ເມືອງເງິນເປີດເມືອງທ່ອງທ່ຽວ, ງານສະເຫຼີມສະຫຼອງວັນສ້າງຕັ້ງເມືອງເງິນ ຄົບ 26 ປີ ແລະ ງານແຂ່ງຂັນຊ່ວງເຮືອປະຈຳປີ 2018

0
148

ເພື່ອເປັນການອານຸລັກຮັກສາ ແລະ ເສີມຂະຫຍາຍວັດທະນະທຳ,ຮີດຄອງປະເພນີທີ່ເປັນເອກກະລັກຂອງຊາດຂອງເຜົ່າໄວ້ໃຫ້ຍືນຍົງ, ເພື່ອເປັນການເສີມຂະຫຍາຍສ້າງຄວາມມັກຄີທົ່ວປວງຊົນ, ສ້າງໂອກາດໃຫ້ປະຊາຊົນໄດ້ພົບປະແລກປ່ຽນບົດຮຽນທາງດ້ານຄ້າການຂາຍ,ທັງເປັນການຊຸກຍູ້ສົ່ງເສີມດ້ານເສດຖະກິດ,ການບໍລິການ ແລະ ການທອ່ງທ່ຽວພາຍໃນເມືອງໃຫ້ມີບັນຍາກາດຟົດຟື້ນກວ້າງຂວາງ

 

ມາໃນວັນທີ່ 18 – 19 ພະຈິກ 2018 ນີ້ ຢູທີ່ ອ່າງເກັບນ້ຳຫ້ວຍນານ້ອຍ ເມືອງເງິນ ແຂວງໄຊຍະບູລີ ໄດ້ຈັດງານເປີດເມືອງທ່ອງທ່ຽວ, ງານສະເຫຼີມສະຫຼອງວັນສ້າງຕັ້ງເມືອງເງິນ ຄົບ 26 ປີ ແລະ ງານແຂ່ງຂັນຊ່ວງເຮືອປະຈຳປີ 2018. ເຂົ້າຮ່ວມເປັນກຽດ ມີທ່ານພົງສະຫວັນ ສິດທະວົງ ກຳມະການສູນກາງພັກ ເລຂາພັກແຂວງ ເຈົ້າແຂວງ ໄຊຍະບູລີ, ມີທ່ານ ບຸນມີ ຈັນທິບ ກຳມະການພັກແຂວງ ເລຂາພັກເມືອງເຈົ້າເມືອງໆເງິນ, ມີຄະນະນຳຂອງແຂວງ, ຄະນະຂອງເມືອງ, ບັນດາເມືອງອ້ອມຂ້າງ ຈາກແຂວງ ບໍ່ແກ້ວ, ແຂວງອຸດົມໄຊ, ແລະ ມາຈາກແຂວງນ່ານ, ແຂວງ ພະເຍົາ ປະເທດໄທ, ມີບັນດານັກທຸລະກິດ,ນັກສີພາຍ, ແລະ ພໍ່ແມ່ປະຊາຊົນພາຍໃນເມືອງ, ຕ່າງເມືອງ, ຕ່າງແຂວງ ແລະ ຕ່າງປະເທດ ເຂົ້າຮ່ວມຢ່າງຄັບຄາໜາແໜ້ນ.

