ເມືອງເງິນ ກຳນົດ 2 ບ້ານ ເພື່ອສ້າງເປັນບ້ານທົດລອງ ພັດທະນາດ້ານແຮງງານ ແລະ ສະຫວັດດີການສັງຄົມ

0
86

ວັນທີ 30 ພະຈິກ 2018 ນີ້ ຢູ່ທີ່ຫໍປະຊຸມ ບ້ານບີໝີ ເມືອງເງິນ ແຂວງ ໄຊຍະບູລີ ໄດ້ເປີດກອງປະຊຸມ ການສ້າງບ້ານພັດທະນາດ້ານແຮງງານ ແລະ ສະຫວັດດີການສັງຄົມ, ເຂົ້້າຮ່ວມເປັນກຽດ ມີທ່ານ ສອນສຸກ ພວງແກ້ວ ຮອງເລຂາພັກເມືອງ ຮອງເຈົ້າເມືອງ, ມີ ທ່ານ ນ້ອຍຄຳເນນ ຈັນຖາວອນ ກຳມະການພັກເມືອງ ເລຂາໜ່ວຍພັກນາຍບ້ານໆບີໝີ, ມີຫົວໜ້າຫ້ອງການ, ຄະນະກຳມະການຮັບຜິດຊອບການສ້າງບ້ານພັດທະນາດ້ານແຮງງານ ແລະ ສະຫວັດດີການສັງຄົມຂັ້ນເມືອງ, ອົງການຈັດຕັ້ງບ້ານ, ຕະຫຼອດຮອດ ປະຊາຊົນ ເຂົ້າຮ່ວມ.

ທ່ານ ບຸນລົ້ນ ຄຳພະວົງ ຮອງປະທານກວດກາ ພັກ-ລັດ ເມືອງ ຕ່າງໜ້າຄະນະກຳມະການ ຮັບຜິດຊອບການສ້າງບ້ານພັດທະນາດ້ານແຮງງານ ແລະ ສະຫວັດດີການສັງຄົມ ກໍ່ໄດ້ ຜ່ານຂໍ້ຕົກລົງຂອງ ລັດຖະມົນຕີ ກະຊວງ ແຮງງານ ແລະ ສະຫວັດດີການສັງຄົມ ສະບັບເລກທີ 2196/ຮສສ, ລົງວັນທີ 20 ມິຖຸນາ 2016 ວ່າດ້ວຍການສ້າງບ້ານພັດທະນາດ້ານແຮງງານ ແລະ ສະຫວັດດີການສັງຄົມ, ຜ່ານຂໍ້ຕົກລົງຂອງທ່ານເຈົ້າເມືອງ ວ່າດ້ວຍການແຕ່ງຕັ້ງຄະນະກຳມະການຮັບຜິດຊອບການສ້າງບ້ານພັດທະນາດ້ານແຮງງານ ແລະ ສະຫວັດດີການສັງຄົມຂັ້ນເມືອງ ແລະ ຂໍ້ຕົກລົງ ວ່າດ້ວຍການກຳນົດ ເອົາ 2 ບ້ານຄື: ບ້ານບີໝີ ແລະ ບ້ານນາງົວ ເປັນບ້ານທົດລອງ ພັດທະນາດ້ານແຮງງານ ແລະ ສະຫວັດດີການສັງຄົມ.

ຈາກນັ້ນ ທ່ານ ທອງມີ ໄຊຊະນະ ຫົວໜ້າຫ້ອງການແຮງງານ ແລະ ສະຫວັດດີການສັງຄົມເມືອງ ກໍ່ໄດ້ ອະທິບາຍ ກ່ຽວກັບມາດຖານຂອງການສ້າງຄອບຄົວ ແລະ ບ້ານພັດທະນາດ້ານແຮງງານ ແລະ ສະຫວັດດີການສັງຄົມ. ໃຫ້ພໍ່ແມ່ປະຊາຊົນ ໄດ້ຮັບຮູ້ ເຂົ້າໃຈ. ພ້ອມທັງມອບໃຫ້ ຄະນະກຳມະການຮັບຜິດ ຊອບ ສືບຕໍ່ລົງຊຸກຍູ້, ຕິດຕາມ, ກວດກາ, ເກັບກຳຂໍ້ມູນ ສະຫຼຸບ, ແລະ ປະເມີນຜົນ ຕາມ 3 ມາດຖານຂອງຄອບຄົວ ແລະ 6 ມາດຖານຂອງບ້ານພັດທະນາດ້ານແຮງງານ ແລະ ສະຫວັດດີການສັງຄົມ.
ໂດຍ: ອິນແປງ ແຫວນຄຳ