ເມືອງເງິນ ແຂວງໄຊຍະບູລີ ໄດ້ຈັດພິທີປາຖະກະຖາ 3 ປະຫວັດສາດ

0
76

ຕອນເຊົ້າເວລາ 6 ໂມງ ຂອງວັນທີ່ 28 ພະຈິກ 2018 ນີ້ຢູ່ທີ່ ເດີນອານຸສາວະລີ-ນັກຮົບນິລະນາມ ແລະ ອານຸສອນສະຖານ ໄກສອນ ພົມວິຫານ. ທາງຄະນະນໍາອົງການປົກຄອງເມືອງ ໄດ້ສົມທົບຫົວໜ້າຫ້ອງການ, ກົມກອງ ໄດ້ພ້ອມກັນໄປວາງພວງມາລາ ແລະ ກະຕ່າດອກໄມ້ ເນື່ອງໃນໂອກາດ ວັນສ້າງຕັ້ງເມືອງວຽງໄຊ ແຂວງ ຫົວພັນ ຖານທີໝັ້ນຂອງການປະຕິວັດ ຄົບຮອບ 50 ປີ, ວັນຊາດທີ 2 ທັນວາ ຄົບຮອບ 43 ປີ ແລະ ວັນຄ້າຍວັນເກີດຂອງປະທານ ໄກສອນ ພົມວິຫານ ຄົບຮອບ 98 ປີ ທີ່ໄດ້ໜູນວຽນມາບັນຈົບຄົບຮອບອີກວາລະໜຶ່ງ.

ຮອດເວລາ 8 ໂມງ ຂອງວັນດຽວກັນນີ້ ຢູ່ທີ່ສະໂມສອນເມືອງເງິນ ໄດ້ຈັດພິທີ ປະຖະກະຖາມູນເຊື້ອ 3 ວັນປະຫວັດສາດຂື້ນ ເຊີ່ງມີຄະນະບໍລິຫານງານພັກເມືອງ, ພະນັກງານຫຼັກແຫຼ່ງ,ຫົວໜ້າຫ້ອງການ, ພະນັກງານປະຕິວັດອາວຸໂສບຳນານ, ຄູອາຈານ, ກົມກອງອອ້ມຂ້າງ, ພະນັກງານ ລັດຖະກອນ, ເລຂາໜ່ວຍພັກນາຍບ້ານທົ່ວເມືອງເຂົ້າຮ່ວມຮັບຟັງ 200 ກ່ວາຄົນ.
ທ່ານ ບຸນມີ ຈັນທິບ ກຳມະການພັກແຂວງ ເລຂາຄະນະບໍລິຫານງານພັກເມືອງ ເຈົ້າເມືອງໆເງິນ ໄດ້ໃຫ້ກຽດເລົ່າຄືນມູນເຊື້ອ ປະຫວັດສາດຂອງຊາດລາວເຮົາ ທີ່ໄດ້ໜູນວຽນມາບັນຈົບ ຄົບຮອບ 43 ປີ.

 

ເຊິ່ງເປັນວັນແຫ່ງໄຊຊະນະອັນຍິ່ງໃຫຍ່ ທີ່ ປະຊາຊົນລາວບັນດາເຜົ່າ ໄດ້ເອກອ້າງທະນົງໃຈຕໍ່ມູນເຊີ້ືອເອກະລາດ, ອິດສະຫຼະພາບ ແລະ ເປັນເຈົ້າຂອງປະເທດຊາດຢ່າງແທ້ຈິງ ໄດ້ສະຖາປະນາເປັນປະເທດ ສາທາລະນະລັດ ປະຊາທິປະໄຕ ປະຊາຊົນລາວ ຢ່າງສະຫງ່າຜ່າເຜີຍ ໃນວັນທີ 2 ທັນວາ ປີ 1975.ໂດຍຕິດພັນກັບການເລົ່າຄືນ ວັນສ້າງຕັ້ງເມືອງວຽງໄຊ ແຂວງ ຫົວພັນ ຖານທີໝັ້ນຂອງການປະຕິວັດ ຄົບຮອບ 50 ປີ ພ້ອມທັງເລົ່າຄືນຊີວິດ ແລະ ການເຄື່ອນໄຫວຂອງ ປະທານ ໄກສອນ ພົມວິຫານ ຄົບຮອບ 98 ປີ ຜູ້ນຳທີ່ແສນເຄົາຮັກ ນັບແຕ່ຊີວິດເຍົາໄວ ຈົນກ້າວຂື້ນເປັນຜູ້ນຳທີ່ຍິ່ງໃຫຍ່, ເປັນຜູ້ນຳທີ່ສະຫຼາດສ່ອງໃສ ໃນການນຳພາປວງຊົນລາວທັງຊາດຕໍ່ສູ້ຕ້ານການຮຸກຮານຂອງຈັກກະພັດຕ່າງດ້າວ ຈົນສາມາດຍາດໄດ້ເອກະລາດ.

ການປາຖະກະຖາມູນເຊື້ອ 3 ວັນສໍາຄັນຄັ້ງນີ້ ເພື່ອເປັນການສຶກສາອົບຮົມພະນັກງານ, ທະຫານ ຕຳຫຼວດ ແລະ ພໍ່ແມ່ປະຊາຊົນບັນດາເຜົ່າໃຫ້ພ້ອມກັນຈົດຈຳລຳລຶກ ມູນເຊື້ອ ດັ່ງກ່າວ ໃຫ້ພ້ອມກັນສຶບຕໍ່ປົກປັກຮັກສາ ແລະ ພັດທະນາປະເທດຊາດໃຫ້ຮັ່ງມີເຂັ້ມແຂງ, ປະຊາຊົນຮັ່ງມີຜາສຸກ, ສັງຄົມສີວິໄລ ແລະ ຍຸດຕິທຳເທື່ອລະກ້າວ.

ໂດຍ: ສຸລິຍາ ແສງເດືອນ