ສະມາຊິກສະພາ ສະເໜີໃຫ້ກວດສອບຈັນຍາບັນ,ຈັນຍາທຳຂອງຜູ້ພິພາກສາ

ກອງປະຊຸມສະໄໝສາມັນເທື່ອທີ 6 ຂອງສະພາແຫ່ງຊາດຊຸດທີ 8 ໃນວັນທີ 30 ພະຈິກ 2018 ທີ່ຫໍສະພາແຫ່ງຊາດຫຼັກ 6 ນະຄອນຫຼວງວຽງຈັນ ດຳເນີນພາຍໃຕ້ການເປັນປະທານຂອງທ່ານ ນາງສີໃສ ລືເດດມູນສອນ, ຮອງປະທານສະພາແຫ່ງຊາດ ສະມາຊິກສະພາແຫ່ງຊາດໄດ້ຮັບຟັງວຽກງານຂອງອົງການໄອຍະການປະຊາຊົນສູງສຸດ ແລະ ສານປະຊາຊົນສູງສຸດ ຕໍ່ວຽກງານອົງການໄອຍະການປະຊາຊົນສູງສຸດ ທ່ານ ຄຳສານ ຊຸວົງ, ຫົວໜ້າອົງການໄອຍະການປະຊາຊົນສູງສຸດໄດ້ຍົກໃຫ້ເຫັນເຖິງການຈັດຕັ້ງປະຕິບັດແຜນການເຄື່ອນໄຫວວຽກງານກາງສະໄໝ ນັບແຕ່ 2016 ຫາ 2018 , ວຽກງານປະຈໍາປີ 2018 , ທິດທາງແຜນການຮອດປີ 2020 ແລະ ວຽກງານຈຸດສຸມປະຈໍາປີ 2019

ລວມເຖິງຜົນງານພົ້ນເດັ່ນທີ່ອົງການໄອຍະການປະຊາຊົນສູງສຸດຍາດມາໄດ້ໃນແຕ່ລະດ້ານເປັນຕົ້ນວຽກງານຕິດຕາມກວດກາການເຄົາລົບແລະປະຕິບັດກົດໝາຍແລະການສັ່ງຟ້ອງຜູ້ຖືກກ່າວຫາ ຂຶ້ນສານຕາມກົດໝາຍໂດຍສະເພາະແຜນການສືບສວນສອບສວນ,ການດຳເນີນຄະດີຢູ່ສານ,ການປະຕິບັດກົດໝາຍໃນຄ້າຍຄຸມຂັງດັດສ້າງລວມທັງການຕິດຕາມກວດກາປະຕິບັດຄຳຕັດສິນຂອງສານໃນສົກ 2016-2017 ຮັບຄໍາຮ້ອງຄະດີອາຍາການເຂົາມາອົງການໄອຍະການປະຊາຊົນສູງສຸດຫຼາຍກວ່າ 18.000 ເລື່ອງ, ສາມາດປະຕິບັດສຳເລັດ 1.700 ເລື່ອງ, ກຳລັງປະຕິບັດ 5.700 ກວ່າເລື່ອງນອກຈາກນີ້ອົງການໄອຍະການປະຊາຊົນໃນທົ່ວປະເທດໄດ້ຮັບຄຳຮອງຂໍຕິດຕາມກວດກາການປະຕິບັດຄຳຕັດສິນຂອງສານຫຼາຍກວ່າ 340 ເລື່ອງ, ແກ້ໄຂແລ້ວ 293 ເລື່ອງ ພວມຄົ້ນຄວ້າ 56 ເລື່ອງ.ຄຽງຄູ່ກັບຜົນງານທີ່ຍາດມາໄດ້ຫົວໜ້າອົງການໄອຍະການປະຊາຊົນສູງສຸດຍັງໄດ້ຍົກໃຫ້ເຫັນດ້ານອ່ອນຂໍ້ຄົງຄ້າງທີ່ຕ້ອງສືບຕໍ່ປັບປຸງແກ້ໄຂໃນຕໍ່ໜ້າ.