ທ່ານ ບຸນມີ ຈັນທິບ ກຳມະການພັກແຂວງ ເລຂາພັກເມືອງເຈົ້າເມືອງໆເງິນ ໃນນາມປະທານຈັດງານແຂ່ງຂັນ ກໍ່ໃຫ້ກຽດຂື້ນກ່າວເປີດເມືອງທ່ອງທ່ຽວ, ງານສະເຫຼີມສະຫຼອງວັນສ້າງຕັ້ງເມືອງເງິນ ຄົບ 26 ປີ ແລະ ງານແຂ່ງຂັນຊ່ວງເຮືອປະຈຳປີ 2018ຢ່າງເປັນທາງການ. ພາຍຫຼັງສຳເລັດພິທີ ທາງຄະນະປະທານກໍ່ໃຫ້ກຽດຂື້ນຕັດແທບຜ້າ, ລັ່ນຄອງເກົ້າບາດ, ປ່ອຍນົກ ເພື່ອເປັນສິຣິມຸງຄຸນໃນການເປີດງານດັ່ງກ່າວ, ພາຍໃນງານ ມີຮ້ານວາງສະແດງສີ້ນຄ້າຫັດຖະກຳທີ່ຜະລິດຈາກຊາວເມືອງເງິນ, ຜົນຜະລິດກະສິກຳ, ສະແດງສິລະປະວັນນະຄະດີ ແລະ ການປະກວດອາຫານພື້ນເມືອງ.

 

ງານແຂ່ງຂັນຊວງເຮືອໃນປີນີ້ ແມ່ນມີເຮືອເຂົ້າຮ່ວມແຂ່ງຂັນທັງໝົດ 23 ລຳ,ເພດຍິງ 10 ໃຊ້ເວລາ ແຂ່ງຂັນ 2 ມື້, ພິເສດປີນີ້ ແມ່ນມີເຮືອມິດຕະພາບ ລະຫວ່າງເມືອງຕໍ່ເມືອງ ສຳລັບ ຜົນການແຂ່ງຂັນ ທີ 1 ເພດຊາຍແມ່ນ ບ້ານທອງ ໄດ້ຮັບຂັນເງິນຂອງທ່ານເຈົ້າເມືອງ 1 ໜ່ວຍ, ນໍ້າໜັກ 1 ກິໂລ ມູນຄ່າ 10 ລ້ານກີບ, ເງິນສົດ 4 ລ້ານກີບ, ທີ 1 ເພດຍິງ ແມ່ນ ເຮືອບ້ານ ບ້ານນາງົວ ໄດ້ຮັບຂັນເງິນ ຂອງທ່ານເຈົ້າເມືອງ 1 ໜ່ວຍ ນ້ຳໜັກ 1 ກິໂລ ມູນຄ່າ 10 ລ້ານກີບ ເງິນສົດ 4 ລ້ານກີບ , ທີ 2 ເພດຊາຍ ບ້ານນາງົວ ໄດ້ຮັບຂັນເງິນ 1 ໜ່ວຍ ເງິນສົດ 3 ລ້ານກີບ , ທີ 2 ເພດຍິງ ແມ່ນ ເຮືອບ້ານ ບີໝີ ໄດ້ຮັບຂັນເງິນ 1 ໜ່ວຍ ເງິນສົດ 3 ລ້ານກີບ, ທີ 3 ເພດຊາຍ ແມ່ນ ເຮືອບໍລິສັດສັນຕິໄຊ ໄດ້ຮັບຂັນເງິນ 1 ໜ່ວຍ ເງິນສົດ 2,000,000 ກີບ ແລະ ທີ 3 ເພດຍິງ ແມ່ນເຮືອບ້ານ ທອງ ໄດ້ຮັບຂັນເງິນ 1 ໜ່ວຍ ເງິນສົດ 2,000,000 ກີບ ແລະ ຊະນະເລີດ ເຮືອມິດຕະພາບ ແມ່ນ ເມືອງຫົງສາ ໄດ້ຮັບຂັ້ນເງິນ 1 ໜ່ວຍ ເງິນສົດ 2,000,000 ກີບ. ທີ 2 ແມ່ນເຮືອ ມິຕະພາບເມືອງເງິນ.

ໃຫ້ກຽດຂື້້ນມອບລາງວັນຊະນະເລີດເພດຊາຍ – ເພດຍິງ ໂດຍແມ່ນທ່ານ ຄໍາສຸກທໍ່ ຮອງເລຂາພັກແຂວງ ປະທານແນວລາວສ້າງຊາດແຂວງ .


ໂດຍ: ອິນແປງ ແຫວນຄຳ
ໂທ: 02055567815