ການສົ່ງເສີມປີທ່ອງທ່ຽວ ຍັງມີຫລາຍຂອດທີ່ຈະຕ້ອງໄດ້ແກ້ໄຂ!!!

0
97

ການທ່ອງທ່ຽວແມ່ນ ຂະແໜງການໜຶ່ງທີ່ມີບົດບາດສຳຄັນ ປະກອບສ່ວນເຂົ້າໃນການພັດທະນາປະ ເທດ ສາມາດດຶງດູດລາຍຮັບໄດ້ເປັນຈຳນວນຫລາຍ ໂດຍບໍ່ຈຳເປັນແຕະຕ້ອງເຖິງການທຳລາຍຊັບພະຍາກອນ ທັງເຮັດໃຫ້ຂະແໜງບໍລິການຕ່າງໆມີການຂະຫຍາຍຕົວໄປພ້ອມ.

ປັດຈຸບັນ ມີຫລາຍປະເທດອຸດສາຫະກຳໄດ້ເອົາໃຈໃສ່ພັດທະນາການທ່ອງທ່ຽວພາຍໃນ ໄປພ້ອມໆ ກັບ ການປັບປຸງສິ່ງອຳນວຍຄວາມສະດວກໃນດ້ານຕ່າງໆ ເພື່ອດຶງດູດນັກທ່ອງທ່ຽວເຂົ້າມາທ່ອງທ່ຽວປະເທດຂອງຕົນໃຫ້ຫລາຍຂຶ້ນ ໂດຍສະເພາະແມ່ນການເຂົ້າ-ອອກປະເທດທີ່ງ່າຍດາຍ ໂດຍການໝູນໃຊ້ເຕັກໂນໂລຊີທີ່ບໍ່ມີຫລາຍຂັ້ນຫລາຍຂອດ.

ສປປ ລາວເຮົາກໍ່ໄດ້ເປີດປີທ່ອງທ່ຽວ 2018 ຢ່າງເປັນຂະບວນກວ້າງຂວາງໃນທົ່ວປະເທດ ດັ່ງທ່ານນາຍົກລັດຖະມົນຕີ ທອງລຸນ ສີສຸລິດ ໄດ້ລາຍງານຕໍ່ກອງປະຊຸມສະພາແຫ່ງຊາດ ເມື່ອບໍ່ດົນນີ້ວ່າ: ນອກຈາກມີການສະຫລອງປີທ່ອງທ່ຽວຕິດພັນກັບບຸນປະເພນີແຕ່ລະທ້ອງຖິ່ນແລ້ວ ຍັງໄດ້ໂຄສະນາ ຜ່ານສື່ມວນຊົນຢ່າງກວ້າງຂວາງທັງພາຍໃນ ແລະ ຕ່າງປະເທດ.

ສຳລັບ ຕ່າງປະເທດ ກໍ່ມີວາລະສານ BIZ News ຂອງເຢຍລະມັນ ແລະ ຊ່ອງ ໂທລະພາບ CNN ຂອງສະຫະລັດອາເມລິກາ ແລະ 9 ເດືອນຜ່ານມາ ໄດ້ມີນັກທ່ອງທ່ຽວເຂົ້າມາຫລາຍກວ່າ 3 ລ້ານເທື່ອຄົນ ແລະ ໝົດປີນີ້ ຄາດວ່າຈະບັນລຸ 4 ລ້ານກວ່າເທື່ອຄົນ. ແຕ່ກໍ່ຍັງຖືວ່າບໍ່ບັນລຸຕາມຄາດໝາຍວາງໄວ້ ຄືໃຫ້ໄດ້ 5 ລ້ານເທື່ອຄົນ. ສາເຫດທີ່ບໍ່ສາມາດບັນລຸໄດ້ກໍ່ແມ່ນ ຍັງມີຫລາຍຂອດໃນການ ສົ່ງເສີມການທ່ອງທ່ຽວ ຍັງບໍ່ຈອດກັນດີເຊັ່ນ: ບັນຫາການເຂົ້າ-ອອກຂອງນັກທ່ອງທ່ຽວຢູ່ບັນດາດ່ານສາກົນ, ການເກັບຄ່າທຳນຽມຢູ່ແຕ່ລະດ່ານ, ການເກັບປີ້ເຂົ້າຊົມສະຖານທີ່ທ່ອງທ່ຽວ, ການເກັບຄ່າໂດຍສານຂົນສົ່ງທີ່ສູງ ຕະຫລອດຮອດການປັບປຸງຄຸນນະພາບຂອງການບໍລິການຕໍ່ນັກທ່ອງທ່ຽວຍັງຊັກຊ້າ ແລະ ບໍ່ທັນດີເທົ່າທີ່ຄວນ.

ນັກທ່ອງທ່ຽວຕ່າງປະເທດຫລາຍຄົນທີ່ມາທ່ຽວລາວ ພວກເຂົາບອກວ່າ: ປະເທດລາວມີແຫລ່ງທ່ອງທ່ຽວທີ່ຫລາກຫລາຍ, ທຳມະຊາດຍັງສວຍງາມ ຂໍພຽງແຕ່ປັບປຸງການບໍລິການຂອງພາກລັດ ແລະ ຜູ້ປະກອບການບໍລິການຈຳນວນໜຶ່ງ ທີ່ສວຍໂອກາດຫາຜົນປະໂຫຍດແບບບໍ່ຊອບທຳກັບນັກທ່ອງທ່ຽວເຊັ່ນ: ຄວາມສະດວກໃນການເຂົ້າ-ອອກປະເທດ, ຫລຸດຂັ້ນຕອນທີ່ບໍ່ຈຳເປັນ, ກຳນົດຄ່າບໍລິການ ຕ່າງໆຕາມຄວາມເໝາະສົມ, ອະນຸລັກສິ່ງແວດລ້ອມໃຫ້ສົດຊື່ນ ກໍ່ຖືວ່າດຶງດູດນັກທ່ອງທ່ຽວໄດ້ເປັນຢ່າງດີແລ້ວ.

ຂອບໃຈທີ່ມາ: ww.laophattananews.com