ກະຊວງອຸດສະຫະກໍາ ແລະ ການຄ້າ ຊີ້ແຈງກ່ຽວກັບການແກ້ໄຂຂໍ້ຄົງຄ້າງໃນການຈັດຕັ້ງປະຕິບັດວຽກ

ບັນດາຜູ້ແທນສະພາແຫ່ງ ຊາດຮັບຟັງການຊີ້ແຈງຂອງບັນດາລັດຖະມົນຕີກະຊວງກ່ຽວຂ້ອງຕໍ່ຄຳຊັກຖາມຂອງສັງຄົມໃນມື້ທີ່ 5 ຂອງກອງປະຊຸມສະໄຫມສາມັນເທື່ອທີ 6 ຊຸດທີ 8

ໃນຕອນເຊົ້າຂອງ ວັນທີ 26 ພະຈິກ 2018, ທີ່ຫໍປະຊຸມສະພາແຫ່ງຊາດ, ຫລັກ 6 ນະຄອນຫລວງວຽງຈັນ, ກອງປະຊຸມສະໄຫມສາມັນເທື່ອທີ 6 ຂອງສະພາແຫ່ງຊາດຊຸດທີ 8 ໄດ້ສືບຕໍ່ດຳເນີນ ພາຍໃຕ້ການເປັນປະທານຂອງທ່ານ ນາງປານີ ຢ່າທໍ່ຕູ້, ປະທານສະພາແຫ່ງຊາດ, ບັນດາສະມາຊິກສະພາແຫ່ງຊາດ ຈາກເຂດເລືອກຕັ້ງຕ່າງໆ ໄດ້ຮັບຟັງການຊີ້ແຈງຕໍ່ຄໍາຊັກຖາມຂອງບັນດາສະມາຊິກສະພາແຫ່ງຊາດ ແລະ ການຊີ້ແຈງກັບທີ່ ຂອງລັດຖະມົນຕີກະຊວງ ອຸດສະຫະກໍາ ແລະ ການຄ້າ, ກະຊວງພະລັງ ງານ ແລະ ບໍ່ແຮ່, ແລະ ກະຊວງຊັບພະຍາ ກອນທໍາມະຊາດ ແລະ ສິ່ງແວດລ້ອມ, ກ່ຽວກັບການຈັດຕັ້ງປະຕິບັດວຽກງານຂອງແຕ່ລະກະຊວງໃນໄລຍະຜ່ານມາ, ພ້ອມທັງປະກອບຄໍາຄິດຄໍາເຫັນ ເຂົ້າໃສ່ບົດລາຍງານຂອງແຕ່ລະກະຊວງ.

ທ່ານ ນາງເຂັມມະນີ ພົນເສນາ ລັດຖະມົນຕີກະຊວງອຸດສະ ຫະກໍາ ແລະ ການຄ້າ ຊີ້ແຈງກ່ຽວກັບການແກ້ໄຂຂໍ້ຄົງຄ້າງໃນການຈັດຕັ້ງປະຕິບັດວຽກ ງານຂອງກະຊວງອຸດສະຫະກໍາ ແລະ ການຄ້າ ໃນໄລຍະຜ່ານມາຕໍ່ກອງປະຊຸມສະໄຫມສາມັນເທື່ອທີ 6 ຂອງສະພາແຫ່ງຊາດຊຸດທີ 8 ວ່າ: ການແກ້ໄຂຂໍ້ຄົງຄ້າງຂອງກະຊວງອຸດສະຫະກໍາ ແລະການຄ້າ ໃນໄລຍະຜ່ານມາໄດ້ສຸມໃສ່ 3 ຫນ້າວຽກ ເປັນຕົ້ນ: ບັນຫາການຊອກຕະຫລາດເພື່ອສົ່ງເສີມການຜະລິດເປັນສີນຄ້າ ໂດຍສະເພາະຕະຫລາດຕ່າງປະເທດ ສືບຕໍ່ແກ້ໄຂອຸປະສັກກີດກັນການຄ້າບໍ່ແມ່ນພາສີ, ອໍານວຍສົ່ງເສີມໃຫ້ພາກທຸລະກິດມີການແລກປ່ຽນ ຈັບຄູ່ກັນທາງດ້ານທຸລະກິດເພື່ອຊອກຫາຊ່ອງທາງເຈລະຈາຊື້ຂາຍສິນຄ້າຕົວຈິງນໍາກັນ, ການປັບປຸງສະພາບເເວດລ້ອມໃນການດໍາເນີນທຸລະກິດ ໄດ້ສ້າງສິ່ງອໍານວຍຄວາມສະດວກໃຫ້ແກ່ການດໍາເນີນທຸລະກິດໃຫ້ດີຂື້ນ ສຸມໃສ່ຈັດຕັ້ງຜັນຂະຫາຍຄໍາສັ່ງຂອງນາຍົກລັດຖະມົນຕີເລກທີ 02/ນຍວ່າດ້ວຍການປັບປຸງລະບຽບການ ແລະກົນໄກປະສານງານໃນການດໍາເນິນທຸລະກິດຢູ່ລາວຊຶ່ງໃນປັດຈຸບັນມີຄວາມຄືບຫນ້າຫລາຍສົມຄວນ ລວມເຖິງການຄຸ້ມຄອງລາຄາສິນຄ້າ, ໂດຍສະເພາະແມ່ນນໍ້າມັນເຊື້ອໄຟ ແລະ ສິນຄ້າທີ່ກະທົບໄວຕໍ່ການດໍາລົງຊີວິດຂອງປະຊາຊົນ.

