ໜ່ວຍກູ້ໄພແຂວງຈຳປາສັກຍັງມີຄວາມຕ້ອງການຜູ້ອຸປະຖຳດ້ານງົບປະມານສູງເພື່ອນຳໃຊ້ປັບປຸງວຽກງານຊ່ວຍເຫຼືອສັງຄົມ

ໜ່ວຍກູໄພຂອງມູນິທິຊ່ວຍເຫຼືອຄົນທຸກຍາກແຂວງຈຳປາສັກຍັງມີຄວາມຕ້ອງການຜູ້ອຸປະຖຳຫຼັກດ້ານງົບປະມານ ເພາະຖ້າທຽບໃສ່ປັດຈຸບັນຍັງຂາດເຂີນຫຼາຍ ເພື່ອນຳໃຊ້ເຂົ້າໃນການຍົກລະດັບຄວາມຮູ້ດ້ານການກູ້ໄພ,ຊື້ອຸປະກອນປະຖົມພະຍາບານ ແລະ ອຸປະກອນກູ້ໄພອຸບັດເຫດໜັກ ຂະນະທີ່ຜົນງານໃນໜຶ່ງປີສາມາດຊ່ວຍເຫຼືອຄົນເຈັບຈາກການເກີດອຸບັດເຫດຕາມຖະໜົນໄດ້ 1.456 ຄົນ.


ທ່ານ ທອງພັນ ໄຊທະນາສີ ຫົວໜ້າມູນນິທິຊ່ວຍເຫຼືອຄົນທຸກຍາກແຂວງຈຳປາສັກ ໃຫ້ສຳພາດກັບນັກຂ່າວໜັງສືພິມຈຳປາໃໝ່ ໃນວັນທີ 3 ພຶດສະພາ 2018 ນີ້ວ່າ: ມູນນິທິຊ່ວຍເຫຼືອຄົນທຸກຍາກແຂວງຈຳປາສັກມີ 2 ພາລະບົດບາດໃຫຍ່ ແຕ່ໃນນັ້ນເຮົາສາມາດເຮັດໄດ້ພຽງບົດບາດດຽວຄື ສ້າງຕັ້ງໜ່ວຍກູ້ໄພຊ່ວຍເຫຼືອສັງຄົມ, ສ່ວນພາລະບົດບາດໃນການຊ່ວຍເຫຼືອຄົນທຸກຍາກ,ຜູ້ດ້ອຍໂອກາດທາງສັງຄົມເຮົາຍັງເຮັດບໍ່ທັນໄດ້ຍ້ອນເຮົາຍັງຂາດຄວາມເຂັ້ມແຂງດ້ານງົບປະມານ.

ໃນ 1 ປີຜ່ານມາຄະນະພັກ,ອຳນາດການປົກຄອງແຂວງຈຳປາສັກໄດ້ເອົາໃຈໃສ່ຊີ້ນຳຢ່າງໃກ້ຊິດ ໂດຍສະເພາະແມ່ນການປຸກລະດົມຊຸກຍູ້ສັງຄົມໃຫ້ການບໍລິຈາກງົບປະມານ ແລະ ວັດຖຸອຸປະກອນຈາກສັງຄົມ ໃຫ້ກັບໜ່ວຍກູ້ໄພ ເພື່ອເຮັດໜ້າທີ່ຊ່ວຍເຫຼືອສັງຄົມ ໂດຍບໍ່ຫວັງສິ່ງຕອບແທນເປັນຕົ້ນ ລົດກູ້ໄພປັດຈຸບັນມີ 7 ຄັນ, ໃນນັ້ນ 1 ຄັນໃຊ້ບໍ່ໄດ້ ຊຶ່ງມີລົດມືສອງ 6 ຄັນ ແລະ ລົດໃໝ່ 100% 1 ຄັນ, ມີອາສາສະໝັກກູ້ໄພ 46 ຄົນ,ຍິງ 20 ຄົນ. ໄດ້ຮັບແຈ້ງເຫດອຸບັດເຫດເທິງຖະໜົນທັງ 1073 ຄັ້ງ, ໄດ້ຊ່ວຍເຫຼືອຄົນເຈັບໄປສົ່ງໂຮງໝໍ 1.456 ຄົນ, ຍິງ 405 ຄົນ, ເສຍຊີວິດ 30 ຄົນ, ຍິງ 10 ຄົນ.