ພາຍຫຼັງຫົວໜ້າອົງການໄອຍະການປະຊາຊົນສູງສຸດສຳເລັດການລາຍງານວຽກງານອົງການໄອຍະການປະຊາຊົນສູງສຸດແລ້ວ ທ່ານ ຄຳພັນ ສິດທິດຳພາ ປະທານສານປະຊາຊົນສູງສຸດ ໄດ້ຜ່ານບົດລາຍງານຂອງສານປະຊາຊົນສູງສຸດກ່ຽວກັບການຈັດຕັ້ງປະຕິບັດແຜນການເຄື່ອນໄຫວວຽກງານກາງສະໄໝນັບແຕ່ປີ 2016 ຫາ 2018 ວຽກງານປະຈຳປີ 2018 ທິດທາງແຜນການຮອດປີ 2020 ແລະວຽກງານຈຸດສຸມປະຈຳປີ 2019 ໂດຍທ່ານຊີ້ໃຫ້ເຫັນວ່າ: ທັງໝົດໄລຍະຜ່ານມາສານປະຊາຊົນແຕ່ລະຂັ້ນໄດ້ຕັ້ງໜ້າປະຕິບັດສິດແລະໜ້າທີ່ຂອງຕົນດ້ວຍຄວາມຮັບຜິດຊອບສູງ ສະແດງອອກຜູ້ພິພາກສາແລະພະນັກງານຂອງສານຮັກສາໄດ້ຄຸນທາດການເມືອງ, ຄຸນສົມບັດສິນທຳປະຕິວັດ,ຈັນຍາບັນ,ຈັນຍາທຳ ໃຫ້ການພິຈາລະຍາຕັດສິນຄະດີມີຄວາມວ່ອງໄວ,ໂປ່ງໃສ,ຖືກຕ້ອງ ແລະ ຮັບປະກັນຄວາມຍຸຕິທຳໃນສັງຄົມ
ພາຍຫຼັງສຳເລັດການລາຍງານວຽກງານຕຸລາການແລ້ວ ຕາງໜ້າກຳມາທິການຍຸຕິທຳໄດ້ປະກອບຄຳເຫັນຕໍ່ບົດລາຍງານຂອງອົງການໄອຍະການປະຊາຊົນສູງສຸດ ແລະສານປະຊາຊົນສູງສຸດ

ຈາກນັ້ນປະທານກອງປະຊຸມໄດ້ມີຄຳເຫັນເຈາະຈິ້ມ ແລະ ໃຫ້ທິດຊີ້ນຳເພື່ອເປັນທິດໃຫ້ສະມາຊິກສະພາແຫ່ງຊາດຄົ້ນຄວ້າແລະປະກອບຄຳເຫັນຢ່າງມີຈຸດສຸມ.

ໂອກາດນີ້ ທ່ານ ສົມໄຊ ສີຫາຈັກ ສະມາຊິກສະພາແຫ່ງຊາດປະຈຳເຂດເລືອກຕັ້ງທີ່ 15 ແຂວງ ຈຳປາສັກ ໄດ້ສະເໜີໃຫ້ສານປະຊາຊົນເອົາໃຈໃສ່ຕື່ມກ່ຽວກັບຈັນຍາບັນ,ຈັນຍາທຳຂອງຜູ້ພິພາກສາ ຍັງມີປະກົດການສະແດງໃຫ້ເຫັນຫຼາຍໃນປະຈຸບັນ ໂດຍສະເພາະຄວາມບໍ່ເປັນກາງໃນການຕັດສິນຄະດີ,ການເລັ່ງທວງຜົນປະໂຫຍດແລະອື່ນໆ.

ຂ່າວ: ຈັນທະສອນ ສີຫານາດ