ພາຍຫລັງ ສະມາຊິກສະພາແຫ່ງຊາດແຕ່ລະເຂດເລືອກຕັ້ງໄດ້ຟັງການຊີ້ແຈງ ກ່ຽວກັບການແກ້ໄຂຂໍ້ຄົງຄ້າງໃນການຈັດຕັ້ງປະຕິບັດວຽກງານ ຂອງກະຊວງອຸດສະຫະກໍາ ແລະ ການຄ້າ ໃນໄລຍະຜ່ານມາ ໂດຍລັດຖະມົນຕີກະຊວງອຸດສະຫະກໍາ ແລະ ການຄ້າ ແລ້ວ, ບັນດາສະມາຊິກສະພາແຫ່ງຊາດແຕ່ລະເຂດເລືອກຕັ້ງ ໄດ້ສືບຕໍ່ປະກອບຄໍາເຫັນໃສ່ວຽກງານນີ້ຕື່ມອີກເພື່ອໃຫ້ສອດຄ່ອງກັບສະພາບເງື່ອນໄຂຕົວຈິງໃນປັດຈຸບັນ.

Save the mother Earth

Think twice before throwing rubbish!You throw one single straw, one single plastic bag, one single bottle?Is not matter? What if 7.4 billion people do the same?—–#Share and #Act

Posted by Million Stories on Sunday, November 25, 2018

ທ່ານ ວິໄລສຸກ ພີມມະສອນ ສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 9 ແຂວງຊຽງຂວາງ ມີຄໍາຊັກຖາມເພີ່ມຕື່ມ ຕໍ່ການຊີ້ແຈງຂອງລັດຖະມົນຕີກະຊວງອຸດສະຫະກໍາການຄ້າວ່າ: ຕໍ່ບັນຫາການສ້າງຕັ້ງໂຮງງານຊີມັງຢູ່ລາວໃນປັດຈຸບັນ ເຫັນວ່າມີການເພີ່ມຂື້ນຢ່າງຕໍ່ເນື່ອງ, ບາງບ່ອນບໍ່ສາມາດຈໍາຫນ່າຍໄດ້, ຈະມີວີທີການດັດສົມແນວໃດ ເພື່ອແກ້ໄຂໃຫ້ສາມາດຈໍາຫນ່າຍໄດ້ໃນຂັ້ນຕໍ່ໃດ.

ທ່ານສາຍທອງ ແກ້ວດວງດີ ສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 1 ນະຄອນຫລວງວຽງຈັນ ມີຄໍາຊັກຖາມເພີ່ມຕື່ມ ຕໍ່ການຊີ້ແຈງຂອງລັດຖະມົນຕີກະຊວງອຸດສະຫະກໍາ ແລະ ການຄ້າວ່າ: ຈະມີວີທີການແນວໃດ ໃນການແກ້ໄຂບັນຫາການສົ່ງອອກສາລີໄປຕ່າງປະເທດ ເພາະເຫັນວ່າໃນປັດຈຸບັນ ມີລາຄາແພງຫລາຍ ຖ້າສົມທຽບໃສ່ປະເທດໃກ້ຄຽງ.

ພາຍຫລັງສະມາຊິກສະພາແຫ່ງຊາດປະກອບຄໍາເຫັນໃສ່ບົດລາຍງານຊີ້ແຈ້ງຂອງລັດຖະມົນຕີກະຊວງອຸດສະຫະກໍາ ແລະ ການຄ້າກ່ຽວກັບການແກ້ໄຂຂໍ້ຄົງຄ້າງຂອງວຽກງານອຸດສະຫະກໍາແລະ ການຄ້າແລ້ວ, ກໍ່ໄດ້ສືບຕໍ່ຮັບຟັງການລາຍງານຊີ້ແຈງຂອງລັດຖະມົນຕີກະຊວງພະລັງງານ ແລະ ບໍ່ແຮ່ ແລະ ລັດຖະມົນຕີກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມກ່ຽວກັບການແກ້ໄຂຈຸດອ່ອນຂໍ້ຄົງຄ້າງຂອງການຈັດຕັ້ງປະຕິບັດວຽກງານຕື່ມອີກ. ສໍາລັບການດໍາເນີນກອງປະຊຸມສະໄຫມສາມັນເທື່ອທີ 6 ຂອງສະພາແຫ່ງຊາດຊຸດທີ 8 ໃນຕອນບ່າຍມື້ນີ້ ຕາມວາລະແລ້ວ, ບັນດາສະມາຊິກສະພາແຫ່ງຊາດ ຈະໄດ້ສືບຕໍ່ຮັບຟັງການຊີ້ແຈງຂອງລັດຖະມົນຕີກະຊວງໂຍທາທິການ ແລະຂົນສົ່ງ ແລະ ຜູ້ວ່າການທະນາຄານແຫ່ງສປປ ລາວ ກ່ຽວການຈັດຕັ້ງປະຕິບັດວຽກງານໃນໄລຍະຜ່ານມາ.

ຂ່າວ: ເດດອາລຸນ ແກ້ວວິໄລ
ຮູບພາບ: ຕາລີເຊຍ

Lao National Radio