ທ່ານ ທອງພັນ ໄຊທະນາສີ ໃຫ້ຮູ້ຕື່ມວ່າ: ຄຽງຄູ່ກັບຜົນງານ ຂໍ້ສະດວກດັ່ງກ່າວ ໜ່ວຍກູ້ໄພແຂວງຈຳປາສັກຍັງມີຂໍ້ຫຍຸ້ງຍາກຫຼາຍດ້ານທີ່ຢາກຮຽກຮ້ອງໃຫ້ທຸກພາກສ່ວນໃນສັງຄົມໃຫ້ການສະໜັບສະໜູນຊ່ວຍເຫຼືອເປັນຕົ້ນ: ບ່ອນຢູ່ພັກເຊົາຖາວອນຂອງໜ່ວຍກູ້ໄພບໍ່ມີ ປັດຈຸບັນອາໃສ່ດິນຂອງປະຊາຊົນຢູ່ຊົ່ວຄາວ, ຍັງຂາດງົບປະມານ,ທຶນໃນການໃຊ້ຈ່າຍບໍລິຫານປະຈຳວັນ, ຍັງຂາດຜູ້ອຸປະຖຳຫຼັກ. ໂດຍລາຍຮັບຕົ້ນຕໍແມ່ນໄດ້ຈາກຜູ້ມີນ້ຳໃຈໃສສັດທາ,ໃຈບຸນມາບໍລິຈາກ ແລະ ປ່ອນໃສ່ຕູ້ບໍລິຈາກທີ່ມູນນິທິໄປຕັ້ງໄວ້ຕາມຈຸດຕ່າງໆເຊັ່ນ: ສຳນັກງານລັດ, ຮ້ານອາຫານ, ວັດ, ຫ້ອງການຊາຍແດນ ລວມມີ 14 ໜ່ວຍ,ສະເລ່ຍລາຍຮັບໄດ້ປະມານ 4-5 ລ້ານກີບຕໍ່ເດືອນ ແຕ່ຖ້າມາທຽບໃສ່ຄ່າໃຊ້ຈ່າຍແມ່ນຫຼຸດລື່ນກັນຫຼາຍເປັນຕົ້ນ: ອັດຕາກິນຊື້ອາຫານໃຫ້ອາສາສະໝັກ, ນ້ຳມັນເຊື້ອໄພ, ອຸປະກອນການແພດ, ຄ່າບໍາລຸງຮັກສາລົດ, ຄ່າໄຟຟ້າ,ໂທລະສັບ ແລະ ວຽກງານບໍລິຫານອື່ນໆອາທິດໜຶ່ງປະມານ 4 ລ້ານກີບ ເມື່ອມາເບິ່ງການອຸປະຖຳຊ່ວຍເຫຼືອຈາກສັງຄົມ,ຜູ້ປະກອບການ,ບໍລິສັດ,ຫ້າງຮ້ານຕ່າງໆປັດຈຸບັນແມ່ນເບົາບາງລົງ.

ດັ່ງນັ້ນຕົນເອງໃນນາມປະທານມູນນິທິຊ່ວຍເຫຼືອຄົນທຸກຍາກແຂວງຈຳປາສັກຈຶ່ງຂໍຮຽກຮ້ອງມາຍັງອົງການຈັດຕັ້ງພາກລັດ, ນັກທຸລະກິດ,ຜູ້ປະກອບການ ຕະຫຼອດຮອດພໍ່ແມ່ປະຊາຊົນຊາວແຂວງຈຳປາສັກໃຫ້ການອຸປະຖຳຊ່ວຍເຫຼືອງົບປະມານ ຫຼື ອຸປະກອນການແພດ,ນ້ຳມັນລົດ,ເຄື່ອງຮັບໃຊ້ກູ້ໄພ ແລະ ອື່ນໆ ເພາະການຊ່ວຍເຫຼືອຂອງທ່ານ ເປັນການປະກອບສ່ວນທີ່ຈຳເປັນທີ່ສຸດ ທີ່ຈະຊ່ວຍໃຫ້ໜ່ວຍກູ້ໄພເຮົາມີຄວາມເຂັ້ມແຂງໝັ້ນຄົງຮັບໃຊ້ສັງຄົມຕາມແນວທາງຂອງພັກ-ລັດວາງອອກ.

ທ່ານ ທອງພັນ ໄຊທະນາສີ ກ່າວຕື່ວ່າ: ໃນຕໍ່ໜ້າຖ້າເຮົາມີງົບປະມານພຽງພໍ ທາງມູນນິທິມີຄວາມຈຳເປັນທີ່ຈະຕ້ອງຍົກລະດັບຄວາມຮູ້ຄວາມສາມາດຂອງອາສາສະໝັກກູ້ໄພຂຶ້ນຕື່ມ ເພາະປັດຈຸບັນເຮົາແກ້ໄຂໄດ້ພຽງຄົນເກີດອຸບັດເຫດເບື້ອງຕົ້ນເທົ່ານັ້ນ, ແຕ່ຄວາມສາມາດໃນການກູ້ໄພດ້ານວິຊາສະເພາະເຮົາຍັງເຮັດບໍ່ໄດ້ເຊັ່ນ: ອຸບັດເຫດທາງນ້ຳ, ຄົນຕົກຈາກທີ່ສູງ, ອັກຄີໄພ, ລົມພະຍຸ, ແຜ່ນດິນໄຫວ ແລະ ອື່ນໆ ເພື່ອກຽມຄວາມພ້ອມຊ່ວຍເຫຼືອສັງຄົມໃນຕໍ່ໜ້າ.

ຂ່າວ-ພາບ: ຄຳຫຼ້າ (ໜັງສືພິມຈຳປາໃໝ່)