຂອງພັກ ລັດຖະບານລາວ ໃນການສືບຕໍ່ການພົວພັນ, ຮ່ວມມື ລະຫວ່າງ ສອງປະເທດໃນອານາຄົດ ເພື່ອເຮັດໃຫ້ສາຍພົວພັນມິດຕະພາບທີ່ເປັນມູນເຊື້ອອັນດີງາມ ລະຫວ່າງສອງປະເທດສືບຕໍ່ໄດ້ຮັບການເສີມຂະຫຍາຍ ແລະ ຈະເລີນງອກງາມຂື້ນເລື້ອຍໆ. ພ້ອມທັງໄດ້ສະແດງຄວາມຂອບອົກຂອບໃຈຢ່າງສູງຕໍ່ພັກ, ລັດຖະບານ ແລະ ປະຊາຊົນກູບາ ອ້າຍນ້ອງທີ່ໄດ້ສະໜັບສະໜູນ ແລະ ຊ່ວຍເຫຼືອອັນລໍ້າຄ່າແກ່ພາລະກິດຕໍ່ສູ້ກູ້ຊາດຂອງປະຊາຊົນລາວໃນເມື່ອກ່ອນ ກໍ່ຄືພາລະກິດປົກປັກຮັກສາ ແລະ ສ້າງສາພັດທະນາປະເທດຊາດໃນປະຈຸບັນ.

ສະຫາຍ ມີເກັນ ດີເອັດສ-ກາແນນ ແບຣມູເດັດສ, ໄດ້ສະແດງຄວາມພາກພູມໃຈ ທີ່ໄດ້ມີໂອກາດມາຢ້ຽມຢາມລາວອີກເທື່ອໜຶ່ງ ແລະ ສະແດງຄວາມຊົມເຊີຍຕໍ່ຜົນສໍາເລັດ ແລະ ຄວາມກ້າວໜ້າຂອງປະຊາຊົນລາວ ອ້າຍນ້ອງ ໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດໃຫ້ຈະເລີນຮຸ່ງເຮືອງຢ່າງບໍ່ຢຸດຢັ້ງ. ສະຫາຍໄດ້ຢັ້ງຢືນຄືນແນວທາງນະໂຍບາຍຂອງພັກ ແລະ ລັດ ກູບາ ທີ່ຈະສືບຕໍ່ຮັດແໜ້ນ ແລະ ເສີມຂະຫຍາຍການພົວພັນ ແລະ ຮ່ວມມືອັນເປັນມູນເຊື້ອ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ກູບາ-ລາວ ໃນສະເພາະໜ້າ ແລະ ຍາວນານ ກໍ່ຄືຄວາມມຸ່ງໝັ້ນທີ່ຈະສືບຕໍ່ໃຫ້ການຮ່ວມມື ແລະ ຊ່ວຍເຫຼືອ ສປປ ລາວ ໃນດ້ານການກໍ່ສ້າງຊັບພະຍາກອນມະນຸດ, ກິລາ ແລະ ສາທາລະນະສຸກ.

ໃນໂອກາດດຽວກັນນີ້, ປະທານສະພາແຫ່ງລັດ ແລະ ປະທານສະພາລັດຖະມົນຕີ ໄດ້ເຊື້ອເຊີນ ສະຫາຍ ບຸນຍັງ ວໍລະຈິດ, ປະທານປະເທດ ແຫ່ງສາທາລະນະລັດ ປະຊາທິປະໄຕ ປະຊາຊົນລາວ ໄປຢ້ຽມຢາມ ສາທາ ລະນະລັດ ກູບາ ຢ່າງເປັນທາງການໃນເວລາອັນສະດວກໃນຕໍ່ໜ້າ.

ສອງຝ່າຍ ລາວ-ກູບາ ໄດ້ເຊັນສັນຍາການຮ່ວມມື ລະຫວ່າງ ກະຊວງສຶກສາທິການ ແລະ ກິລາ ແຫ່ງ ສປປ ລາວ ແລະ ສະຖາບັນກິລາພາລະສຶກສາ ແລະ ສີລະປະແຫ່ງຊາດ ສ.ກູບາ ແລະ ສັນຍາການຮ່ວມມື ລະຫວ່າງ ທະນາຄານ ແຫ່ງ ສປປ ລາວ ແລະ ທະນາຄານ ແຫ່ງ ສ.ກູບາ. ນອກຈາກນີ້, ປະທານສະພາແຫ່ງລັດ ແລະ ປະທານສະພາລັດຖະມົນຕີ ຍັງໄດ້ໄປວາງພວງມາລາຢູ່ອານຸສາວະລີນັກຮົບວິລະນາມ, ທ່ຽວຊົມສະຖານທີ່ປະຫວັດສາດ ແລະ ວັດທະນະທໍາບາງແຫ່ງຢູ່ພາຍໃນນະຄອນຫຼວງວຽງຈັນ.

ການຢ້ຽມຢາມລາວທາງລັດຖະກິດຂອງ ສະຫາຍ ມີເກັນ ດີເອັດສ-ກາແນນ ແບຣມູເດັດສ ຄັ້ງນີ້ ເປັນເຫດ ການສໍາຄັນທາງດ້ານປະຫວັດສາດແຫ່ງການພົວພັນ ລະຫວ່າງ ສປປ ລາວ ແລະ ສ.ກູບາ ເປັນການປະກອບສ່ວນສໍາຄັນເຂົ້າໃນການຮັດແໜ້ນສາຍພົວພັນມິດຕະພາບ, ຄວາມສາມັກຄີຖານອ້າຍນ້ອງ ແລະ ການຮ່ວມມືຮອບດ້ານ ລະຫວ່າງ ສອງປະເທດ ກໍ່ຄືປະຊາຊົນສອງຊາດ ລາວ-ກູບາ ທີ່ມີມາດົນນານນັ້ນ ໃຫ້ນັບມື້ນັບໄດ້ຮັບການເພີ່ມພູນຄູນສ້າງ ແລະ ພັດທະນາໄປສູ່ບາດກ້າວໃໝ່ເພື່ອຜົນປະ ໂຫຍດລວມຂອງທັງສອງປະເທດ.

ຂ່າວ: ບຸນຕຽງ ຈັນທະວົງ
ພາບ: ຂປລ